Kadede Kap Pjam Akan Timoteuj II 3
3
A IET me koe en aja, ni imwi en ran akan anjau apwal pan pwaida. Pwe aramaj akan pan kajampwaleki pein irail, o norok moni, o ponmaju, o aklapalap, o lalaue, o jota peiki on me wia ir adar, o jo danke, o me jued. O jempok, o jaja mak, o likinekine, o weit, o jo kadek, jo pok on me mau kan, O me kin panala me jaraui, o me katil la, o kala, o inon ion me jued mon Kot. Me janjalki lelapok ap jaja a manaman; muei wei jan mepukat. Pwe akai irail kin wailon on nan im akan o kaloedi li akai, me toutouki dip, o me inon jued kin kaua ir jili. Me kin jukujukul anjau karoj, ap jota lolekon kila melel. A duen Ianej o Iamprej palian Mojej, iduen mepukat kin palian melel, i jon en aramaj akan me juedelar ni lol arail, o me jota mau on pojon. A re jota pan pwaida, pwe ar lolepon pan janjal on karoj dueta a wiauier ren irail. 10 A koe ale jan ai padak o ai tiak, o ai lamalam o pojon, o dadaurata, o limpok, o kanonama, 11 O kamekam akan, o kalokolok kan, me lel on ia nan Antiokien, o Ikonien, o Lijtra; jon en kalokolok toto, me lel on ia. A Kaun o kotin dore ia lar jan ir karoj. 12 A karoj me men dadaurata duen me kon on Kot ren Krijtuj Iejuj, pan kamekameki. 13 A aramaj jued o malaun akan pan kakairida ni ar jued, irail pan kotaue aramaj akan o re pan kotaue irail. 14 A koe dadaurata, me koe padakkier pwe koe ajaer, me koe padakki jan er. 15 O koe aja kijin likau jaraui kan jan ni om jeri, me kak kalolekoni uk on maur potopot ki pojon me mi ren Krijtuj Iejuj. 16 Pwe majan en kijin likau kan karoj tapi jan ren Nen en Kot, me mau on padak, o kapun, o kamau, o kainene on me pun. 17 Pwe aramaj en Kot en unjokela o koiok on wiawia mau karoj.