4
En Sises eh ketin Songosong pahn Tepil
(Pil tehk Mark1.12-13; Luk 4.1-13)
Kedekedeo, Ngehn Sarawi ahpw kahluwalahng Sises nan sapwtehn pwe en ketin songosong pahn Tepil. Ipru 2.18; 4.15. E lao ketin kaisihsol rahn 40 oh pwohng 40, e ahpw pwungitikla. Tepil eri keiong mpe oh patohwanohng, “Ma sapwellimen Kohto komwi, a komw mahsanih pwe takai pwukat en wiahla pilawa.”
A Sises ketin sapeng, mahsanih, “E ntingdier nan Pwuhk Sarawi, ‘Kaidehkin pilawahte me aramas kak mourki, pwe mahsen koaros me kin pwilipwilsang nin doauesen Koht.’ ” Deud. 8.3.
Tepil ahpw kahluwalahng Sises nan Serusalem, Kahnimw Sarawio, oh pwilikihdi pohn kengkeng en Tehnpas Sarawio; e ahpw patohwan, “Ma sapwellimen Kohto komwi, a komw lusdihwei, pwe e ntingdier nan Pwuhk Sarawi,
‘Koht pahn ketin mahsanihong sapwellime tohnleng kan duwen komwi;
re ahpw pahn kolekinkomwihda pehrail kan,
pwe ke dehr dipekelekel ni takai kan.’ ” Mel. 91.11-12.
Sises ketin sapeng, mahsanih “E pil ntingdier nan Pwuhk Sarawi, ‘Ke dehr kasongosonge Kaun-o, omw Koht.’ ” Deud. 6.16.
Tepil eri pil kahluwadahla Sises pohn nahna ileile ehu oh kasalehiong wehi koaros en sampah oh duwen ar lingan. E ahpw patohwan, “Mepwukat koaros I pahn kihong komwi, ma komw pahn poaridi oh pwongih ie.”
10 A Sises ketin sapeng, “Sehdan, kohkohweisang ie! Pwe e ntingdier, ‘Ke pahn pwongih Kaun-o, omw Koht, oh ihete me ke pahn papah.’ ” Deud. 6.13.
11 Tepil eri kohkohlahsang Sises; a tohnleng kei ahpw pwarodo oh sewese.
Sises ketin Tapihada sapwellime Doadoahk nan Kalili
(Pil tehk Mk 1.14-15; Luk 4.14-15)
12 Sises lao mwahngihada me Sohn wisikdohngehr nan imweteng, e ahpw sipallahng Kalili. Mad. 14.3; Mark 6.17; Luk 3.19-20. 13 Sises ahpw sohte ketin kousoan nan Nasaret, pwe e ketila oh kin ketiket Kapernaum, kahnimw ehu me mi ni oaroahr en Lehen Kalili, limwahn irepen Sepulon oh Napdali. Sohn 2.12. 14 Met wiawiher pwe en pweida me soukohp Aiseia kohpadahr, ni eh mahsanih,
15 “Sapwen Sepulon, sapwen Napdali,
ni elen kolahng sehdo, palio Sordan,
Kalili, sapwen mehn liki kan! Ais. 9.1-2.
16 Aramas me kin mihmi nan rotorot,
re pahn kilangada marain lapalap ehu!
Maraino pahn daker irail akan
me kin mihmi nan rotorot en mehla.”
17 Sang ni ahnsowo me Sises ketin tapihada kapahrengkiseli sapwellime padahk, mahsanih, “Kumwail koluhla oh wiliakapwala! Pwe Wehin Koht kerendohr!” Mad. 3.2.
Sises ketin Malipe Soused Pahmen
(Pil tehk Mark 1.16-20; Luk 5.1-11)
18 Rahn ehu Sises ketiket kohla pohn oaroahr en Lehen Kalili, e ahpw ketin mahsanihada soused riemen, pirien ehu, Saimon (me adaneki Piter) oh rie me adaneki Andru; ira lalaidki ara uhk nan leho. 19 Sises eri mahsanihong ira, “Kumwa kohdo iangiehla. I ahpw pahn padahkihong kumwa duwen laidih aramas akan.” 20 Ni ahnsowohte ira pwilikihdi ara uhk ko oh iangala Sises.
21 Ni eh ketin douluhlsang wasao, e ahpw pil mahsanihada pil ehu pirien Seims oh Sohn, nein Sepedi pwutak riemen. Ira iang ara pahpao mihmi pohn wararail pwoht pwoat, onohne arail uhk kei. Sises eri ketin malipe ira. 22 Ni ahnsowohte ira mehndahkihla samarao oh wararail pwohto, ira ahpw iangala Sises.
Sises ketin Padahk, oh Kapahrek, oh Kamwahwihala Soumwahu tohto
(Pil tehk Luk 6.17-19)
23 Sises eri ketin kakahnseli nan Kalili pwon, kawekawehweseli nan sinakoke b SINAKOKE: Soangen ihmw ehu me mehn Suhs kan kin wiahki imwen kapakap de wiekupwur de wia padahk ie. kan en mehn Suhs akan, kapakapahrengki Rongamwahu en Wehin Koht, oh kamwakamwahwihala soangen soumwahu oh luwet koaros rehn aramas akan. Mad. 9.35; Mark 1.39. 24 Eri, mware ahpw ndandkihla wasa koaros nan Siria, me kahrehda aramas koaros me soumwahuki soangen soumwahu kan oh soangen apwal akan, duwehte aramas me ngehn suwed tiadahr powe, me sahliel kan, me mwoator kan, koaros kin wisikpene reh - Sises ahpw kin ketin kakehlairailda. 25 Lapalahn pokon ahpw kin idihdawehnseli sang Kalili, sang Kahnimw Eisek ko, sang Serusalem oh Sudia, oh pil sang wehi kan me mi palio Sordan.

4:1: Ipru 2.18; 4.15.

4:4: Deud. 8.3.

4:6: Mel. 91.11-12.

4:7: Deud. 6.16.

4:10: Deud. 6.13.

4:12: Mad. 14.3; Mark 6.17; Luk 3.19-20.

4:13: Sohn 2.12.

4:15: Ais. 9.1-2.

4:17: Mad. 3.2.

b4:23: SINAKOKE: Soangen ihmw ehu me mehn Suhs kan kin wiahki imwen kapakap de wiekupwur de wia padahk ie.

4:23: Mad. 9.35; Mark 1.39.