1 A IET me wiauier nan Ikonien: Ira karoj kotilon on nan jinakoke en Juj oko, ap padapadak kelail, lao kijan men Juj o Krik toto pojonla. 2 A Juj oko, me jo pojon, kamokimokid men liki kai o kalolap irail on jaulan kan. 3 A ira mimieta warai waja o, o aima padapadak duen kupur en Kaun o, me kotin kapwaiada majan en kupur a, ni a kotin kajaleda kilel o manaman akan ki lim ara. 4 A toun kanim liak toror pajan. Akai me ian Juj oko, a akai ian wanporon akan. 5 A moromoron lao wiauier jan ren men liki kan o pil Juj oko ianaki ar jaumaj akan, pwen kame o kate ira, 6 Ira lao manier, ap pitilan kanim Likaonien, o Lijtra, o Derpe, o jap me mi imp a, 7 Waja o ira padapadak ronamau. 8 A ol amen momod Lijtra, me pat en nä luet o kokon danidan jan ni a tikitik, me jaikenta alu. 9 I me kin roneron en Pauluj a padak. A lao majani i, ap kotin kajauiada, me a pojon itar on en kakelailada, 10 Ap kotin kapitie laudeda majani: Ukida nä om! I ari majiokadar o aluwei. 11 Aramaj lao kilaner, me Pauluj kotin wiadar, rap nilada kapitiki nin lokaia en Liakonien: Kot akan wia aramajala ap koti don kitail. 12 Irail ari ki on mar en Parnapaj Iupiter, a Pauluj Merkuriuj, pweki a kaunda kaparok. 13 A jamero en Iupiter, me kin mi mon kanim o, ap wado kau ol o al en tuka kai mon kanim o, ap men ian pokon o wia mairon ijij. 14 A wanporon oko Parnapaj i Pauluj lao mani mepukat, ira ap ter pajan ara likau o tan won nan pun en aramaj akan likelikwir: 15 Main ko, da me komail wiawiaki mepukat? Kit aramaj dueta komail, ap padaki on komail, pwe komail en wuki jan kot mal pukat, wuki on Kot ieiaj, me kotin kapikadar lan, o jappa, o jed, o audepa ’rail karoj. 16 Me kotin mueid on toun jap karoj en wia pein injen ar maj o. 17 Ari jo, a jota kotin okila pein i, pwe a kotin wiawia mau o kotiki on komail katau jan nanlan o rak o, o kadireki nan monion omail mana o peren. 18 Ira kotin majani mepukat, a ekij ta, ira jota kak katukiedi en pokon o ar pan mairon on ira. 19 A Juj oko ap kodo jan Antiokien o Ikonien, kamakarada aramaj. Ir ari kate Pauluj o uradokilan likin kanim o, re ap kiki on, me a matalar. 20 A ni en tounpadak kan ar kapil pena i, a kotida ap kolon on nan kanim o, a manda a ian Parnapaj koieila Derpe. 21 Ira lao padapadak ronamau nan kanim o, o kajaulanalar me toto, ira ap purela Lijtra, o Ikonien, o Antiokien. 22 Ira kakelada nen en tounpadak kan o panaui irail, me ren dadaurata pojon, o me kitail en leleki wein Kot kamekam toto. 23 Ira lao kajapwilada jaunkoa kai nan momodijou karoj, ap kapakap o kaijejol, ap kapakapa ki irail ren Kaun o me re pojonlar. 24 Ira kakan jili Pijidien ap lel on Pampilien. 25 Ira lao padaki duen majan o nan Perke, ap kotilan Atalien. 26 A jan ni waja o ira tanalan Antiokien, waja ira japwile kidar mak en Kot on dodok o me ira kapwaiadar. 27 Ira lao pwarador, ap kapokon pena momodijou, rap kotin kajoia on irail duen en Kot a kotin wiaki ira, o duen a kotin ritinada wanim en pojon en men liki kan. 28 Ira ap kotikot warai ren tounpadak kan.