21
En Aisek eh Ipwidi
KAUN-O ahpw ketin kupwuramwahwihala Sara, duwen me e ketin inoukidahr, e ahpw liseianda oh wiahiong Eipraam pwutak emen, ni Eipraam eh likeilapalahr. Kisin pwutako ipwidi ahnsou me Koht mahsanih me e pahn ipwidi. Ipru 11.11. Eipraam eri kihong ede Aisek. Ni eh mahkiher rahn 8, Eipraam ahpw sirkumsaisihala nin duwen me Koht ketin mahsanih. Sen. 17.12; Wie. 7.8. Eipraam sounpar 100, ahnsou me Aisek ipwidi. Sara eri patohwan, “Koht ketikihong ie peren oh kouruhr.w KOURUHR: Eden pwutako Aisek, iei lepin mahsen en Ipru me wehwehki “e kin kouruhr.” (Pil tehk 17.17-19.) Koaros me rong met pahn iang ie perenda.” E ahpw pil ketihtihki, “Ihs me kak ndahng Eipraam me Sara pahn kadihdi nah seri kan? Ahpw met I naitikiadahr seri men ong ih ni eh likeilapalahr.”
Serio eri keirda, oh nin rahn me e mweisang dihdi, Eipraam wiahda lapalahn kamadipw ehu.
Akar oh Ismael Pekederla
Rahn ehu, Ismael, nein Akar mehn Isipo ong Eipraam, oh Aisek, nein Sara kisin pwutako, ira wie mwadomwadong. 10 Sara eri kilangirahda oh ndaiong Eipraam, “Kilang, kasarehla lih liduwen oh nah pwutaken. Nein liduwen pwutaken sohte pahn kak iang ahneki mehkot sang omw kepwe kan, pwe nei pwutak, Aisek, me pahn sohsohki.” Kal. 4.29-30. 11 Met kapwunodehda kowahlap Eipraam, pwe Ismael pil uhdahn nah seri. 12 Koht eri ketin mahsanihong, “Ke dehr pwunodki pwutaken oh omw lidu Akar. Kapwaiada mehkoaros me Sara pahn ndawei, pwe kadaudokomw kan me I inoukihonguhkehr pahn tepisang Aisek. Rom 9.7; Ipru 11.18. 13 I pahn pil kangederehla kadaudok en nein liduwen nah pwutaken, pwe re en wiahla wehi laud ehu. Pwe pil noumw pwutaken.”
14 Nin sohrahn en mandahn rahno, Eipraam ahpw kihong Akar eh tungoal kepinwar oh ehden pihl ehu. E ahpw koasoanehdi serio pohn tihnsewen liho oh kadarala. Liho eri mwesel oh kohla sansaruaruseli nan sapwtehn Peersepa. 15 Ni nimara pihlo eh rosalahr, e ahpw kihdiong nah serio pahn tuhke pwoat. 16 Liho ahpw kohla mwohndi iaht 100 dohlahsang wasa serio mihmi ie. Ih eri mengimengloalki, “I sohte kakohng kilang nei seriet eh pahn mehla.” Eri, ni eh mwomwohd wasao, serio tapihada sengiseng.
17 Koht ketin karongehda ngilen serio, oh tohnleng en Kohto men sang nanleng ahpw mahsanihong Akar, “Akar, dahme ke pwunodkidahr? Ke dehr masak. Koht ketin karongeier ngilen noumw serien me wie sengiseng. 18 Uhda oh kohwei, ale oh kansenamwahwihala. I pahn wiahiong kadaudoke kan wehi lapalap ehu.” 19 Koht eri ketin kapehdpeseng pwoaren mese ko, liho eri kilangada pwarer ehu. E ahpw kohla oh idipada ehden pihlo, oh kanimpile nah serio. 20 Koht eri ketin kupwukupwurehte serio nindokon eh kekeirda. E ahpw kin koukousoan nan sapwtehn en Paran oh wiahla soupal en kesik mahn emen. 21 Eh nohno eri kapwopwoudikihda lihen Isip men.
Inou Nanpwungen Eipraam oh Apimelek
22 Ni ahnsowo Apimelek oh Pikol, kaunen sapwellime sounpei kan, ira ketila rehn Eipraam oh mahsanihong, “Koht ketin ieiang komwi ni mehkoaros me komw kin wia. Sen. 26.26. 23 Eri, komw kahukihla mwohn silangin Koht me komw sohte pahn pitihedi, oh pitihdi nei seri kan de kadaudokei kan. Komw inoukihda me komw pahn loalopwoatohng ie oh pil ong sahpwet me komw koukousoan ie, duwen ei loalopwoatohng komwi.”
24 Eipraam ahpw sapengki, “I inoukihda.”
25 Eipraam ahpw kaulimkihong Apimelek duwen pwarer ehu me sapwellimen Apimelek tohndoadoahk ko adihasangehr. 26 Apimelek ahpw mahsanihong, “I sohte ese ihs me wia met. Komw sohte padahkihong ie oh I ahpwtehn rongada duwen irair wet.” 27 Eipraam ahpw patohwanohng Apimelek sihpw kei oh kou kei, ira eri wiahda inou ehu. 28 Eipraam katohrehsang sihmpwul isimen sang nan nah pelin sihpwo. 29 Apimelek ahpw keinemwe reh, “Ia wehwehn met?”
30 Eipraam ahpw sapengki, “Komw pahn ketiki sihmpwul isimen pwukat. Eri, met wehwehki me komw ketin pwungki me ngehi me weirada pwarer wet.” 31 Ih kahrepe wet me wasao adanekihki, Peersepa,x PEERSEPA: Ahd wet ni mahsen en Ipru wehwehki “Pwarer en Inou” de “Pwarer en me Isimeno.” (Pil tehk 26.33.) pwehki ih wasa me ohl riemenet wiahda inou ehu ie.
32 Mwurin ara wiadahr inou wet nan Peersepa, Apimelek oh Pikol ahpw sapahllahng nan Pilisdia. 33 Eipraam eri padokedi tuhke damarisk pwoat nan Peersepa oh kaudokiong KAUN-O, Koht Soutuk. 34 Eipraam eri koukousoan nan Pilisdia ahnsou reirei.

21:2: Ipru 11.11.

21:4: Sen. 17.12; Wie. 7.8.

w21:6: KOURUHR: Eden pwutako Aisek, iei lepin mahsen en Ipru me wehwehki “e kin kouruhr.” (Pil tehk 17.17-19.)

21:10: Kal. 4.29-30.

21:12: Rom 9.7; Ipru 11.18.

21:22: Sen. 26.26.

x21:31: PEERSEPA: Ahd wet ni mahsen en Ipru wehwehki “Pwarer en Inou” de “Pwarer en me Isimeno.” (Pil tehk 26.33.)