5
Kapahrek en Pohn Dohl
Ni Sises eh mahsanihada pokono, e ahpw ketidahla pohn dohl ehu oh ketidiong powe; a sapwellime tohnpadahk ko ahpw keiong mpe. Ih eri tapihada padahki irail, mahsanih:
Pai mehlel
(Pil tehk Luk 6.20-23)
“Meid pai me koapworopworki Koht ni mehkoaros;
pwe iei arail wehi, Wehin Koht!
“Meid pai me kin mwahiei;
pwe Koht pahn ketin kaloalamwawihirailla! Ais. 61.2.
“Meid pai me nan kapehd opampap akan;
pwe re pahn ale dahme Koht ketin inoukihong irail! Mel. 37.11.
“Meid pai me kin ngoangki kapwaiada kupwur en Koht;
pwe Koht pahn ketin kaitarirailla! Ais. 55.1-2; Sir. 24.21.
“Meid pai me kin kalahngan ong meteikan;
pwe re pahn diar kalahngan rehn Koht!
“Meid pai me nan kapehd mwakelekel kan;
pwe re pahn udiahl Koht! Mel. 24.3-4.
“Meid pai me kin wia doadoahk en kamwahu nanpwungen aramas akan;
pwe Koht pahn ketin wiahkinirailla uhdahn sapwellime!
10 “Meid pai me kin ale lokolok pwehki ar kapwaiada kupwur en Koht;
pwe iei arail wehi, Wehin Koht! 1 Pit. 3.14.
11 “Meid pai kumwail ma aramas akan pahn lahlahwei kumwail oh kalokei kumwail oh karaunkin kumwail soangen suwed oh likamw koaros pwehki ngehi. 1 Pit. 4.14. 12 Kumwail nsenamwahu oh perenda, pwe ketingpamwail me laud kowahlap nanleng. Ih duwen ar kaloke soukohp ako me tiengehr mwohmwail.” 2 Kron. 36.16; Sir. 2.8; Wie. 7.52.
Soahl oh Kamarainpen Sampah
(Pil tehk Mark 9.50; Luk 14.34-35)
13 “Kumwail me soahlepen sampah. Eri, ma nemenemen soahl pahn sarasang, sohte mehkot kitail pahn wiahiong pwe nemenemen soahlo en pwurehng miehla. Solahr katepen soahlo, ihte me pahn mwahuwong, en lekdekla wasa me aramas akan pahn tiakpeseng ie. Mark 9.50; Luk 14.34-35.
14 Kumwail me kamarainpen sampah. Kahnimw ehu me mi pohn dohl ehu sohte kak rirla. Sohn 8.12; 9.5. 15 Aramas pil sohte kin isikada lamp oh kihdiong pahn kohpwa, pwe pohn dewe pwe en kamarainihada koaros me mi nan ihmwo. Mark 4.21; Luk 8.16; 11.33. 16 Ih pil duwen kumwail, amwail marain en sansal mwohn aramas akan pwe re en kilang amwail wiewia mwahu kan oh kapikapingahki Samamwail me ketiket nanleng.” 1 Pit. 2.12.
Duwen Kosonned en Moses oh Padahk en Soukohp ako
17 “Kumwail dehr lemeleme me I kodohng kasohrehla Kosonned en Moses oh padahk en soukohp ako. Soh! I sohte kodohng kasohrehla, pwe I kodohng kapwaiada arail padahk ni mehlel. 18 Pwe I men kumwail en ese pwe lahng oh sampah lao pahn sohrala, sohte ire pisetik ehu en Kosonnedo pahn sohrala, soahng koaros lao pahn imwisekla. Luk 16.17. 19 Eri, mehmen me pahn kauwehla kosonned ehu, mehnda ma me keieu tikitik, oh pil pahn padahkihong aramas teikan en kauwehla, nahn e pahn keieu tikitik nan Wehi Koht. A mehmen me pahn kapwaiada audepen Kosonnedo oh pahn padahkihong aramas teikan en kapwaiada, ih me pahn lapalap nan Wehin Koht. 20 Eri, I men kumwail en ese, pwe ma amwail mour sohte pahn mwahusang en sounkawehwehn Kosonnedo oh en Parisi kan ar mour, kumwail sohte pahn kak towehda Wehin Koht.”
Padahk duwen Lingeringer
21 “Kumwail rongehr padahk me kohieng mehn mahs ako: ‘Dehr kemehla aramas; a mehmen me pahn kemehla aramas, e pahn ale kadeikpe.’ Eks. 20.13; Deud. 5.17. 22 A ngehi I ndaiong kumwail met: mehmen me pahn lingeringer pahn rie mehn Suhs men, e pahn wisikiong ni mwoalen kopwung; oh mehmen me pahn ndahng emen rie mehn Suhs me e iahk, e pahn wisikiong ni Mwoalen Kopwung Lapalap; oh mehmen me pahn ndaiong emen rie mehn Suhs eh mwalaun suwed, e pahn konehng ale kalokolok en kisiniei nan ehl. 23 Eri, ni omw pahn wiahiong Koht omw meirong pohn pei sarawi ehu, ke ahpw tamanda me riomw mehn Suhs men nsensuwed pahmw, 24 pwilikihdi mahs omw meirongo mwohn pei sarawio, ke ahpw kohwei oh kapwungala nanpwungamwa; mwuri, ke ahpw pwurodo wia omw meirong ong Koht.
25 “Ma mehmen men lelekin uhk ni mwoalen kopwung, kadeke oh kapwungala mahs nanpwungamwa; pwe e dehr panguhkala rehn sounkopwung, a sounkopwung uhd panguhkala rehn pilismen kan, ke ahpw selidiong nan imweteng. 26 Mehlel I ndaiong uhk, me ke sohte pahn pitla, ke lao kapwungala pweipwand koaros me kileldier.”
Padahk duwen Kamwahl
27 “Kumwail rongehr padahk pwoatet: ‘Ke dehr kamwahl.’ 28 A ngehi I ndaiong kumwail met: mehmen me pahn kilikilang lih emen oh men dihpki, nahn e wiadahr dipen kamwahl nan kapehde. Eks. 20.14; Deud. 5.18. 29 Eri, ma palimaun en pwoaren mesomwen pahn kahrehiong uhk nan dihp, pwadikasang oh kesehweisang uhk, pwe e mwahuwong uhk kisehn paliwaromwen en lekdekla sang eh pwonte kolahng nan ehl. Mad. 18.9; Mark 9.47. 30 Oh ma palimaun en pehmwen pahn kahrehiong uhk nan dihp, lupukasang oh kesehweisang uhk; pwe e mwahuwong uhk kisehn paliwaromwen en lekdekla sang eh pwonte kolahng nan ehl.” Mad. 18.8; Mark 9.43.
Padahk duwen emen eh pahn Mweisang eh Pwoud
(Pil tehk Mad. 19.9; Mark 10.11-12; Luk 16.18)
31 “Kumwail pil rongehr padahk pwoatet: ‘Mehmen me pahn kesehla eh pwoud, e uhdahn pahn kihong liho kisinlikoun kamweid.’ Deud. 24.1-4; Mad. 19.7; Mark 10.4. 32 A ngehi I ndaiong kumwail met: mehmen me kesehla eh pwoud ni kahrepe ieu me kaidehkin kamwahl, eri, ohlo kahrehiongehr liho nan kamwahl ma liho pahn pwopwoudida sapahl. A mehmen me pwoudikihda lih emen me mweisangehr eh pwoud, e pil wiadahr dipen kamwahl.” Mad. 19.9; Mark 10.11-12; Luk 16.18; 1 Kor. 7.10-11.
Padahk duwen Kahula
33 “Kumwail pil rongehr padahk wet me kohiengehr mehn mahs ako: ‘Ke dehr kauwehla omw inou ong Koht, a kapwaiada dahme ke kahukihla me ke pahn wiahda mwohn silangin Koht.’ Lip. 19.12; b Nempe 30.2; Deud. 23.21. 34 A ngehi I ndaiong kumwail: kumwail dehr mwahn kahula nan amwail inou kan. Kumwail dehr kahukihla nanleng, pwe nanleng iei mwoalen Koht; Seims 5.12; b Ais. 66.1; Mad. 23.22. 35 kumwail dehr kahukihla sampah, pwe sampah iei wasahn kommoalepen aluweluwe kan; pil dehr kahukihla Serusalem, pwehki Serusalem ih me poahsoan kaunen Nanmwarki Lapalap. Ais. 66.1; b Mel. 48.2. 36 Pil dehr kahukihla moangamwail kan, pwe sohte mehkot kumwail kak wiahda pwe pitenmoangamwail en pwetepwetala de toantoalla. 37 Amwail koasoi kan en kin ndahte, ‘Ei’ de ‘Soh.’ Pwe me kin daulihala met, e kin tepisang rehn Me Suwedo.”
Padahk duwen Akdupuk Suwed
(Pil tehk Luk 6.29-30)
38 “Kumwail rongehr padahk wet me kohieng mehn mahs ako: ‘Pwoaren mas ehu pahn pwainla pwoaren mas ehu, oh ngih pwoat pil pahn pwainla ngih pwoat.’ Eks. 21.24; Lip. 24.20; Deud. 19.21. 39 A ngehi I ndaiong kumwail met: kumwail dehr dupungki me suwed ong emen me wia suwed ong kumwail. Ma mehmen pahn pohr uhk ni palimaun en likin sepomw, a kihong pali teio pwe en pil pohr. 40 Oh ma mehmen men lelekin uhk ni mwoalen kopwung pwe en adihasang omw sehten, a pil mweidohng omw sekiden. 41 A ma sounpei en liki men pahn itonehng uhk ke en wa eh koaruk mwail ehu, iangala mwail riau. 42 Ma mehmen pahn peki rehmw mehkot, mweidohng. Ma mehmen pahn peki rehmw mehkot pwe en kapwuredohng uhk mwuhr, pil mweidohng.”
Padahk duwen Limpoak ong Atail Imwintihti kan
(Pil tehk Luk 6.27-28, 32-36)
43 “Kumwail pil rongehr padahk pwoatet: ‘Ke en poakohng mehn mpomw kan, a kailongki omw imwintihti kan.’ Sir. 12.4-7. 44 A ngehi I ndaiong kumwail met: kumwail poakohng amwail imwintihti kan oh kapakapki me kin kalokei kumwail, 45 pwe kumwail en wiahla sapwellimen Sahm me ketiket nanleng, me kin ketin dakerki sapwellime ketipin pohn me suwed oh me mwahu kan, oh kin ketin kamwerehdi keteu pohn me lelepek kan oh me dipan akan. Sir. 4.10. 46 Eri, keting dah me kumwail pahn kasikasik sang rehn Koht, ma kumwail pahn poakohngete irail kan me poakohng kumwail? Pwe sounrik daksis kan pil kin wia soahng wet! 47 Oh ma ihte kompoakepahmwail kan me kumwail pahn kin rahnmwahwih, eri, kumwail sohte siksang meteikan, pwe mehn liki kan pil kin wia soahng wet. 48 Eri, mourimwail en unsekla—duwehte ieias unsek en Samamwail me ketiket nanleng.” Lip. 19.2; Deud. 18.13.

5:4: Ais. 61.2.

5:5: Mel. 37.11.

5:6: Ais. 55.1-2; Sir. 24.21.

5:8: Mel. 24.3-4.

5:10: 1 Pit. 3.14.

5:11: 1 Pit. 4.14.

5:12: 2 Kron. 36.16; Sir. 2.8; Wie. 7.52.

5:13: Mark 9.50; Luk 14.34-35.

5:14: Sohn 8.12; 9.5.

5:15: Mark 4.21; Luk 8.16; 11.33.

5:16: 1 Pit. 2.12.

5:18: Luk 16.17.

5:21: Eks. 20.13; Deud. 5.17.

5:28: Eks. 20.14; Deud. 5.18.

5:29: Mad. 18.9; Mark 9.47.

5:30: Mad. 18.8; Mark 9.43.

5:31: Deud. 24.1-4; Mad. 19.7; Mark 10.4.

5:32: Mad. 19.9; Mark 10.11-12; Luk 16.18; 1 Kor. 7.10-11.

5:33: Lip. 19.12; b Nempe 30.2; Deud. 23.21.

5:34: Seims 5.12; b Ais. 66.1; Mad. 23.22.

5:35: Ais. 66.1; b Mel. 48.2.

5:38: Eks. 21.24; Lip. 24.20; Deud. 19.21.

5:43: Sir. 12.4-7.

5:45: Sir. 4.10.

5:48: Lip. 19.2; Deud. 18.13.