Pohnpeian Bible MELKAHKA KAN 16
16
Kapakap en Koapworopwor q TITLE NI MAHSEN EN IPRU: En Depit melkahka.
Maing Koht, komw ketin sinsile ie, pwe komwihte me I kin koapworopworki.
I kin patohwanohng KAUN-O, “Komwi me ei Kaun;
soahng mwahu koaros me mie rehi kin pwilidohsang rehmwi.”
 
Ia uwen mwahu en sapwellimen KAUN-O aramas loalopwoat kan!
I kin perenki mehlel ieiang irail.
 
Irail kan me kin pwahtiet idihdawehn koht teikan,
re kin katohtowehla ar apwal akan.
I sohte pahn iang irail nan arail meirong kan;
I sohte pahn iang kaudokiong ar koht kan.
 
Maing KAUN, komwihte kelehpw me I ahneki,
oh komwi kin ketikihong ie mehkoaros me I kin anahne;
oh komwi me kin ketin kolokol ei mour.
Meid kapwuriamwei sapwellimomwi kisakis kan ong ie,
ia uwen ar mwahu!
 
I kin patohwan kapinga KAUN-O, pwehki eh kin ketin kaweid ie,
oh ei pepehm pil kin katamankin ie nipwong.
I kin aririh KAUN-O ahnsou koaros;
e kin ketiket limwahi, oh sohte mehkot kak kauweiehla. Wie. 2.25-28.
 
Ihme kahrehda I kin diren kaping oh peren
oh I kin pehm saledek sang apwal,
10 pwe komw kin ketin sinsile ie sang manaman en mehla.
I kin loalopwoat ni ei kin papah komwi,
oh komwi sohte pahn ketin likidmelieiehla nan sapwen me melahr akan. Wie. 13.35.
 
11 Komw pahn ketin kasalehiong ie ahl me kin kowohng mour;
omwi kin ketiket rehi kin kadirekiniehla peren
oh kahrehiong ie peren poatopoat.

q^ TITLE NI MAHSEN EN IPRU: En Depit melkahka.

16:8: Wie. 2.25-28.

16:10: Wie. 13.35.