Pohnpeian Bible MELKAHKA KAN 20
20
Kapakap en Peki Powehdi w TITLE NI MAHSEN EN IPRU: En Depit melkahka.
KAUN-O en kin sapeng omwi kapakap ni ahnsoun omwi apwal!
Koht en Seikop en kin ketin sinsile komwi.
En ketin kadarodohng komwi sawas sang nan Tehnpese
oh kin ketin sewesei komwi sang pohn Nahna Saion.
En ketikihda omwi meirong kan koaros,
oh kupwurperenki omwi meirong en mahn akan koaros.
En ketikihong komwi dahme komw kin inengieng
oh kupwure pwe omwi koasoandi kan koaros en pweida.
Eri iei duwen atail pahn ngisingiski atail perenkihda omwi powehdi
oh pil kapikapingahki atail Koht.
KAUN-O en ketin kupwurehla omwi pekipek kan koaros.
 
Met I patohwan eseier me KAUN-O ketikihongehr manaman en powehdi ong sapwellime nanmwarki me e ketin piladahro;
e ketin sapeng ih sang nan sapwellime mwoahl sarawien nanleng
oh sang ni sapwellime manaman e kin ketikihong pwe en powehdi nan mahwen tohto.
Ekei kin likihala wararail werennansapw en mahwen kan,
ekei dakeparail oahs akan,
ahpw kitail kin likih manaman en KAUN-O atail Koht.
Soangen aramas pwukat pahn dipekelekel oh pwupwudi,
ahpw kitail pahn uhda oh uh tengeteng.
 
Maing KAUN, komw ketikihong at nanmwarki en powehdi;
komw ketin sapeng kiht ni at kin patohwan likweriong komwi.

w^ TITLE NI MAHSEN EN IPRU: En Depit melkahka.