1 RAN en japat lao daulier, ni manjan en at en wik, Maria men Makdala, o Maria teio ap kodon ududial joujou o. 2 A kilan, jap rereda kaualap, pwe tounlan en Kaun amen, pwaradido jan nanlan o katapur jan takai o, ap kaipokedi on poa, 3 Mom a dueta liol o a likau puetepueteta jno. 4 Jilepa ko ap majapwekadar, o re likamata mela. 5 A tounlan o kotin japen majani on li oko: Komail der majak pwe i aja, me koma rapaki Iejuj, me lopuelar. 6 A joer met, pwe a iajadar, duen a kotin majanier. Kodo udial waja, me Kaun nekinekidi maj o, 7 O tanwei kaireki japwilim a tounpadak kan, me a kotin iajadar jan ren me melar akan. A kilan a pan kotin tion mo ’mail kotilan Kaliläa. I waja komail pan diarada i. Kilan, i kop on komail er. 8 Ira ari madan jan ni joujou o majak o peren kaualap, o tanwei kaireki on japwilim a tounpadak kan. 9 A ni ara kola, kaireki japwilim a tounpadak kan, kilan, Iejuj ap tu on ira majani: Ran mau! Ira ap kai on poridi ni aluwilu a o poni i. 10 Iejuj ap kotin majani on ira: Der majak, kowei kaireki ri ai ol akan, pwe re en koieilan Kaliläa. I waja re pan diar ia. 11 Ni ara kokola, kilan jilepa kai ko don kanim o kaireki jamero lapalap akan karoj me wiauier. 12 Irail ari pokon pena ianaki jaumaj akan o kapukapun, ap ki on jaunpei moni toto. 13 Indai on irail: Komail pan inda: A tounpadak kan pwarador pon pirapela i ni at mamair. 14 A ma kopina pan ronada duen mepukat, kit ap pan jauaja komail re a. 15 Irail ari aleer moni kan o wiadar duen me re katiti on irail. A kajoi pot et lolok jili ren Juj akan kokodo lel ran wet. 16 A tounpadak ekamen kowei on Kaliläa, pon nana eu, me Iejuj kotin kakalik on irail er. 17 Irail lao diaradar i, re poni on i, a akai me peikajal. 18 Iejuj ap kotido majani on irail: Manaman en nanlan o jappa karoj muei on ia er. 19 Komail ari kola o padaki on toun jappa karoj o paptaij ir ala ni mar en Jam o Na o Nen jaraui. 20 Padaki on irail, me ren dadaurata meakan, me I kakalik on komail er. O kilan, I pan daudaulole komail jili kokolata, lao lel jappa imwijokela.