Pohnpeian Bible Lip. 1
LIPAI
Oaralap en Pwuhk wet
Pwuhken Lipai audaudki kosonned akan me pid en mehn Lipai kan doadoahk en samworo. Samworo pwukat kin pwukoahki epwelpen kaudok en mehn Israel en kawa ko, oh arail tiahk sarawi kan.
Ire me keieu kesempwpal nan pwuhk wet, iei duwen Koht eh sarawihe, oh pil duwen wiepen tiahk sarawi kan me sapwellime aramams akan en idawehn ni ar kaudok oh ni ar wiewia, pwe re en kin momour nin duwen sapwellimen “Koht sarawien Israel.”
Eri, lepin mahsen me keieu kesempwal oh dehde nan pwuhk wet, iei me mi nan ire laud 19, ire tikititk 18, me Sises ketin kahdaneki keriaun kosonned me lapalap: “Ke en poakohng mehn mpomw duwehte omw kin poakohng pein uhk.”
Audepe ni Oaralap
Duwen kosonned akan me pid kisakis oh meirong 1.1—7.38
Kesepwildahn Aaron oh nah pwukat ko ong ni doadoahk en samworo 8.1—10.20
Duwen kosonned akan me pid mwakelekel oh samin ong kaudok 11.1—15.33
Rahnen Tomw 16.1-34
Duwen kosonned akan mehn sewese kadakadaur mour sarawi oh kaudok sarawi 17.1—27.34
1
Duwen Meirong Isihs kan
KAUN-O ketin malipe Moses sang nan Impwal me KAUN-O kin ketiket loale oh ketikihong kosonned pwukat pwe en patohwanohng mehn Israel kan en kapwaiada ni ar pahn kin wia arail meirong.
Ni emen eh pahn meirongki mahn emen, e kak kihsang nin nah kou de sihpw de kuht kan. Ma eh meirong pahn mihmi ni meirong isihs en kou, mahno pahn kouwol emen, me sohte kisin samin kis reh. E pahn kahrehdo mahno ni wenihmwen Impwal me KAUN-O kin ketiket loale, pwe KAUN-O en ketin kupwurperenki. Aramaso ahpw pahn kidahng peh pohn moangen mahno, pwehn wiahla eh meirong en tomwki dipe kan. E pahn kemehla kouo wasao, oh samworo kan me kadaudok en Aaron, pahn patohwandahng KAUN-O nta, a mwuhr re pahn usupihki ni keile pahieu koaros en pei sarawio me mihte ni wenihmwen Impwalo. Mwuhr e ahpw pahn kihsang kilin mahno oh sepepene uduke. Eri, samworo kan pahn koasoanehdi tuwi pohn pei sarawio oh isikada. Re pahn kihong uduk me sapidier ko pohn kisinieio, iangahki moange oh wihe ko. Aramaso pahn kamwakelehda kepwehn mahno oh neh kan; eri samworo ahpw pahn isikala meirongo pwon pohn pei sarawio. Pwohn meirong en konot wet kin kaparanda kupwur en KAUN-O.
10 Ma aramas emen pahn meirongki sihpw men de kuht men, mahno pahn mahn wol emen me sohte kisin samin kis reh. 11 E pahn kemehla ni paliepeng en pei sarawio, oh samworo kan ahpw pahn usupihki nta ni pali pahieu koaros en pei sarawio. 12 Mwurin aramaso eh pahn sepepenehr uduken mahno, samworo ahpw pahn kihdi uduk en mahno pohn kisiniei, iangahki moange oh wihe ko. 13 Aramaso pahn kamwakelehda kepwehn loale kan oh neh kan; eri samworo ahpw pahn patohwandahng KAUN-O oh isikala meirongo pohn pei sarawio. Pwohn meirong en konot wet kin kaparanda kupwur en KAUN-O.
14 Ma aramaso pahn meirongki menpihr men nin duwen meirong isihs, menpihro pahn mwuroi men de emen menpihr me adaneki pitsin. 15 Samworo pahn wadohng menpihro ni pei sarawio; e ahpw pahn pirer tepinwere oh isikala moange pohn pei sarawio. 16 Samworo pahn kihsang kepwehn loale oh keselahng ni palimesehn pei sarawio wasa pehs ko kin lekdekla ie. 17 E pahn ale pehn menpihro, kadangpeseng oh pwalangpeseng, ahpw e sohte pahn tehrasang peh kan, oh e pahn isikala pwon pohn pei sarawio. Pwohn meirong en konot wet kin kaparanda kupwur en KAUN-O.