Pohnpeian Bible with Apocrypha MELKAHKA KAN 34
34
Kapingpen Kalahngan en Koht l TITLE NI MAHSEN EN IPRU: En Depit melkahka mwurin eh mweselsang rehn Apimelek mwurin eh mwomwehda me e iahkalahr, Apimelek eri kausala. 1 Sam. 21.13-15.
I pahn patohwan kapingkalahngan ong KAUN-O ahnsou koaros;
I sohte pahn tokedihsang ei kapikapinga.
I pahn kin patohwan kapingahki wiepen nin lime kan;
kumwail me toutoulahr akan, kumwail rong oh nsenamwahula!
Kumwail iang ie lohkiseli roson lapalap en KAUN-O;
kitail wiakihteieu kapinga mware!
 
I kapakapohng KAUN-O, e ahpw ketin sapeng ie;
e ketin kasaledekihiehla sang nan ei masak koaros.
Me toutoulahr akan kin sohpeiong oh kin nsensenamwahu;
re sohte pahn nsensuwedla.
Me sohte sawaseparail akan kin likweriong, oh e kin ketin sapeng irail;
e kin ketin doareirailla sang ar apwal akan koaros.
Sapwellime tohnleng kin sinsile irail kan me kin wauneki KAUN-O,
oh kin kapitirailsang soahng keper kan.
 
Kumwail pein rapahki ia uwen kalahngan en KAUN-O.
Meid pai irail kan me kin diar sileparail pahn kupwure. 1 Pit. 2.3.
Kumwail sapwellime aramas akan koaros, kumwail wauneki KAUN-O,
irail koaros me kin peikiong pahn ahneki soahng koaros me re anahne.
10 Laion kan pil kin duhpengkihla eh sohte mwenge,
ahpw irail kan me kin peikiong KAUN-O, sohte pahn luhs sang mehkot mwahu.
 
11 Kohdo, kumwail kompoakepahi pwulopwul kan, oh rong ie,
pwe I pahn padahkihong kumwail duwen wauneki KAUN-O.
12 Kumwail men nsenamwahu nan amwail mour?
Kumwail anahne mour werei oh nsenamwahu? 1 Pit. 3.10-12.
13 Eri, kumwail dehr lokaia suwed,
oh dehr lokaia likamw.
14 Kumwail sohpeisang me suwed oh wiahda me mwahu;
kumwail nantihong kolokol popohl ni mohngiong unsek.
 
15 KAUN-O kin ketin sinsile me pwung kan
oh kin ketin karonge ar likwer kan.
16 E kin ketin pelian irail kan me kin wia me suwed,
eri re pahn manoknokla ni ar pahn mehla.
17 Me pwung kan kin likweriong KAUN-O oh e kin ketin karonge irail;
e kin ketin kapitirailsang nan arail apwal akan koaros.
18 KAUN-O kin ketiket mpen irail me nan kapehd tikitikilahr;
oh kin ketin doarehla irail kan me kin sohla ar koapworopwor.
 
19 Apwal tohto kin lelohng aramas mwahu men,
ahpw kAUN-O kin ketin doarehsang nan eh apwal akan koaros;
20 KAUN-O kin ketin sinsile,
sohte tih pwoat reh me timpeseng. Sohn 19.36.
21 Mehkot suwed pahn kemehla aramas suwed kan;
irail kan me kin kailongki me pwung kan pahn ale lokolok.
 
22 KAUN-O pahn ketin doarehla sapwellime aramas akan;
irail kan me kin patohla reh pwe en ketin sinsile irail pahn mourla.

l^ TITLE NI MAHSEN EN IPRU: En Depit melkahka mwurin eh mweselsang rehn Apimelek mwurin eh mwomwehda me e iahkalahr, Apimelek eri kausala.

^ 1 Sam. 21.13-15.

34:8: 1 Pit. 2.3.

34:12: 1 Pit. 3.10-12.

34:20: Sohn 19.36.