Kadede Kap Pjam Akan Pjalm 22
22
A I Kot, ai Kot da me komui likidmalie kin ia la? I likelikwir, a jauaj pa i me doo.
Ai Kot, nin ran i kin likwir, a kom jota kin japen, o ni pon i pil jota kin nenenla.
Ari jo, komui ta me jaraui, komui me kotikot pan kaul en kapin en Ijrael.
Jam at akan liki komui, o ni ar liki, kom kotin jauaja irail er.
Irail likwir on komui, rap dorelar, re liki komui, rap jota namenokala.
A nai dueta kamatol amen, a kaidin ol amen, me aramaj akan kin lalaue o mamaleki.
Karoj me kilan ia, kin lalaue, ia, jara pajan au arail o tuetuäl mon arail:
A kin liki Ieowa, i en dorela i, o kamaioda i, pwe a kin kupura i.
Pwe komui kotin kaipwi ia jan nan kaped en in ai; komui ta, me i liki jan ni anjaun ai mi ni maramaran in ai.
10 Jan nan kaped en in ai i lokidokilan komui; komui ta ai Kot jan ni anjaun ai mi pon kopan in ai.
11 Kom der kotin doo jan ia, pwe anjaun kalokolok korendor, ap jolar jauaj pa i.
12 Kau ol kalaimun kan kapil ia penaer, o kau ol en Pajan kele ia pena.
13 Irail jara don ia dueta laien weriwer o laualo amen.
14  Nai wudokilar dueta pil, ai kokon akan karoj muei pajaner, o monion i pei pajaner nan kaped i dueta wi.
15 Ai kelail nalanal lar dueta diper en dal eu, o lo i pajadan pan natanat ai, o komui kin wia kin ia me melar amen.
16 Pwe kidi kan kapil ia pena, o pwin aramaj jued eu kele ia pena, irail kapore pajan pa i o nä i kat.
17 I kak wadok kokon ai kan karoj; a irail kin kilekilan ap peren kida.
18 Re kin nek pajan ai likau kan nan pun arail, o re doropweki ai likau pup.
19 A komui Main ender doo jan ia! Ai kel madando o jauaja ia!
20 Dorela maur i jan kodlaj, pwe me ta ieu, o jan nan kel en kidi!
21 Jauaja ia jan nan au en laien, o dore ia la jan oje en man laualo!
22 I pan padaki on ri ai kan duen mar omui, o i pan kapina komui nan momodijou.
23 Kapina Ieowa komail me majak i, o kadaudok en Iakop en kalinanada i, o wan Ijrael karoj majak i.
24 Pwe a jota kotin mamaleki de juedeki me luet akan; o a jota kotin karirila jilan i jan irail; o ni a likwir on i, a kotin erekier.
25 I pan kapina komui nan momodijou kalaimun; i pan kapwaiada ai inau mon ir me lan i.
26 Me luet akan en mana o medila, o me idok Ieowa, pan kapina i; nen omail pan memaureta kokolata.
27 Ni imwin jap karoj re pan tamanda Ieowa, ap wuki on i, o di en men liki karoj pan kaudoki on i.
28 Pwe wein Ieowa, o a kotin kaunda men liki kan.
29 Me wi kan karoj nin jappa pan manamana o kelepuki; karoj, me pan wiala pwel o jota kak kolekol maur ar, pan poni i.
30 Kadaudok eu mia, me pan papa i, re pan padaki on jeri o jeri en jeri kan duen Ieowa.
31 Re pan pwarado o padaki on aramaj akan, me pan ipwidi mur duen a pun, o duen me a kotin wiadar.