35
1-2 Sohp, me sapwung omwi kin patohwan
me komwi mwakelekel mwohn silangin Koht,
de kalelapak rehn Koht, “Dahme dipei kan wiahiong komwi?
Dahme I pahn paiehki ma I sohte wiahda dihp?”
I pahn pil sapeng komwi oh kompoakapahmwi kan.
 
Kumwail kilengdawohng pahnlahng! Kilang uwen ileile en depwek kan!
Ma kumwail pahn wia dihp, e sohte kin kauwehla Koht.
Ma kumwail wiahda sapwung pak tohto, met mie katepe ong Koht? Sohp 22.2-3.
Omwi pwung kin sewese Koht?
Sohte mehkot me Koht kin ketin anahne sang rehmwi.
Mehn mpomw me kin lokolongki dipomw kan,
oh kamwahu me komw kin wia me kin sewesehda.
 
Ni ahnsou me aramas kin lokolok, re kin sengiseng;
re kin peki emen en doareirailla.
10 Ahpw re sohte kin sohpeiong Koht, me ketin wiairailda,
me kin ketikihong irail koapworopwor nan arail ahnsou apwal.
11 Re sohte kin sohpeiong Koht, me kin ketikihong kitail kupwurokong,
pwe kitail en loalokong sang mahn de menpihr.
12 Re kin peki sawas, ahpw Koht sohte kin ketin sewese irail,
pwehki ar aklapalap oh suwed.
13 Sohte katepen arail pahn likwer oh peki sawas;
Koht Wasa Lapalahpie sohte pahn ketin karonge de mahsanih irail.
 
14 Sohp, komw patohwan me komwi sohte kak patohwan Koht;
ahpw kanengamah awiawih—omwi repenpwung miher mwohn silangi.
15 Komw medemedewe me Koht sohte pahn ketin wia sapwellime kalokolok,
ma e sohte kin ketin tehk mwahu dihp.
16 Sohte katepen omwi pahn usehla omwi koasoi kan;
e sansal me komw sohte wehwehki dahme komwi koasoakoasoia.

35:6: Sohp 22.2-3.