Pohnpeian Bible with Apocrypha MELKAHKA KAN 36
36
Suwed en Aramas n TITLE NI MAHSEN EN IPRU: En Depit, sapwellimen KAUN-O ladu.
Dihp kin momour loalen aramas suwed;
aramas suwedo kin soikala Koht oh sohte kin wauneki. Rom 3.18.
Pwehki eh kin wiahki pein ih mehkot,
e kin lemeleme me Koht sohte pahn diar dipe oh kalokehki.
Eh koasoi kan me suwed oh diren likamw;
e solahr kin wia dahme mwahu oh pwung.
E kin wiahda koasoandi suwed kei nindokon eh kin wonohn nan dewe;
e sohte kin wia mehkot mwahu,
oh sohte suwed ehu e kin soikala.
Kupwurmwahu en Koht
Maing KAUN, sapwellimomwi limpoak poatopoat kin leldalahng nanleng;
sapwellimomwi loalopwoat kin kipe pahnlahng.
Sapwellimomwi pwung inenen ileile duwehte nahna kan;
sapwellimomwi kadeik loal duwehte loalen nan madau.
Komw kin ketin apwahpwalih aramas akan oh mahn akan.
 
Maing Koht, ia uwen kesempwal en sapwellimomwi limpoak poatopoat!
Se kin diar silasil pahn mwetehn nin limomwi kan.
Se kin kamadipwki kisin tungoal koaros me komw kin ketikihda;
komw kin ketin mweidohng kiht se en kin nimpil sang ni pilen sapwellimomwi kalahngan.
Komwi me poahsoan en mour koaros,
oh pwehki sapwellimomwi marain se kin kak patohwan marain.
 
10 Komwi ketin dadaurete sapwellimomwi limpoak ong irail kan me kin patohwan esei komwi
oh ketin wia me mwahu ong me pwung kan.
11 Komw dehr ketin mweidohng me aklapalap akan en mahweniong ie
de aramas suwed kan en kahrehda ei pahn sopohla.
 
12 Kumwail kilang wasa me aramas suwed kan pwupwudiong ie.
Re wonohnehr wasao sohte kak pwourda.

n^ TITLE NI MAHSEN EN IPRU: En Depit, sapwellimen KAUN-O ladu.

36:1: Rom 3.18.