Kadede Kap Pjam Akan Markuj 9
9
A AP kotin majani on irail: Melel I indai on komail: Akai me ian mi met, jota pan mela, lao kilan wein Kot a kokido manaman. Murin pon wonu pon Iejuj ap kotin ukada Petruj o Iakopuj o Ioanej kalua ir dalan pon nana ileile eu, ir kalapuk. I ari kotin wukila mo ’rail. Japwilim a likau ko linalinala, puetepueteta jno. Jota jaunlopolop nan jappa kak kapuetepuetetala dueta. Eliaj i Mojej ap pwara don ir, ari, ira o Iejuj ap mamajan pena. Petruj ap japen potoan on Iejuj: Rapi, me mau on kitail en kotikot met. Kitail en kauada kijin im jilikij: Tanpaj ar, o en Mojej o en Eliaj. Pwe a jaja, da me a pan inda, pwe re majapwekada. Pali en dapok pali ap kadupwal irail edi; o nil eu peidido jan nan dapok o: I met nai. Ol kompok! Komail ron i! Ari, re jaliokeda, jolar amen me re kilan, Iejuj ta, me kotikot re ’rail. Ari, ni arail kotikot kotido jan nin nana o, a kotin kalik irail edi, re depa indai on meamen, me re kilan ko, lao Nain aramaj mauredar jan ren me melar akan. 10 Re ap edie pena majan pot et nan pun ar, ap peipeidokki pena, da wewe en maureda jan ren me melar akan? 11 Irail ap peidok re a potoan on: Da me jaunkawewe kan indaki, Eliaj pan pwarado maj? 12 I ari kotin japen, majani on irail: Melel Eliaj kodo maj, kamauiada meakan. O iaduen intinidi duen Nain aramaj? Me pan kolokolok toto o jokonekon. 13 A I indai on komail, Eliaj pwarer, o re wiai on i, me re mauki duen a intinidi due. 14 A lao koti don tounpadak kan, a majani pokon kalaimunia eu kapil ir pena o jaunkawewe kan peipeidok re irail. 15 Ni ar kilanadar i, pokon o ap puriamuiki la tanado ranamau on i. 16 A ap kotin kainoma re irail: Peidok da kai, me komail idedok re ’rail? 17 Amen toun pokon o japen i potoan on: Jaunpadak, i potoan don komui nai putak o, me nen loton mi poa. 18 Ari, waja karoj me a kin tiada poa, a kin kapururada; a ap kin pudopud o katekatete ni o tonetonela. I potoan on japwilim omui tounpadak kan, pwe re en kauja jan i, ari, re jota kak. 19 A ap kotin japen irail majani: Di wet meid jopojon. Ia arain ai pan mimi re omail, ia arain ai pan kokoa komail? Wa don ia i! 20 Irail ap poto don i. Ni a kotin majani i, nen o ap madan kupururada i; a ap pupedi on nan pwel, wia pudopud taputapur jili. 21 A ap kainoma ren jam a: Ia arain me kot et a lel? A ap potoan on: Jan ni a jeri. 22 Pan me toto a kin kajedi on i nan iai o nan pil, pwen kamela i. Ari, ma re kotin kak on, re kotin kupura kit ala jauaja kit! 23 Iejuj ap kotin majani on i: Ma koe me pojon; meakaroj me kak ren me pojon. 24 Madan jam en kijin jeri ap weriwer, janejan, potoan: Main, i pojon. Kom kotin katinaiada jan ai jopojon. 25 Ni en Iejuj a kotin majani ar tanetan pena, a ap anianiada nen jaut o kotin majani on nen loton o jalonepon: I indai on uk, koieido jan lole! Koe depa pure won i! 26 A ap weriwer, kapururada kaualap, ap koiei jan. I ari likamata a melar. Akai ap inda, a melar. 27 Iejuj ap kotin ale pa a kauada, i ari uda. 28 Ni a koti don ni im o, japwilim a tounpadak kan ap okiok peidok re a potoan on: Da me je jota kak kaujeki jan? 29 A ap kotin majani on irail: Jon wet jota kin koki jan meakot kapakap o kaijejol eta. 30 Re ap kotila jan waja o, weidala nan Kaliläa. A jota men, meamen en aja. 31 Pwe a men kotin kawewe on japwilim a tounpadak kan ap majani on irail: Nain aramaj pan panalan ni pa en aramaj. Irail pan kamela i a murin a kamela a pan maureda murin ran kajilu. 32 A irail jota dedeki majan o; a re majak kalelapok re a. 33 A ap koti don Kapernaum; ni a kotikot nan im o a ap kotin kainoma re ’rail: Da me komail akakamaiki nani al o? 34 Irail ari nenenla, pwe re akamaiki nani al o, ij me pan laud re ’rail. 35 I ari kotidi, molipedo ekriamen oko, ap majani on irail: Meamen men moa, a en mi muri o papa on karoj. 36 I ari kotin ale kijin jeri amen, kotikidi on nan pun arail: A lau palodi i ap majani on irail. 37 Meamen me apwali amen jan ren kijin jeri pukat ni ad ai, a pil apwali ia. A me apwali ia, kaidik nai, me a apwali, a me kadar ia do. 38 Ioanej ap japen i, potoan on: Jaunpadak, je kilan amen, me kakauj tewil akan ni mar omui, a ap jota kin ian kit. Kit ari inapwiedi, pweki a kaidin kij at. 39 Iejuj ap kotin majani: Der inapwiedi! Pwe meamen me wia manaman ni ad ai, jota pan kak en lalaue ia. 40 Pwe meamen jota u on kitail, i kijan atail pali. 41 Pwe meamen, me pan ki on komail dal en pil eu ni ad ai, pweki omail kijan Krijtuj, melel I indai on komail, katin i jota pan jalona jan. 42 O meamen, me kamakar amen ir me tikitik, me pojon ia, a mau on takai en ir plaua eu en paudoki on ni tapin wor a; a ap lokidokila nan madau. 43 Ma apali en pa om kamakar uk, lepuke jan! A mau on uk, ko on maur, ni om danidan jan om pa pokon mia, ap ko on nan pweleko, nan kijiniai jokun. 44 Waja ar muaj jota kin mela o kijiniei jota kin kunla. 45 O ma apali en nä om kamakar uk, lepuka jan! A mau on uk, ko on maur ni om jikilikil jan om pat en nä pokon mia, ap lokidokila nan pweleko, nan kijiniai jokun. 46 Waja ar muaj jota kin mela o kijiniai jota kin kunla. 47 Ma apali maj om kamakar uk, kapida jan! Me mau on uk, maj pali pedelon on nan wein Kot jan maj unjok lokidokila nan kijiniai en pweleko. 48 Waja ar muaj jota kin mela, o kijiniai jota kin kunla. 49 Pwe amen amen pan joleki kijiniai, dueta mairon karoj kin joleki jol. 50 Me mau jol. A ma jola nam en jol, nam a pan ko jan ia? Jol en mi re omail o komail popol pena!