Kadede Kap Pjam Akan Matäuj 26
26
KADEKADEO Iejuj lao kaimwijokela padak pukat karoj, ap kotin majani on japwilim a tounpadak kan: Komail aja, pon ria pon paja pan wiaui o Nain aramaj pan panala, en kalopula. Jamero lapalap akan o jaumaj akan en toun jap o ap pokon pena nan im en jamero lapalap, me maraneki Kaipaj. O kapukapun pena duen ar pan widinadi Iejuj en kamatala. A irail inda: Iermen ni ran en kamadip, pwe aramaj ede moromoronada. Iejuj lao kotikot Petaniem nan im en Jimon tuketuk, Li amen ap poto don i, wa kijin potel alapajta audaud en men kei kajampwalia ap kieledier on pon kadokenmai, ni a kotin konot. A tounpadak kan lao kilaner, ap juede kidar indada: Menda kei wet olar mal? Pwe a pan netila, kareda pwai laud ap nek on jamama kan. 10 Iejuj lao mani met, ap kotin majani on irail: Da me komail kainjenjuedeki li o? Pwe me mau, me a wiai on ia er. 11 Pwe me jamama kan kin mi re omail anjau karoj, a nai jota anjau karoj. 12 Pwe ni a wudok kidi pil wet pon war ai, a kaonopadar ai jaredi. 13 Melel I indai on komail, waja karoj, me ronamau wet pan kalok ia, panada jappa pon, me a wiaer et, pil pan kaloki, pwen katamanpa. 14 Amen ekriamen, me adaneki Iudaj Ijkariot, ap koieila ren jamero lapalap akan, 15 Indada: Da me komail pan ki don ia, i pan pana don komail i? Irail ari inauki on i jip en moni jileijok. 16 A jan ni anjau o a jojon duen a pan manai on en panala i. 17 Ni ran kaieu en prot jomut tounpadak kan poto don Iejuj patoan on: Ia waja re kotin kupura, jen kaonopadan ir kamadip en paja? 18 A kotin majani: Kola nan kanim ren ol amen indai on i: Jaunpadak o majani: Ai anjau korendor, I pan wiada kamadip en paja re om, o ai tounpadak kan pan ian ia. 19 Tounpadak kan ap wiadar duen majan en Iejuj, kaonopadar paja. 20 A lao jautik penaer, a kaipokedi ni tepel, a ekriamen akan ian i. 21 Ni arail konokonot, a kotin majani: Melel I indai on komail, amen komail pan pan ia la. 22 Irail ap injenjued o amen amen potoan on i indada: Main nai i? 23 A kotin japen majani: Me ian ia kaduedi nan dal o, i me pan pan ia la. 24 Pwe Nain aramaj pan kokola duen a intinidier. A juedi on aramaj o, me Nain aramaj panala re a, me mau on aramaj o, ma a jota ipwidier. 25 A Iudaj, me panala i ap japen potoan on indada: Rapi, nai i? A kotin majani on i: Koe me indada. 26 Ni arail wiadar konot. Iejuj kotin limadar prot laolaoki, o pilitiki pajan, kotiki on toupadak kan majani: Ale tunole, war ai metet. 27 A pil kotikida dal o laolaoki kotiki on irail majani: Komail karoj nim jan; 28 Pwe nt’ ai metet, udan inau kap, me pan kapwilipwilidi on me toto, men lapwada dip. 29 A I indai on komail, me I jolar pan nim jan wan wain jan anjau wet lao lei ni ran o, me I pan pil nim nan wein Jam ai ianaki komail! 30 Irail lao melkakaki melkaka en kapin, rap kotila pon dol Oliwe. 31 Iejuj ap kotin majani on irail: Komail karoj pan makar kin ia ponpon wet, pwe a intinidier: I pan kame jilepa o, a pwin jip o pan more pajan. 32 A murin ai maureda, I pan ti on mo ’mail kola Kaliläa. 33 A Petruj japen potoan on i: Ma karoj pan makar kin ir a nai jota pan makar. 34 Iejuj kotin majani on i: Melel I indai on uk, ponpon wet mon malek a kakorot, koe pan kamam kin ia pan jilepak. 35 Petruj potoan on i: Ma i ian ir matala, i jota pan man kamam kin ir; iduen en tounpadak kan karoj ar indinda. 36 Iejuj ap kotilan waja o me adaneki Ketjemane, a irail ian i, ap kotin majani on tounpadak kan: Komail mondi met, lao I pan kola kapakap monen. 37 O a kotin ukadar Petruj o nain Jepedäuj ol riamen, ap kotin tapiadar kupur olar o patau kaualap. 38 Iejuj ap kotin majani on irail: Nen i ap injenjuedelar kaualap on mela. Komail pan mimieta met, ian ia majamajan. 39 O a kotila ekij waja, ap kotin pupekidi jilan i laolaoki majani: Jam ai, ma a kak, kom kotiki jan ia dal wet; ari jo, kaidin nai, komui ta en wiawia. 40 I ari kotin pure don tounpadak kan, diar ir adar mamair, ap kotin majani on Petruj: Komail jo kak ian ia majamajan auer ta ieu? 41 Majamajan o kapakap, pwe komail de ko on nan jonejon. Nen me peik, a uduk me luet. 42 A pil kotila kariapak laolaoki majani: Jam ai, omui kupur eta, me dal wet jota kak kowei jan ia, ari I pan tunole. 43 A lao kotin puredo diar ir adar pil mamair, pwe maj arail me toutou. 44 A a kotin muei jan irail, pil kotilar laolaoki kajilepak ni majan ota. 45 Ap kotin pure don tounpadak kan majani on irail: Komail ari mamair o kamol. Kilan, auer leler, me Nain aramaj pan panalan pa en me dipan akan. 46 Paurida, kitail en kola, kilan, a jamador, me pan pan ia la. 47 Ni a kotin mamajandar, kilan, Iudaj, amen ir ekriamen oko, pwarador, pokon lapalap ian i, me wa kodlaj o jokon jan ren jamero lapalap akan o jaumaj akan en toun jap o. 48 Men panala i ki on ir kilel eu indada: Me I pan metik, iei I komail pan koledi. 49 I ap madan don Iejui indada: Pon mau Rapi ap metik i. 50 A Iejuj kotin majani on i: Kompoke pai, menda koe pwarador? Irail ap por on Iejuj, jaikidi i. 51 A kilan, amen irail, me ian Iejuj, kapawei pa a, ujadar na kodlaj, pale jan jalon en ladu en jamero lapalap o. 52 Iejuj ap kotin majani on i: Kapure ion om kodlaj nan deu a! Pwe karoj, me ale kodlaj, pan kamekila kodlaj. 53 De koe lamelame, me I jota kak poeki ren Jam ai en kadara don ia tounlan toto jan lekion eijokriau jama; 54 A iaduen kijin likau kak pwaida? A udan a pan wiaui duen met. 55 Ni auer ota Iejuj kotin majani on pokon o: Da, nai lolap amen, me komail kodon aleki kodlaj o jokon akan? Ni ran akan karoj I mier re omail, kauwewe nan im en kaudok, a komail jota kol ia dier. 56 A mepukat karoj wiauier, pwe kijin likau en jaukop akan en pwaida. Tounpadak kan karoj ap muei jan i tandaui. 57 A me jaikidier Iejuj, ap kaluan i ren jamero lapalap Kaipaj, waja jaunkawewe o jaumaj akan pokon pena ia. 58 A Petruj idauendo i doowei jan lel tanpaj en jamero lapalap o pedelon on mondi ren papa kan, pwen kilan imwin mepukat. 59 A jamero lapalap akan, o jaumaj akan, o pwin en kapun o roporop kadede likam on Iejuj, pwen kamatala; 60 Ari, jota me irail diar. Jaunkadede likam me toto, me pwarado, ari jo, jota me irail diar. Ikmuri jaunkadede riamen pwarado, 61 Indada: Lap en me inda: I kak on kawela im en kaudok en Kot ap id kauada ni pon jili pon. 62 Jamero lapalap ap kajinenda majani on i: Kom jota japenki meakot, me mepukat kin kadede on komui? 63 A Iejuj kotin nenenlata. Jamero lapalap ap majani on i: I kakau kin komui la ren Kot ieiaj, komui en indan kit, ma komui Krijtuj Japwilim en Kot. 64 Iejuj ap kotin majani on i: Komui me inda. A I pil men kaire kin komail, jan ni anjau wet, komail pan kilan Nain aramaj a pan kaipokedi ni pali maun en manaman o kokido dapok en lan akan. 65 Jamero lapalap ap ter pajan, a likau kan indada: A lalaue. Menda pil akai jaunkadede? Kilan, komail apton ronadar a lalaue, 66 Da me komail lamelame? Irail japen potoan on: A mau on kamela. 67 Irail ap kondipi on jilan i o pakir i, o akai pikir i ni jilan i, 68 Indada: Krijtuj, kokop on kit, ij me pikir uk? 69 Petruj momod liki panakepir; lidu men ap ko don i indada: Koe me pil ian Iejuj en Kaliläa. 70 A i me kamamaki mo ’rail karoj indada: I poneponeki me koe inda. 71 A ni a pedoi wei jan nan wanim, amen lidu ap kilan i indan irail, me mi waja o: Lap men et me pil ian Iejuj en Najaret. 72 A pil kamamki ap kaula: I jaja aramaj en. 73 Mur ekij irail me u impa pil kaido indan Petruj: Melel koe amen irail, pwe nil om kadiarok kin uk ada. 74 I ap lalaue o kaula indada: I jaja aramaj en. Malek ap kakorot. 75 Petruj ap tamanda majan en Iejuj, me kotin majani on i: Mon malek a kakorot, koe pan kamam kin ia pan jilepak. A ap koieila janejan laud.