Pohnpeian Bible with Apocrypha AISEIA 42
42
Sapwellimen KAUN-O Ladu
KAUN-O ketin mahsanih,
“Iet ei laduwo me I kakehlahda—
me I piladahr oh kin kupwurperenki.
I audehkidahr ngeni,
oh e pahn ketikihong wehi koaros pwuhng pahrek. Mad. 3.17; 17.5; Mark 1.11; Luk 3.22; 9.35. Mad. 12.18-21.
E sohte pahn ketin weriwer de mahsen ni ngihl laud,
de kapahrek ni ngihl laud nanial akan.
E sohte pahn ketin katipwasang ahlek pwoat me raukdier,
de kakunla lamp ehu me pahn kunlahr.
E pahn ketikihong koaros pwuhng poatopoat.
E sohte pahn kesehla eh koapworopwor, de nan kapehd tikitikla,
ahpw e pahn kauwada tiahk pwung nin sampah.
Sahpw doh kan kin kasikasik sapwellime padahk kan.”
 
Koht ketin kapikada nanleng oh ketin audehla pahnlahng,
e ketin wiahda sampah oh soahng momour kan koaros;
e ketikihong mour oh ngehn ong aramas kan koaros.
Eri, KAUN-O Koht, ketin mahsanihong sapwellime ladu, Wie. 17.24-25.
“Ngehi, KAUN-O, I malipeiukodohr oh ketikihonguhkehr manaman
pwe ke en kin tetehk pwuhng pwe en mie nin sampah.
Pwehki kowe, I pahn wiahda inou ong aramas koaros;
pwehki kowe, I pahn ketikihong marain wehi koaros. Ais. 49.6; Luk 2.32; Wie. 13.47; 26.23.
Ke pahn kapehdpeseng me maskun kan,
oh kasaledekihala me kin wonohn nan rotorot en imweteng kan.
 
“Ngehite me KAUN-O, omw Koht.
Sohte emen koht pahn ahneki lingan en mwarei;
I sohte pahn mweidohng koht likamw akan en iang ale kapingpei.
Mehkan me I kohpadahr, re pweidahr ahnsou wet.
Met I pahn kasalehiong uhk irair kapw kei,
mwohn ar pahn tepida wiawi.”
Koulen Kaping
10 Kumwail koulkihong KAUN-O apwoat koul kapwen,
kumwail tohn sampah koaros, kumwail koul kapikapinga ih!
Kumwail kan me seiseiloak nan madau kan, kumwail kapinga KAUN-O;
soahng mour kan koaros nan madau kan, kumwail kapinga KAUN-O!
Kumwail sahpw doh kan, oh towe kan koaros, kumwail koul!
11 Sapwtehn oh kahnimw kan ie en kapinga Koht;
mehn Kedar kan en pil iang kapinga ih!
Tohn kahnimw Sela en ngisingiski ar peren
oh ngihl laud kokoul sang pohn kumwen nahna kan.
12 Irail kan me kin kousoan nin sahpw doh kan,
re en koul kapikapinga KAUN-O!
13 KAUN-O kin ketido pwehn mahwen rasehng sounpei men;
e ketin onopadahr oh kupwur ngoangkilahr en mahwen.
Ruwesen mahwen ngiringirisek sang nan doauese,
e ketin kasalehda sapwellime manaman ong sapwellime imwintihti kan.
Koht ketin Inoukihda me e pahn ketin Sewese Sapwellime Aramas akan
14 Koht ketin mahsanih,
“I nennenlahr ahnsou reirei;
I sohte kin sapeng pekipek en nei aramas akan.
Ahpw met e lelehr ahnsoun ei pahn mwekid;
I ahpw ngihl laudida duwehte lih emen me medek en neitik lelehr.
15 I pahn kauwehla dohl oh nahna kan,
oh I pahn karongehla dihpw oh tuhke kan.
I pahn wiahkihla pillap akan sapwtehn,
oh kamadahda leh kan.
 
16 “I pahn kahluwa nei aramas me maskun kan
nan ahl akan me re sohte mwahn kin keid ie.
I pahn kamarainihada rotorot me re mihmi loale,
oh kainenehla ahl pirek kan me mi mwohrail.
Iei mepwukat me I inoukidahr,
oh I pahn kapwaiada ni soh peikasal.
17 Irail kan me kin koapworopworki dikedik en eni kan,
oh kin wiahkin irail arail koht;
re pahn sarohdi oh namenekla.”
Israel sohte men Rong Padahk en Koht
18 KAUN-O ketin mahsanih,
“Kumwail me salengepon kan, kumwail rong!
Kumwail me maskun kan, kumwail pehdpeseng oh tehk mwahu!
19 Mie emen me maskun mehlel sang ei laduwo,
oh salengepon sang nei meninkedero?
20 Israel, ke kilangehr soahng tohto,
ahpw dahme ke sohte katapankihki?
Mie salengomw mehn rong wasa,
ahpw dahme ke sohte rongki?”
 
21 KAUN-O, iei Koht emen me kin ketin kupwurohki komourpen aramas,
iei me e kin kupwurki irail en wauneki sapwellime kosonned oh padahk kan.
22 Ahpw met sapwellime kan lohdier nan lokolok laud;
re lekdekiongehr nan imweteng kan,
re wie ekiek nan kalapwus kan.
E kulsangehr ar dipwisou kan oh pirapalahr,
sohte emen mie mehn doareirailla.
 
23 Mie emen rehmwail me pahn rong irair wet?
Sang met kohla kumwail pahn rong kanahieng?
24 Ihs me pangala Israel rehn aramas lipirap pwuko?
Pwe pein KAUN-O, me kitail wie dihpiong!
Kitail sohte men kapwaiada kupwure ong kitail,
de sohte men peikiong sapwellime padahk kan!
25 Ihme e kupwuredahki en kapehmkin kitail roson en sapwellime engieng,
oh ketin kalokehkin kitail kalokolok en mahwen.
Sapwellime engieng, rasehng kisiniei, ih me kalullada Israel pwon,
kitail ahpw sohte dehdehki dahme wiewiawi;
kitail sohte alehdi padahkpen irair wet.

42:1: Mad. 3.17; 17.5; Mark 1.11; Luk 3.22; 9.35.

42:1: Mad. 12.18-21.

42:5: Wie. 17.24-25.

42:6: Ais. 49.6; Luk 2.32; Wie. 13.47; 26.23.