Pohnpeian Bible with Apocrypha SENESIS 29
29
Seikop Lel ni Imwen Lapan
Seikop eri usehla eh seiloaklahng sapwen mehn palimese. Ni eh kohkohla nanialo e ahpw kilangada pwarer ehu nan mohs ehu, oh pelin sihpw siluh me mihmi limwah. Pwe pelin sihpw ko kin nimpilsang ni pwarer wet, oh lapalahn takai ehu kin pwaindi pwarero. Ni pelin sihpw ko koaros ar kin pokonpene wasao, silepe kan kin katapwurehsang takaio pohn pwarero, oh kin kanimpile sihpw kan. Eri mwuhr, re kin kapwurehiong powe.
Seikop eri idek rehrail, “Riei ko, mehnia kei kumwail?”
Irail ahpw sapeng, “Kiht mehn Aran.”
A e idek, “Kumwail ese Lapan nein Nahor?”
A irail sapeng, “Ei, se ese.”
A e pil pwurehng idek, “E me kehlail, de soh?”
Re ahpw sapengki, “Ei, e me kehlail; oh iet Resel nah serepein me kahkahre kohdo nah pelin sihpw.”
Seikop eri nda, “Pwehki wasa eh sousouwasete oh eh saikinte ahnsoun kapokonepene sihpw kan nan kehl, dahme kumwail so kanimpileirail oh kapwureiraillahng nan mohs pwe re en mwengemwenge mahs?”
Irail eri sapeng, nda, “Se sohte kak wia men; pelin sihpw koaros lao pokonpene, se ahpw pahn katapwurehsang takaien pohn pwareren oh kanimpile sihpw akan.”
Nindokon Seikop eh lokolokaiaiong irail, Resel pa lel wasao, kahre nein eh pahpao pelin sihpw; pwe ih me kin apwahpwalih irail. 10 Ahnsou me Seikop kilangada Resel, nein Lapan rien eh nohno, ni eh kahkahre sihpw ko, e kohla ni pwarero oh katapwurehsang takaio powe, e ahpw kanimpile nein Lapan sihpw ko. 11 Ih eri metik Resel oh sengisengki eh peren. 12 E ahpw ndaiong, “Ngehi nein Repeka, oh kisehn omw papaho.”
Resel eri tangala ndahng eh pahpao. 13 Lapan rongadahte duwen Seikop, nein rie serepein Repeka, e mwadangalahte kasamwo, pwoalehdi oh metik; e ahpw kahrehdo ni imweo. Seikop eri koasoiaiong Lapan mehkoaros me wiawiher. 14 Lapan ahpw ndaiong, “Ei, mehlelete, pwe kowe kisehn udukei oh kisehn ntai.” Seikop eri mihmihki reh sounpwong ehu.
Seikop Doadoahkohng Lapan pwehki Resel oh Lia
15 Lapan eri ndahng Seikop, “Mehnda ma kita peneinei ehu, a e sohte konehng ke en doadoahkohng ie ni sohte pweipwei. Ia uwen pweipwei me ke anahne?” 16 Mie nein Lapan nah serepein riemen: me laudo ede Lia, a me tikitiko Resel. 17 Ahpw Lia me ekis kersuwed, a Resel me inenen masamwahu oh paliwaramwahu.
18 Seikop mwahuki mehlel Resel, iei me e ndakihong Lapan, “I pahn doadoahkohng komwi erein sounpar isuh pwe I en pwoudiki Resel.”
19 A Lapan sapeng, ndaiong, “Ei, I mwahuki kihong uhk sang emen tohrohr. Eri, ke pahn mihmihte rehi.” 20 Seikop eri doadoahngki erein sounpar isuh pwehki Resel, a sounpar isuho likamwete rahnte depe pwehki eh nohn poakepoake Resel.
21 Seikop eri ndaiong Lapan, “Eri, komw mweidohngiehla Resel pwe I en pwoudikihda, pwe ahnsou leledohr.” 22 Lapan eri wiahda kamadipw en kapwopwoud ehu oh lukehiong aramas koaros en wasao. 23 A nipwongo, e kawaila Lia wiliandi Resel rehn Seikop; Seikop eri wiahda reh nsenen pwopwoud. 24 (Lapan ahpw kihong Lia emen nah serepein lidu ko, ede Silpa, pwe en papah.) 25 Eri, nimensengo Seikop ahpw diarada me Lia me e wiahda reh nsenen pwopwoud. Ih eri ndahng Lapan, “Dahme ke wiahkihong ie met? I doadoahkohng komwi pwe I en ale Resel. Dahme komw pitihkiniehdi?”
26 Lapan ahpw sapeng, nda, “Iet duwen tiahk en sahpwet, se sohte kin kapwopwoudihala nait serepein tikitik kan mwohn me laud kan. 27 Awih lao wihk ehu dou pohn kasarawihpen kapwopwoud wet, I ahpw pahn kihong uhk Resel, ma ke pahn doadoahkohng ie pil erein sounpar isuh.”
28 Seikop eri pwungkihda, oh mwurin wihk ehu, Lapan ahpw kihong Resel pwe en pwoudikihda. 29 (Lapan ahpw kihong Resel emen nah serepein lidu ko, ede Pila, pwe en kin papah.) 30 Seikop eri pil wiahda nsenen pwopwoud rehn Resel oh e poakepoake laudsang e poakepoake Lia. Ih eri doadoahkohng Lapan pil erein sounpar isuh.
Nein Seikop Seri kei Ipwidi
31 KAUN-O lao ketin mwahngihada me Seikop sohte nohn poakepoake Lia, e ahpw ketin kupwurehla pwe en neitik; a Resel sohte neitik. 32 Lia eri liseianda oh naitikihada pwutak emen. Ih eri patohwan, “KAUN-O ketin kupwurehla ei apwal oh met ei pwoudo pahn poakepoakeiehla.” Ih eri kihong eden pwutako Reupen.g REUPEN: Sisen ahd wet ekis duwehte sisen lepin mahsen en Ipru me wehwehki “kilang, pwutak emen” de “kupwurehla ei apwal.” 33 E pil pwurehng liseianda oh naitikihada pil emen pwutak. Ih eri patohwan, “KAUN-O pil ketikihong ie pwutak menet, pwehki eh karongehda duwen Seikop eh sohte nohn poakepoake ie.” Ih eri kihong ede Simion.h SIMION; Sisen ahd wet ekis duwehte sisen lepin mahsen en Ipru me wehwehki “karongehda.” 34 E ahpw pil pwurehng liseianda oh naitikihada pil emen kisin pwutak. Ih eri patohwan, “Eri, met ei pwoudo pahn patehng ie oh poakohng ie, pwehki ei naitikiadahr pwutak silimen.” Ih eri kihong ede Lipai.i LIPAI: Sises ahd wet ekis duwehte sisen lepin mahsen en Ipru me wehwehki “kapatapene.” 35 E ahpw pil pwurehng liseianda oh naitikihada pil emen pwutak. Ih eri patohwan, “Met, I pahn kapinga KAUN-O.” Ih eri kihong ede Suda.j SUDA: Sisen ahd wet ekis duwehte sisen lepin mahsen en Ipru me wehwehki “kaping.” Eri mwuri, e ahpw sohla neitik.

g29:32: REUPEN: Sisen ahd wet ekis duwehte sisen lepin mahsen en Ipru me wehwehki “kilang, pwutak emen” de “kupwurehla ei apwal.”

h29:33: SIMION; Sisen ahd wet ekis duwehte sisen lepin mahsen en Ipru me wehwehki “karongehda.”

i29:34: LIPAI: Sises ahd wet ekis duwehte sisen lepin mahsen en Ipru me wehwehki “kapatapene.”

j29:35: SUDA: Sisen ahd wet ekis duwehte sisen lepin mahsen en Ipru me wehwehki “kaping.”