1  NEN i moleileilar ren Kot, me kotin jauaja ia.

2 Pwe i eta ai paip, o jauaj pa i, o pere pa i, pwe i en jota luetala kokolata.

3 Arai da komail kin majamajan ol ta men, pwen kamela, me rajon did panpanla o kel me pual pajaner?

4 Re kin madamadaua duen ar pan kak kapupedi i, re kadek likam, re kin lokaia kajelel, a nan monion arail re kin lalaue. Jela.

5  Nen i, kaporoporeki Kot, pwe i kapore pa i.

6 I eta ai paip o jauaj pa i, o pere pa i, pwe i ender pupedi.

7 Ai maur mi ren Kot, o ai linan, o ai paip, o ai kel; i kaporoporeki Kot.

8 Komail aramaj akan karoj kaporoporeki i anjau karoj; kajanjale on i monion omail, Kot kapore patail. Jela.

9 A aramaj akan jota meakot, o me lapalap akan pil kin japunala. Ni men tenok re kin kokoda, menda ma irail me toto.

10 Komail der keleki omail dipijou japun o der kaporoporeki me komail kuliadar. Ma komail pan kapwapwala, komail der kajampwaleki!

11 Kot kotikidar majan eu, me i roner akai anjau, iet: Kot eta me manaman.

12 Komui Main me kalanan o komui kin pwain on amen amen duen a wiawia kan.