1 AKRIPA ap majani on Pauluj: Koe me jaladoklar en kapakaparok ki pein uk. Pauluj ap kapa wei lim a, kadededar pein i: 2 I ap peren kidar main nanmarki Akripa, me i pan kapakaparok mo ’mui ran wet duen meakan, me Juj oko pan kin ia la, 3 Pwe komui me erekilar en Juj oko ar lamalam o peipeidok kan, i ap poeki re omui, en kotin kanonama mamani ia. 4 Ai wiawia kan arain maur i, me tapida Ierujalem ren jau i kan, Juj akan karoj aja due. 5 Irail me aja ia jan maj kokodo, ma re men kadede ia, me nai kijan pwin kelail en at lamalam, me ad a Parijär. 6  Nai ari mi mon kadeik, pweki ai kaporoporeki inau o, me Kot kotiki on jam at akan. 7 Nan i inau o, me at kainok eijokriau kin kaporoporeki, me re pan pwaiki on ar nantion kaudok on Kot ni ran o ni pon. Main nanmarki Akripa iei kaporopor me i pan kila ren Juj oko. 8 Da me komail jota kamelele, me Kot kotin kaiajada me melar akan? 9 Maj o i kiki on, me i en wiada meakan, me kaokaoe mar en Iejuj en Najaret. 10 I me i pil wiadar nan Ierujalem; o me jaraui kan toto me i jaliedier on nan imaten murin ai aleer manaman jan ren jamero lapalap akan o irail lao kamelar, nai pil jauaja. 11 I kame irail pan pak toto nan jinakoke kan karoj, o koidon on irail, re en lalaue, o nai linaranar kaualap pa ’rail; i kin kame irail lel on kanim en wai kan. 12 A ni ai wiawia mepukat, o kokolan Damajkuj ni manaman en jamero lapalap, 13 Main nanmarki, nin jauaj i ap kilanadar nani al o marain eu jan nanlan, me linan jan katipin, me jenjereda imp ai o me ian ia kai. 14 Kit karoj lao pupedier nani pwel, i ap ronadar nil eu, katitiki on ia ni lokaia en Ipru: Jaul, Jaul da me koe kamekame kin ia? Nan a pan apwal on uk, en tametame tek o. 15  Nai ari idok: Ij komui Main? Kaun o ap kotin majani: Nai Iejuj, me koe kin kame. 16 Koe ari paurida, kajinenda, pwe i me I pwaraki don uk, pwen kajapwil uk ada, pwe koe en papa o jaunkadede men en meakan, me koe kilanada, o meakan, me I pan kapwara don uk. 17 O I pan dondoro jan uk ni pa en aramaj akan o men liki kan me I pan kadar uk wei on, 18 Pwen kapad pajan maj arail, pwe re en wuki jan rotorot, wuki on marain, o jan ni manaman en Jatan on Kot, pwe re en lapwa jan dip ar akan, o ren ale ar jojo ren me kamakelekele kidar pojon. 19 Ari main nanmarki Akripa, i jota jopeiki on kajanjal en nanlan o. 20 Pwe maj i padaki on toun Damajkuj o Ierujalem, o jap en Iudäa kan, o men liki kan, en kalula o wuki on Kot, o kapwaiada wan kalula mau. 21 Nan i me Juj akan jaik ia kidi nan im en kaudok o, o re jon kame ia la. 22 Ari jo, en Kot a kotin ieian ia, me i mimieki lao lel ran wet, padapadaki me tikitik o me laud akan, o jota me i inda, i eta, me jaukop akan o Mojej pil majanier, me pan wiaui: 23 Ieteten, Krijtuj en kamekam, o me a pan men maj en me pan iajada jan ren me melar akan, o padaki on toun wei o pil on men liki kan duen marain o. 24 A ni a kapun kila mepukat, pein i Pejtuj ap nil laudeda majani: Pauluj, koe iakalar! Om jukujukul toto me kapwepwe uk adar. 25 A Pauluj kotin majani: I jota iakalar main ijou Pejtuj, a i kin kida kajoi melel o pun. 26 Pwe nanmarki kotin mani duen mepukat; i me i pil aima padapadakieki on i, pwe i aja, jota meakot, me a jota kotin ereki, pwe kaidin waja rir, me mepukat wiauier. 27 Nanmarki Akripa, komui pojon jaukop akan? I aja, me komui kin pojon. 28 Akripa ap majani on Pauluj: Me tar kij, a komui pan kainon on ia en jaulanala. 29 Pauluj majani: I nonki on Kot, me komui o karoj, me roneron ia ran wet, en dueta nai, a iermen jal mata pot et. 30 Nanmarki, o kopina, o Pernije, o me ian irail kaipokedi waja o, ap kotida, 31 O kelepala, ap kapakaparok nan pun ar mamajani: Aramaj men et jota kin wiada me war on kamela de jalidi. 32 Akripa ap majani on Pejtuj: Aramaj men et pan lapwada, ma a jota dorolan Jija.