8
Koasoandi Wiawihong mehn Suhs Re en Doare Pein Irail
Ni rahnohte Nanmwarki Serksihs ketikihong Ester mehkoaros me en Aman, imwinihti en mehn Suhs kan. Ester patohwanohng nanmwarkio duwen eh peneineiki Mordekai. Mordekai ahpw likwerdohng pahn kupwur. Nanmwarkio ahpw ketikihong Mordekai sapwellime rihngo iangahki sidamp (me e ketikihsangehr Aman). Ester eri patohwanohng Mordekai en kin apwahpwalih mehkoaros me en Aman.
Mwuhr Ester ahpw pwurehng pato pahn kupwur. E poaridi mwowe oh pekipeki sapwellime kupwurkalahngan pwe en katokihedi koasoandi suwed me Aman koasoanediongehr mehn Suhs ako. Nanmwarkio eri kapahla sapwellime reireiso pohn Ester. Ester eri kesihnenda mwohn nanmwarkio oh patohwan, “Ma Wasa Lapalap ketin kupwurki oh ma I me keniken pahn kupwur, a komw koasoanehdi pwe kisinlikou ko me Aman kadarpeseng nan sapwellimomwi wehi en kasohrala; kisinlikou me ketihtihki mehn Suhs koaros me patopato nan wehiet en kamakamala. Ia duwen ei pahn kakohng kilang kamwomwmwomwlahn iengei aramas akan? Ia duwen ei pahn kak momour ma tohn ei wehi pwon pahn sohrala?”
Nanmwarkio eri mahsanihong Ester, “I kalusiamalahr Aman nan pasapaso pwehki koasoandi suwed me e wiahiong mehn Suhs akan; oh kihongkomwier mehkoaros me en Aman. Ma komw sohte itarki met, a komw koasoanehdi ni mwarei oh nin duwen me komw kupwukupwure me konehng oh sidampiheki nei rihnget. Pwe mehkot me koasoansoandier ni mwarei sidampkiher nei rihng sohte kak kasohrala.” Dan. 6.8.
Eri, ni karieisek siluh en rahn ni keieu en sounpwong Nisan, nan sounparohte, sapwellimen nanmwarki sounnting ko ahpw likwerpene pwe kisinlikou kei en wiawihda oh pekederpeseng nan wehio ong mehn Suhs akan, ong kepina kan oh sounapwalih wehi 127 koaros sang India lel Sudan. Kisinlikou ko wiawihda ni mahsen en ehuehu wasa oh ni mahsen en mehn Suhs. 10 Kisinlikou ko pil wiawihda ni mwaren nanmwarki oh sidampki sapwellimen nanmwarki rihngo, re ahpw kihong kisinlikou ko meninkeder kei pwe re en wapeseng nan wehio.
11 Kisinlikou ko ketihtihki me Nanmwarki Serksihs ketin mweidohng mehn Suhs akan en nan kahnimw koaros me re kousoan ie, en kin kapwaiada ar kosonned akan, re ahneki pwung en pein doarehla pein irail. Re ahneki pwung en uhwong ar imwintihti kan nin duwen me re mwahuki. 12 Koasoandi wet pahn tepida manaman nan wehin Persia pwon sang ni kaeisek siluhn rahn en sounpwong Adar, kaeisek riau en sounpwong. h Peuspen Ire Laud 8 mi mwurin Ire Laud E.
Koasoandi en Nanmwarki Doare mehn Suhs akan i Ire Laud E 1-24 duwehte Ire Laud 16.1-24 ni ekei pwuhk me kawehwehdi ni mahsen en wai.
13 [1] Iet audepen kisinlikowo: Rahnmwahu sang Nanmwarki Serksihs ong kepina en wehi 127 sang India lel Sudan, pil ong koaros me loalopwoatohng at tungoal wehi.
14 [2] “Aramas tohto kin aklapalapala ni wahuparail eh kin kohieng irail oh ni ar kin kenikenla. 15 [3] Re kin sehsehla dahme re pahn wia pwehki pai me re kin alehdi, eri, kaidehn sapwellimatail aramas akante me re kin kauwehla, ahpw re pil kin wiahda koasoandi suwed kei en uhwong irail ko me kin kasapwilirailda. 16 [4] Re sohte kin kalahnganki dahme aramas teikan kin wiahiong irail, oh re pil lemeleme me re kak pitsang sapwellimen Koht kadeik, me kin ketin kalahdeki me suwed oh kin mahsanih mehkoaros. Nan ar aklapalap re kin perenki rong kaping en aramas pweipwei, oh dipan akan.
17 [5] “Pak tohto e pil kin wiawi ma kompoakepah men kin likilikiong en ahneki pwukoa laud ehu, e kin ikidki me lapalapasang sapwung ehu me kin pwarada. Re kin ehuong ar kaun akan pwe re en kemehla aramas oh kahrehda apwal ehu me sohte kak en pwurehng kamwahula. 18 [6] Soangen kompoakepah pwukat, ni ar widing oh likamw, kin engimwahukihla kupwurmwahu en ar kaun akan.
19 [7] “Kumwail kak mahsanih karasepen doadoahngki ni sapwung manaman en kaunda wasa, kaidehn sangete nan poadopoad en kawa ko me peusdohng kitail, ahpw soahng pwukat ahpwtehn pweida rehtail.
20 [8] “I koasoakoasoane pwe ahnsou kan me pahn kohdo, aramas koaros nan sapwellimatail wehi en tungoalenki onepek mwahu oh popohl. 21 [9] Met kak wiawi ma kitail wekidala soangen koasoandi kei oh kasawih mwahu oh pahrek soangen mwekid kan me kin pwarada nan wehi.
22 [10] “Ni karasepe, Aman nein Ammedada, mehn Masedonia. Mehn liki men ih me sohte ntahn mehn Persia kis reh, eh mour weksang atail, ahpw I kasamwo, 23 [11] oh e pil paieki ei kesempwalki oh poakohng aramas koaros. Eri, e kesepwilda en wiahla ‘Semen’ wehi oh ale wahu laudsang meteikan, ihte nanmwarkio me e mi pahnangi.
24 [12] “Ahpw eh aklapalap oh lemei sohte irepe, oh e song en kemeiehla oh adihasang ie wehiet. 25 [13] Eri, ni mwekid en widing kei, e ahpw peki Mordekai en kamakamala—Mordekai me doarelahr ei mour ahnsou ehu samwalahr— oh kin kalap utung ie. E pil peki kamakamalahn Ester, atail lih nanmwarki me soh dipe, oh ni mehlel pil kamakamalahn mehn Suhs koaros. 26 [14] Kahrepen eh wia met, pwe kitail en apwalla oh mehn Masedonia kan en kalowehdi wehin Persia pwon. 27 [15] Nan ohl suwed menet eh wiahda koasoandien kamwomwala mehn Suhs, I ahpw diarada me sohte sapwung me aramas pwukat wiahda ong wehi, ahpw re mi pahn kosonned kei me pwung. 28 [16] Re kin pwongih koht ieias, Koht me keieu lapalap oh manaman, me ketin kolokol popohl nan atail tungoal wehi sang ni mwehin atail pahpa kahlap ako lel rahnwet.
29 [17] “Eri, I men kaweidkin kumwail, kumwail dehpa kapwaiada koasoandi me kamanamanlahr nan kisinlikou me Aman kadarpesengier. 30 [18] Ihete me pwukoahki ire wet, oh e kalusiamalahr, iangahki eh peneinei koaros, ni ewen kelen Susa. Koht me kin ketin kakaun mehkoaros, ketikihongehr kalokolok mwadang me konehng eh wiewia kan.
31 [19] “I koasoanehdi kumwail en langahda kisinlikou pwukat mwohn mesen aramas akan. Mweidohng mehn Suhs kan en wiewia arail tiahk, 32 [20] oh utung irail ni ar pahn doare pein irail sang me pahn peiong irail ni rahn me kileldier mehn Suhs en kamakamala, ni kaeisek siluh en sounpwong Adar, me iei sounpwong kaeisek riau. 33 [21] Koht, me kin ketin kakaun mehkoaros, ketin wekidalahr rahnen kamwomwmwomwlao ong ni rahnen peren ong sapwellime aramas pilipil kan.
34 [22] “Kumwail pahn wiahkihla rahnwet ehu rahn kesempwal oh rahnen sarawi ehu. 35 [23] Rahnwet oh rahn me pahn kohdo kan kitail pahn katamanohng kitail oh ong iengetail tohnwehi duwen Koht eh kin ketin apwahpwalih atail wehi, oh irail kan me kin wia koasoandi suwed ong kitail pahn katamandohng kitail sapwellimen Koht kalokolok kan.
36 [24] “Wehi koaros, kahnimw koaros, me sohte pahn kapwaiada koasoandi pwukat pahn kehn engin ei engieng. Wehio de kahnimwo, me sohte pahn kapwaiada, e pahn kamwomwmwomwla nan mahwen oh pahn isihsdiong nanpwel. Sohte mwahn aramas emen pahn pwurehng kohla wasao, pil menpihr oh mahn lawalo kan sohla pahn kohla wasao.
37 [13] “Kumwail langada kisinlikou pwukat mwohn aramas akan nan wehi koaros, pwe mehn Suhs koaros en kak kaukaunop en mahweniong ar imwintihti kan ni rahno eh pahn leledo.”
38 [14] Meninkeder kan ahpw dakehda oahs oh tangahkipeseng sapwellimen nanmwarki kisinlikou ko ni ahnsou karuaru, oh kisinlikou ko pil kasansalda nan Susa.
39 [15] Mordekai mweselsang ni tehnpaso, mi nan likoun nanmwarki reirei, lisoarop poh ntahn mwel, oh elin kapwat kohl. Ni mehn Susa ko ar kilangada, re ahpw perenda, 40 [16] oh mehn Suhs ko pil nsenamwahu oh perperen. 41 [17] Re ahpw pereperen kamakamadipw oh nsenamwahu nan kahnimw koaros oh wehi koaros, wasa me sapwellimen nanmwarki kalohko kasansalda ie. Mehn liki tohto ahpw sirkumsaisla oh wiahla mehn Suhs, pwehki ar masakirailla.

8:8: Dan. 6.8.

h8:12: Peuspen Ire Laud 8 mi mwurin Ire Laud E.

i8:12: Ire Laud E 1-24 duwehte Ire Laud 16.1-24 ni ekei pwuhk me kawehwehdi ni mahsen en wai.