18
En Depit eh Koulen Powehdi s TITLE NI MAHSEN EN IPRU: Lepin lokaia pwukat me Depit, ladun KAUN-O, koulkihong KAUN-O ni rahn me KAUN-O ketin kapitala ih sang rehn Sohl oh pil sang rehn eh imwintihti teikan.
(2 Samuel 22.1-51)
Maing KAUN, ia uwen ei poakohng komwi!
Komwi me soundoarepei.
 
KAUN-O me silepei;
ih me kelepei kehlail.
Ei Koht me silepei,
I kin nekinek mwahu pahn kupwure.
E kin ketin pereiehla duwehte mehnsansar ehu;
e kin ketin doareiehla oh kin ketin nekinekid ie.
I kin likweriong KAUN-O,
e ahpw kin ketin doareiesang ei imwintihti kan.
Kapinga KAUN-O!
 
Keper en mehla kapiliepenehr;
iloak en meninkauwo koaduhpwalihiedier.
Keper en mehla lelieier,
oh sousou lidipiedier.
Nan ei apwal I ahpw likweriong KAUN-O;
I likwerih ei Koht pwe en ketin sewese ie.
E ahpw ketin karonge ngilei nan tehnpese;
e karongeier ei likwer en pek sawas.
 
Sampah eri rerada oh itikekda;
poahsoan en nahna kan ahpw mwekidida oh rerada,
pwehki Koht ketin engiengdahr.
Ediniei kusieisang nan sapwellime keinuhnu,
mpwulen kisiniei oh mwoalus sang nan doauase.
E ketin ritingada pahnlahng oh ketidihdo
ket pohn depwek toantoal ehu.
10 E ketin pihrdi ket pohn sapwellime kerup t KERUP: Tehk nan kawehwehpen lepin mahsen kan. kei,
e ketin pihrki pehnpihr en kisinieng.
11 E ketin perehkihla pein ih rotorot;
depwek mosul kei, me diren pihl, kapilpene ih.
12 Keteu aihs takai u KETEU AIHS TAKAI: Tehk nan kawehwehpen lepin mahsen kan. oh kisiniei
kin mweremwerasang ni lioal me kin piripir mwowe
oh kin pwar depwek toantoal kan.
 
13 KAUN-O eri ketin kapitie laudida rasehng ngirisek en nahnsapwe sang pahnlahng;
kapitien Wasa Lapalahpie ahpw sansalada.
14 E ahpw ketin kadar sapwellime arep ko oh katangapeseng sapwellime imwintihti ko;
e ahpw ketin pwakihkinirailla piripir en sapwellime lioal.
15 Nan kepin madau sansalada,
oh poahsoan en sampah kan iang pwarada,
Maing KAUN, ni omwi ketin angiangihada sapwellimomwi imwintihti kan
oh kapitie laudida nan omwi engieng.
 
16 KAUN-O ahpw ketin kapadihdo lime sang nanleng oh ketin koliehda;
oh ketin waikiehda sang nan kepin madau.
17 E ketin kepitiesang ei imwintihti kehlail kan,
oh sang irail koaros me kin kailongkin ie—
re me nohn kehlail sang ie.
18 Re mahweniong ie ni ahnsou me I mihla nan apwal,
ahpw KAUN-O ketin sileiehdi.
19 E ketin seweseiehda nan ei apwal;
e ketin doareiehla pwehki eh kupwurperenkin ie.
 
20 KAUN-O ketin katingih ie pwehki ei kin wia dahme pwung;
e kin kupwuramwahwih ie pwehki eh sohte dipei.
21 I peikiong kosonned en KAUN-O;
I sohte sohpeisang ei Koht.
22 I kapwaiada sapwellime kosonned kan koaros;
I sohte kauwehla sapwellime mahsen kan.
23 E mwahngih duwen ei mwakelekel,
duwen ei kin kadohwansang ie wiewia sapwung kan.
24 Iei me e ketin katingih kin ie pwehki ei kin wia dahme pwung,
pwe e ketin mwahngih duwen eh sohte dipei.
 
25 Maing KAUN, komw kin ketin loalopwoatohng irail kan me kin loalopwoatohng komwi;
komw kin ketin kupwur mwahu ong irail kan me kin mwahu.
26 Komw kin kupwur mwakelekel ong irail kan me kin mwakelekel,
ahpw kin kupwur toutou ong me suwed kan.
27 Komw kin ketin doarehla me aktikitik kan,
oh kin ketin katikitikihala me aklapalap akan.
 
28 Maing KAUN, komw ketikihong ie marain;
komw ketin kasarehsang ei rotorot.
29 Komw ketin kakehleiehda pwe I en mahweniong ei imwintihti kan
oh ketikihong ie manaman pwe I en kak powehdi arail kelen mahwen kan.
 
30 Koht menet—ia uwen deilahn wiepen nin lime kan!
Ia uwen likilik en sapwellime mahsen kan!
E rasehng mehnsansar ehu
ong irail kan me kin rapahki sileparail reh.
31 KAUN-O kelehpw me Koht;
Koht kelehpw me soundoarepatail.
32 Ih Kohto me kin ketin kakehlaiehda,
me kin sinsile elei kan sang apwal akan.
33 E ketikihong ie nehi kat en marahra duwehte tie;
e kin ketin sinsile ie pohn nahna kan. Apak. 3.19.
34 E ketin kaiahneiedahng ni mahwen,
pwe I en kak doadoahngki kesik ketieu me keieu kehlail.
 
35 Maing KAUN, komw kin ketin sinsile ie oh doandoare ie;
sapwellimomwi sawas me kalinganeiehla,
oh sapwellimomwi manaman me sinsile ie mwahu.
36 Komwi me ketin sileiehdi pwe I en dehr lohdi,
oh I sohte mwahn pwupwudi.
37 I patohwan pwakihier ei imwintihti kan oh koliraildi;
I sohte kin tokedi I lao kamwomwirailla.
38 I keseiraildi, re ahpw sohla kak uhda;
re wonohnehr nanpwel mwohn meseiet.
39 Komwi me ketin kakehleiehda pwe I en kak mahwen
oh ketikihong ie I en powehdi ei imwintihti kan.
40 Komwi me ketin kupwurehda ei imwintihti kan pwe re en kin tangasang ie;
I kamwomwala irail kan me kin kailongkin ie.
41 Re kin likwerih sawaseparail, ahpw sohte emen me kin doareirailla;
re kin likweriong KAUN-O, ahpw e sohte kin ketin sapeng irail.
42 I tiakirailpeseng, re ahpw duwehla pwelpar
me kisinieng kin ipirpeseng.
I kin sok pohrail rasehng ei kin sok nan pwelmatak en nanial akan.
 
43 Komw ketin doareiesang nei aramas kahngohdi kan
oh ketin kupwureiehla pwe I en wiahla kaunen wehi kan;
aramas ekei me I sohte ese, met wialahr ei ladu.
44 Mehn liki kan kin poaridi mwohi;
ni ar kin rong ngilei, re kin peikiong.
45 Re kin nan kapehd tikitikla
oh rerrer kohieisang nan arail kelen mahwen kan.
 
46 KAUN-O ketin ieias! Kaping ong ei soundoar!
Kumwail lohkiseli roson en Koht me ketin doareielahr.
47 Ih me ketin kupwurehda I en powehdi ei imwintihti kan;
ih me ketin kalowediong wehi kan pahn ei manaman
48 oh ketin doareiesang ei imwintihti kan.
 
Maing KAUN, komw me kin ketin kupwure ie pwe I en powehdi ei imwintihti kan,
oh ketin silehsang ie aramas lemei kan.
49 I pahn kapinga komwi nanpwungen wehi kan;
I pahn kokoulkihong komwi koulen kaping. Rom 15.9.
 
50 Koht ketikihong sapwellime nanmwarkio en kin powehdi;
e ketin kasalehda sapwellime limpoak poatopoat ong me e ketin piladahro,
ong Depit oh kadaudoke kan kohkohlahte.

s^ TITLE NI MAHSEN EN IPRU: Lepin lokaia pwukat me Depit, ladun KAUN-O, koulkihong KAUN-O ni rahn me KAUN-O ketin kapitala ih sang rehn Sohl oh pil sang rehn eh imwintihti teikan.

t18:10: KERUP: Tehk nan kawehwehpen lepin mahsen kan.

u18:12: KETEU AIHS TAKAI: Tehk nan kawehwehpen lepin mahsen kan.

18:33: Apak. 3.19.

18:49: Rom 15.9.