38
En Esekaia Luhmwuhmw oh eh Rosonda Sapahl
(2 Nanmwarki kan 20.1-11; 2 Kronikel 32.24-26)
1 Ni ahnsowo Nanmwarki Esekaia ketin luhmwuhmwda oh kereniong sipalla. Soukohp Aiseia, nein Eimwos, ahpw patohla pwe en tuhwong oh patohwanohng, “KAUN-O mahsanihong komwi en ketin koasoanehdi mehkoaros pwehki komwi sohte pahn pwurehng mwahula. Komwi onopada pwe komwi pahn sipalla.”
2 Esekaia eri sohpeila nin dihdo oh loulou, mahsanih, 3 “Maing KAUN, komw ketin tamataman me I kin papah komwi ni loalopwoat oh nan kapehd mehlel, oh I kin songosong ahnsou koaros en kapwaiada kupwuromwi.” E ahpw tentenihr kowahlap.
4 KAUN-O eri mahsanihong Aiseia 5 en pwurala rehn Esekaia oh patohwanohng, “Ngehi, KAUN-O, Koht en omw pahpa kahlap Depit, karongehier omw kapakap oh mahsaniher pilenmesomw; I pahn karairaila omw mour erein sounpar eisek limau. 6 I pahn doarehla kowe oh kahnimw en Serusalem sang nanmwarki lapalap en Asiria, oh I pahn usehla sinsile kahnimwo.”
7 Aiseia ahpw sapengki, “KAUN-O pahn ketikihdo ehu kilel me pahn kasalehda me e pahn ketin kapwaiada sapwellime inou. 8 Ni kehndake me Nanmwarki Ahas ketin wiahda, KAUN-O pahn ketin kupwurehda pwe mweteo en pwurala mwuri ni kahk eisek.” Mweteo eri pwurala mwuri ni kahk eisek.
9 Mwurin Esekaia eh rosonda sang sapwellime luhmwuhmwo, e ahpw ketin ntingihada koulen kaping pwoatet:
10 Ni ahnsou kaperen en ei mour
I kihkihong me I kohkolahng nan wasahn me melahr akan,
solahr momourki mour en samaph wet.
11 I kihkihong me nan sapwen me momour kan
I solahr pahn pwurehng udiahl KAUN-O
de aramas mour men.
12 Ei mour imwiseklahr,
rasehng impwal ehu me kamweremwerdier,
rasehng pelien likou ehu me sisetpesengier.
I kihkihong me Koht me ketin katokedier mouri.
13 Pwohng ehu pwon I kin sengisengki ei medek,
rasehng ma laion emen tehrpesengier tih kat.
I kihkihong me Koht me ketin katokedier mouri.
14 Ngileiet tikitikla oh luwetala,
ngilen pahtou rasehng ngilen mwuroi.
Pwoaren mesei kat tihwohla kilikilengwohng nanleng.
Maing KAUN, komwi ketin kapitiehsang kahpwal pwukat koaros.
15 Dahme I kak patohwan? KAUN-O me ketin wiahda mepwukat.
Mohngiongiet ohlahr, oh I solahr kak meir.
16 Maing Kaun, I pahn momourkin komwi, komwihte me ei mour;
komwi ketin kamwahwihiehla oh mweidohng I en momour.
17 Ei nsensuwed pahn wekideklahng ni popohl.
Komwi ketin doarelahr ei mour sang me keper koaros;
komwi ketin kupwur mahkikihong ie dipei kan koaros.
18 Sohte emen nan wasahn me melahr akan kak en kapinga komwi;
me melahr akan sohte kak koapworopworki sapwellimomwi loalopwoat. Sir. 17.27; Par. 2.17.
19 Iei me momour kan me kin kapinga komwi,
nin duwen ei kapinga komwi met.
Sahm akan kin padahkihong neirail kan duwen omwi loalopwoat.
20 Maing KAUN, komwi ketin kamwahwihielahr.
Se pahn kesengki arp kan oh koulki koulen kapinga komwi,
Se pahn kapinga komwi nan Tehnpas Sarawio erein at mour.n Ire tikitik 21-22 keselahng pahnengin ire tikitik 6
21 Aiseia eri patohwanohng nanmwarkio en ketikihong ni eh mpwos ko wahn pik me pitakatak, e ahpw pahn mwahula. 22 Nanmwarki Esekaia ahpw keinemwe, “Ia kilel me pahn kasalehda me I pahn kak kolahng ni Tehnpas Sarawio?”m Ire tikitik 21-22 keseusang ni imwilahn ire laud wet keseudohng wasaht (tehk 2 Nan. 20.6-9.)
38:18: Sir. 17.27; Par. 2.17.
n38:20: Ire tikitik 21-22 keselahng pahnengin ire tikitik 6
m38:22: Ire tikitik 21-22 keseusang ni imwilahn ire laud wet keseudohng wasaht (tehk 2 Nan. 20.6-9.)