3
En Sohp eh Kaulim ong Koht
Mwurin met Sohp ahpw tapihada lokaia oh keriahla rahn me e ipwidi. Ser. 20.14-18.
Sohp
2-3 Maing Koht, komw ketin keriahla rahn me I ipwidio;
komw ketin keriahla pwohng me I tepin wiawihda nan kapehd en inei. Sir. 23.14.
Maing Koht, komw ketin kawekiong ni rotorot rahno.
Komw dehpa mwahn pwurehng tamanda rahno,
de mweidohng marain en dakerada.
En wiahla rahnen pahtou oh rotorot mosul;
depwek kan en kipehdi oh perehla marain en ketipin.
Komw ketin irisasang pwohngo
ni wadawad en sounpar oh sounpwong kan;
oh ketin wiahkihla pwohng tehn ehu,
me sohte kak kahrehda kisin kansenamwahu kis!
Komw mahsanihong sounwunahni kan re en keriahla rahno,
irail kan me kak kamwakid Lepaiadan.c LEPAIADAN: Ekei aramas kamehlele me kieil men met, ekei kamehlele me mahn kamasepwehk en kawa men. Dene sounwunahni kan kin kak wiahiong mahn menet en karotehla ketipin.
Komw katokehdi usuhn rahn pwe en dehr daker wasa;
komw dehr mweidohng pwohngo en marainpeseng.
10 Komw ketin keriahla pwohngo pwehki eh mweidohng I en ipwidi,
pwehki eh mweidohng I en mihla nan apwal oh nsensuwed.
 
11 Mehnda I seu mehlahte nan kapehd en ineio,
de ni ahnsou me I ipwidiohte?
12 Dahme ei nohno kamwaitkiniehda pohn kepeo,
de kadihdikiniehda pilen eh dihdi?
13 Ma I mehlahte ahnsowo, I komkommoalier met,
14 oh I memeirier duwehte nanmwarki oh kaunen sampah kan,
me kin kauwada sapahl tehnpasarail mering kan.
15 Ngehi eri kommoaldier duwehte soupeidi kan
me kin kadirehkihla tehnpasarail kan kohl oh silper,
16 duwehte seri mehla men mwohn eh ipwidi.
17 Nan sousou iei wasa me aramas suwed kan kin katokehdi ie ar suwed,
oh me toutoulahr akan kin kommoaldi ie.
18 Pil wasao tohn imweteng kan kin diar ie popohl,
re sohte kin rong wasao ngihl keses en sounkamakam.
19 Me lapalap oh me tikitik kan kin mihmi wasao, koaruhsie duwepenehte,
oh lidu kan wasao pil saledeksang ar kaun akan.
 
20 Dahme e mweimweikihong mouren aramas akan en paisuwedla?
Dahme re pahn alehki kamarainparail nan ar nsensuwed?
21 Re kin awiawihodo mehla, e ahpw sohte kin leledo;
re kin mwohneki sousou ehu sang dipwisou kesempwal kan. Kaud. 9.6.
22 Re sohte kin diar nsenamwahu, re lao kin mehla oh nanpweldi;
23 Koht ketin karirihala sang irail dahme pahn kohdo,
oh pil ketin kapilirailpene oh keleiraildi.
24 I sohte kin kangkang pilawa, ihte ahi nsensuwed,
oh I sohte kin tokedihsang ei weirek.
25 Mehkoaros me I kin masak de lemmwiki, kin pweida rehi.
26 I sohte kak ahneki popohl, de kommoal,
oh ei apwal sohte kin tokedi.

3:1: Ser. 20.14-18.

3:2-3: Sir. 23.14.

c3:8: LEPAIADAN: Ekei aramas kamehlele me kieil men met, ekei kamehlele me mahn kamasepwehk en kawa men. Dene sounwunahni kan kin kak wiahiong mahn menet en karotehla ketipin.

3:21: Kaud. 9.6.