11
Sudas Makapius Kalowehdi Lisias
(Tehk 1 Makapi 4.26-35)
Mwurinte Timoty eh lohdi, Lisias, sounapwalih nanmwarkio oh pil kiseh, oh pil kaunen wehi, ahpw rongada dahme wiawiher. E inenen lingeringerda oh wahda sounpei alu 80,000 iangahki nah sounpein dak oahs koaros oh kohla mahweniong mehn Suhs ni eh medemedewe en wiahkihla kahnimw en Serusalem kahnimw en Krihs ehu. Tehnpas Sarawio pahn pwain daksis duwehte wasahn kaudok en mehn liki kan, oh dewen Samworo Lapalap pahn netila nan sounpar koaros. Lisias inenen perenki uwen tohtohn nah sounpein dak oahs oh sounpei alu, oh elepant weliakan, me kahrehda e sohte mwahn medemedewe manaman en Koht. E mwekidlahng Sudia oh mahweniong kelen mahwen en Pedsur, me mwail rieisek dohsang Serusalem, ni palieir.
Ni Sudas oh nah sounpei ko ar rongada me Lisias koasoakoasoane en mahweniong ar kelen mahwen kan, irail oh aramas koaros sengiseng, re ahpw peki rehn Kaun-o en ketin kadarodo emen tohnleng mwahu pwehn kapitirailla. Sudas Makapius me tepin ale nah tehtehn mahwen kan, ih eri koangngoangehki ienge ko re en dehr perki mehkot de masak mehla, re en iang ih kapitala riarail mehn Suhs ko. Irail eri wiahkinteieu mwekidla. Ni ar saikinte dohsang Serusalem, re pa kilangada mehmen me dak oahs eh tieng mwohrail, e likou pwetepwet oh wa tehtehn mahwen kohl. Irail koaros eri mwadangete kapingkalahnganki ong Koht sapwellime kalahngan, pwehki eh ketin kakehlahda nan kapehdirail kan, kaidehn aramaste me re kak peiong, pwe pil mahn me keieu lawalo oh kommwad de re pil kak dapengpeseng kehl mete kan. 10 Irail eri mwekidla ni irek en mahwen, oh me iang irail iei mehmeno me Koht ketin kadarodo ni kupwurkalahngan pwe en iang irail mahwen. 11 Re ahpw poar pohn imwintihti ko duwehte laion kei: re kemehla sounpei alu 11,000 oh sounpein dak oahs 1,600, oh luhwe ko sopodoaui. 12 Me tohto rehn me sopohla ko re soahn oh neirail tehtehn mahwen kan pwupwsang irail, oh Lisias pil pitla pwehki e sopodoaui duwehte aramas masepwehk men.
13 Lisias kaidehn ohl pweipwei men. Ni eh medemedewe duwen eh sarohkihdi eh lohdi, e wehwehkihda me Koht Lapalahpie me ketin mahwenki mehn Suhs kan, me kahrehda sohte me kak kaloweiraildi. Ih eri kadarala pakair ehu ong mehn Suhs kan, 14 me dene re en kamwahupene, e ahpw inoukihda me e pahn wia uwen eh kak pwe nanmwarki en wiahla kompoakepahrail. 15 Sudas Makapius ahpw medemedewe dahme pahn mwahu ong aramas akan, ih eri pwungkihda en Lisias koasoandio, pwe nanmwarki kupwurelahr pekipek koaros me Sudas ntingihadahr nan kisinlikou oh kadaralahng Lisias.
Nein Lisias Kisinlikou ong mehn Suhs kan
(Tehk 1 Makapi 6.56-61)
16 Iet pelien kisinlikou me Lisias kadaralahng mehn Suhs ko:
“Rahnmwahu sang Lisias ong mehn Suhs koaros. 17 Sohn oh Apsalom, weliapamwail ko, patohwandohr sapwellimamwail kisinlikou en pekipeko, oh ira peki se en kamanahla audepen kisinlikowo. 18 I patohwanohngehr nanmwarki mehkoaros me konehng en mwahngih, oh e kupwurelahr me e pahn ketin wia uwen eh kak. 19 Ma kumwail pahn dadaurete amwail loalopwoat ong wehi, I pahn wia uwen ei kak pwe I en kakehlakahla kamwahupen amwail wehi. 20 I kaweidki weliapamwail ko iangahki weliepei ko re en tuhwong kumwail oh wiekupwurki oaritik en ire pwukat. 21 Popohl ong kumwail. Kisinlikou wet ntingdier ni rahn kerieisek pahieu en sounpwong Dioskorintius, ni pahr 148.i PAHR 148: Sounpar wet pahrekiong pahr 164 mwohn Krais.
Sapwellimen Nanmwarki Kisinlikou ong Lisias
22 Iet sapwellimen nanmwarki pelien kisinlikou kis:
“Rahnmwahu sang Nanmwarki Antaiokus ong Lisias. 23 Eri, pwehki semeio eh ketilahngehr rehn koht akan. I kupwurki nei aramas akan nan ei wehi en wiewia pein ar koasoandi kan oh emen dehr kedirepwe irail. 24 I wehwehki duwen mehn Suhs kan ar sohte men alehda tiahk en mehn Krihs kan, duwen me semeio kupwurki re en wia, re men dadaurete ar tiahk kan oh re pekidahr re en mweimweiong re en momourki pein ar tiahk kan. 25 Eri, pwehki ei kupwurki irail en iang ahneki popohl duwehte wehi teikan nan ei wehi, I koasoanehdi oh kamanahla me arail Tehnpas Sarawio en kapwurupwuriong irail oh re mweimweiong re en momourki tiahk en samarail kahlap ako. 26 Komw kupwurkalahngan kairehkin irail koasoandi wet, oh kadehdehiong irail duwen ei kupwurki ehuong irail, pwe re en wiewia ar koasoandi kan ni popohl, oh dehr pwunodki mehkot.”
27 Iet sapwellimen nanmwarki pelien kisinlikou ong mehn Suhs:
“Rahnmwahu sang Nanmwarki Antiokus ong kaun akan en mehn Suhs, oh ong mehn Suhs koaros. 28 I koapworopworki me kumwail me nsenamwahu. Ngehi I me kehlail oh nsenamwahu. 29 Menelaus patohwanohngieier duwen amwail men pwuralahng nan uhdakamwail oh wiewia pein amwail koasoandi kan. 30 Eri, kumwail kan me pahn pwuralahng nan uhdakamwail mwohn rahn kesilihsek en sounpwong Santikus en wehwehki me sohte mehkot me kumwail pahn perki. 31 Kumwail kak dadaurete kosonned me pid kisin tungoal akan oh pil kosonned teikan, duwen me kumwail kin wia, oh sohte mehn Suhs men pahn kalokolongki dihp ehu me e wiahda ni eh sohte wehwehki. 32 I pahn kadarowei Menelaus pwe en kasohrehla amwail pwunod. 33 Popohl ong kumwail. Kisinlikou kiset ntingdier ni rahn kaeisek limau en sounpwong Santikus, ni pahr 148.j PAHR 148: Sounpar wet pahrekiong pahr 164 mwohn Krais.
Nein mehn Rom Kisinlikou ong mehn Suhs kan
34 Mehn Rom kan pil kadaralahng mehn Suhs kan kisinlikou kiset:
“Rahnmwahu sang Kwintus Memius oh Taitus Manius, wiliepen mehn Rom, ong mehn Suhs kan. 35 Se pwungki oh kamanalahr mehkoaros me Lisias mweidohngkumwailehr. 36 Met se kohkolahng Andiok, eri, kumwail kalahngan tehk mwahu ire kan me Lisias pahn patohwanohng nanmwarkio. Kumwail ahpw kadarodo pasapengpe reht ni ahnsou mwadang pwe se en kak wiliankumwaildi oh tuhkihong nanmwarki. Kumwail kalahngan kadarodo ni ahnsou mwadang, 37 kumwail dehpa pwand, pwe se en esehla dahme amwail koasoandi. 38 Popohl ong kumwail. Kisinlikou kiset ntindier ni rahn kaeisek limau en sounpwong Santikis, ni pahr 148.”

i11:21: PAHR 148: Sounpar wet pahrekiong pahr 164 mwohn Krais.

j11:33: PAHR 148: Sounpar wet pahrekiong pahr 164 mwohn Krais.