Pohnpeian Bible with Apocrypha SEREMAIA 23
23
Koapworopworki Soahng kan me pahn Kohdo
Ia uwen kamasepwehk en sapwellimen KAUN-O kopwung ong kaun akan me pwakihpeseng oh kamwomwala sapwellime aramas akan! Ih met me KAUN-O, Koht en Israel, mahsanih duwen kaun akan me uhdahn pahn pwukoahki apwalih sapwellime aramas akan, “Kumwail pwakihpesengier nei aramas akan oh koahkoahirailla; kumwail sohte apwalih irail. Met I pahn kalokehkin kumwail wiewia suwed kan me kumwail wiadahr. I pahn kapokonepene nei aramas akan sang nan wehi kan me I kasareiraillahng ie, I ahpw pahn kapwureiraillahng nan uhdakarail. Re pahn kaparaparala mehlel. I pahn idihada arail kaun kei me pahn apwahpwalih irail. Nei aramas akan solahr pahn perki de masak mehkot, oh sohte emen rehrail pahn salongala. Ngehi, KAUN-O, me mahmahsen.”
KAUN-O ahpw mahsanih, “Ahnsou ehu pahn kohdo me I pahn pilada kadaudok en Depit men pwe en wiahla nanmwarki. Nanmwarki menet pahn kaunda ni kupwurokong, oh e pahn ketin wiahda me pwung oh pahrek wasa koaros nan wehio. Ser. 33.14-16. Nan erein eh pahn nanmwarki, mehn Suda kan sohte pahn perki mehkot, oh mehn Israel kan pahn ahneki popohl. Re pahn kahdaneki nanmwarki meno, ‘KAUN-O Atail Sounkomour.’ ”
KAUN-O mahsanih, “Ahnsou ehu kohkohdo me aramas akan solahr pahn kahukihla mehkot ni mwarei, Koht ieias me ketin kahluwahdo mehn Israel sang Isip. Ahpw re pahn kahukihla ni mwarei, Koht ieias, me ketin kahluwahdo mehn Israel kan sang nan wehi ehu ni paliepeng, oh pil sang ni wehi teikan koaros me I kasareiraillahng ie. Irail eri pahn kousoanla nan uhdahn sapwarailo.”
Kokohp en Seremaia duwen Soukohp kan
Mohngiongiet lipwalipwadahr,
oh I kin wie rerrer.
Pwehki KAUN-O,
pwehki sapwellime mahsen sarawi kan,
I duwelahr aramas emen me sakaulahr douluhl,
aramas emen me direkilahr wain.
10 Sahpwet me diren aramas soaloalopwoat ong KAUN-O;
re kin mour suwed oh doadoahk suwedki ar manaman akan.
Pwehki sapwellimen KAUN-O mahsen en keria kan me kahredahr mwahiei eh kipedier sahpwet,
oh audepen mwetuwel kan mengidier.
 
11 KAUN-O ahpw mahsanih,
“Soukohp akan oh samworo kan sohte kin pwongih koht emen;
I diaradahr arail wiewia dihp suwed nan Tehnpas Sarawio.
12 Ahl me re pahn kin weweidki pahn rotorot oh mengeien kirisdi;
I pahn mweidohng pwe re en kin dipekelekel oh pwupwudi.
I pahn kihong irail nan apwal laud;
ahnsoun ar pahn kalokolok samwodohr.
Ngehi, KAUN-O, me mahmahsen.
13 I kilangehr dipen soukohp en Sameria kan;
re kohpadahr ni mwaren Paal,
oh kasalongelahr nei aramas en Israel kan.
14 Ahpw I kilangehr soukohp en Serusalem kan, me re wiahda suwedsang;
pwe re kin kamwahl oh wiahda likamw;
re kin sewesehki aramas akan en wia me sapwung,
eri, sohte me kin tokedihsang wia me suwed.
Ong ie irail koaros rasehng mehn Sodom,
re inenen suwed duwehte aramas en Komora kan. Sen. 18.20; Esek. 16.49.
 
15 “Eri, ngehi, KAUN-O, Wasa Lapalahpie, me mahsanih duwen soukohp en Serusalem kan:
I pahn kihong irail en kin kang kisin tuhke katik
oh nim pwoisin,
pwehki ar kaparapesengehr irair en sohte masak Koht nan sahpwet.”
16 KAUN-O, Wasa Lapalahpie, mahsanihong mehn Serusalem kan, “Kumwail dehr rong me soukohp kan kin ndinda, pwe re audaudehkin kumwail koapworopwor likamw kei. Re kin padahkihong kumwail audepen pein moangarail kan, a kaidehk dahme I mahsanih. 17 Re kin ndindaiong aramas akan me kin kahng rong ie, me dene re pahn pweida mwahu oh nsenamwahu. Oh kin ndindaiong aramas koaros me keptakai, me dene sohte kahpwal ehu pahn lelohng irail.”
18 Ngehi eri patohwan, “Sohte emen rehn soukohp pwukat me ese duwen audepe rir en KAUN-O. Sohte emen rehrail rongehr de dehdehkier sapwellimen KAUN-O mahsen, de iang rong kanahieng dahme KAUN-O ketin mahsanih.
19 “Sapwellime engieng iei elipip ehu, ahng kehlail ehu me pahn ipidohng pohn moangen me suwed kan. 20 E sohte pahn tokedi lao KAUN-O ketin kapwaiada mehkoaros me e ketin kupwurki en wiawi. Ni ahnsou kan me pahn kohdo, sapwellime aramas akan ahpw pahn dehdehkihla mehlel duwen met.”
21 KAUN-O ketin mahsanih, “I sohte kadarewei soukohp pwukat, ahpw re pein kohwei. I sohte mwahn kihong irail mahsen ehu, ahpw re kohpadahte ni mwarei. 22 Ma re ese lamalam rir kan en nan kupwurei, eri, re kakete lohkihla ei mahsen ong nei aramas akan oh kapweiekirailla sang ar mour suwed oh tiahk suwed kan me re kin wiewia.
23 “Ngehi Koht emen me kin ketiket wasa koaros, a kaidehkte wasa tehkis. 24 Sohte me kak rukula wasa kis me I sohte kak kilang. Kumwail sehse me ngehi Koht emen me kin ketiket wasa koaros nanleng oh sampah? Kupw. 1.7; Sir. 16.17. 25 I ese me soukohp pwukat kin kinehda likamw ni mwarei, oh duwen ar kakahski me ngehi me ketikihong irail ei mahsen kan nan ar ouraman kan. 26 Ia erein soukohp pwukat ar pahn kaweid suwedihki nei aramas akan ar likamw akan me re kin kinehda? 27 Re kin lemeleme me ar ouraman kan me re kin ndaiong aramas akan pahn kahrehda ar manokeiehla, duwehte ar pahpa kahlap ako ar manokeiehla oh sohpeiong Paal. 28 Soukohp emen me ouramandahr, pahn kin nda me ouraman ehu me e wiahda; a soukohp emen me rongehr ei mahsen, pahn lohkihda mahseno ni loalopwoat. Ia kamwahupen dihpw meng ni eh pahn kapahrekiong wihd? 29 Ei mahsen rasehng mpwulen kisiniei, oh amma me kin sukpeseng oh kamwarakpeseng takai kan. 30 I pil uhwong soangen soukohp kan me kin ale en emenemen eh lokaia, e ahpw lohkihda dene ei mahsen. 31 I pil uhwong soangen soukohp kan me kin kihwei pein ar lokaia kan, re ahpw kin koasoia me dene e pwilisang rehi. 32 Kumwail rong dahme ngehi, KAUN-O, mahmahsanih! I kin uhwong soukohp kan me kin koasoiahda ar ouraman akan me diren likamw. Re kin koasoiahda ouraman pwukat oh kin kasalongehkihla nei aramas akan ar likamw akan oh ar lokaiahn suwei kan. Kaidehk ngehi me kadarirailwei de koasoanehdi irail en kohwei; sohte sawas ehu re kin wiahiong aramas akan. Ngehi, KAUN-O, me mahmahsen.”
Mehn Katoutouwih Kupwur en KAUN-O
33 Eri, KAUN-O ahpw mahsanihong ie, “Seremaia, ma mehmen sang rehn nei aramas akan, de emen soukohp de samworo, pahn idek rehmw, ‘Da padahk en KAUN-O?’ ke pahn sapeng, nda, ‘Kowe mehn katoutouwihf MEHN KATOUTOUWIH: Mahsen en Ipru ong ni lepin mahsen “padahk” oh “katoutouwih” duwepenehte. kupwur en KAUN-O; oh e pahn ketin kasohreiukala.’
34 Ma mehmen sang rehn nei aramas akan, de emen soukohp de samworo, pahn pil nda, ‘mehn katoutouwih KAUN-O,’ I pahn kaloke iangahki eh peneinei. 35 Eri, iet mwomwen me emenemen pahn kin nda, ni eh pahn kin idek rehn kompoakepah oh rie kan, ‘Pasapeng da me KAUN-O ketikihda? Dahme KAUN-O ketin mahsanih?’ 36 Pwe solahr me pahn wiamwahlki lepin mahsen pwukat, ‘Mehn katoutouwih kupwur en KAUN-O,’ pwe ma mehmen pahn wia met, I pahn katoutouwihki ei padahk. Aramas akan kapirekelahr mahsen en ar Koht, Koht ieias, KAUN-O Wasa Lapalahpie. 37 Seremaia, idek rehn soukohp kan, ‘Dahme KAUN-O ketin sapengkin kumwail? Dahme e ketin mahsanih?’ 38 Ma re sapeikiong ei mahsen oh patohwan lepin mahsen pwukat, ‘mehn katoutouwih kupwur en KAUN-O,’ ke pahn padahkihong irail 39 me I pahn aleg ALE: Ni mahsen en Ipru, lepin mahsen wet kisehn lepin mahsen me wehwehki “padahk” oh “katoutouwih.” irail oh keseiraillahng wasa me dohsang ie, irail oh kahnimw me I kihong irail oh ar pahpa kahlap ako. 40 Eri, kanamenek poatopoat oh paisuwed me re sohte kak manokehla pahn ti pohrail kohkohlahte.”

23:5: Ser. 33.14-16.

23:14: Sen. 18.20; Esek. 16.49.

23:24: Kupw. 1.7; Sir. 16.17.

f23:33: MEHN KATOUTOUWIH: Mahsen en Ipru ong ni lepin mahsen “padahk” oh “katoutouwih” duwepenehte.

g23:39: ALE: Ni mahsen en Ipru, lepin mahsen wet kisehn lepin mahsen me wehwehki “padahk” oh “katoutouwih.”