13
Falafala ne'e agea God 'e malale'a
Mooru nga fu'uwane ni futanga ala Kraes, tamoru kwaimaa kwairiu famooru furifuri. Moru sia mabolosia mola fana kwalolana nga ta'a kwaitaa. Suria tani wane ngaa'i gila kwaloa ta'a 'ubulana 'ifi aga, tafe'ua ma gila 'ame su'a mola ai na nga ta'a laka'u nga enselo. Jenesis 18:1-8; 19:1-3 Aia, moru sia mabolosia la'u mola ta'a na gila nana'i 'ubulana 'ifi na lokafu. Moru 'abelo le'a 'aniga, 'ilaka'u moru nana'i fe'eniga 'ubulana nga 'ifi na lokafu. Ma tamoru kwaibooni la'u mola na ta'a na gila to'o na 'ato'atolanga, 'ilaka'u na moru to'o la'u mola na 'ato'atolanga fe'eniga.
Ma ngaia 'e le'a famooru te'efou 'amoru fa'aba'itaa nana'i oguogunga na fuageninga. Moru nana'i kwala'imori fana kwaiimooru ma 'afe amooru. Suria God te'e kwatea kwa'ikwa'inga fana ni dai na gila agemani ma gila agemani kwaifafi.
Tamoru nana'i fa'asia sirilana bata 'e aula. Ma tamoru aile'a fe'enia 'olataa na moru to'o ai. Suria God laka'u 'e iiria, “Nau ku sia leka mola fa'asi 'amooru, ma nau ku sia ma'asini te'enia mooru mola.” Tofuna 'ola lo'oo, tagoru fata 'ilo'oo, “Nga Alafa no'o na wane ni kwaibooninga agu. Tofuna 'ola lo'oo, Nau ku sia ma'unge'enia mola te'efuta 'ola na wane ngaia te'e agea agu.” Sam 118:6
Moru sia manata mabolosia la'u nga ta'a na'ona'o amooru na gila fa'ananaua moru 'ania fatalana God. Moru manata suria nga mooringa le'a no'ona aaga leleka ma gila ka mae. Ma tamoru leka suria nga fito'onga aaga.
La Jisas Kraes ngaia 'e nana'i ma 'e sia lamadu'aa mola. Ngaia 'e tooto'o mola naboni, ma tala'ina, ma nga alata na 'ame nigi 'ua mai. Ma tamoru nana'i fa'asia tagoto'onga na kwaifa'ananaunga matari lo'oo na ngaia 'ame to'o. Kwailaeta'afiinga na God fadauru ne'e fa'ategelaa nga moori ladauru. Tafe'ua ma lo'onga suria nga tagi na fangalaa lo'oo, ngaia 'ame kwaibooni mola adauru.
10 Nga tabonga lo'oo ngai fofona nga uumu* Uumu lo'oo bala 'e fa'aladamia nga 'ai folo laka'u la Jisas 'e mae ai, 'amoe ma 'e fa'aladamia 'i ngaia la Jisas Kraes 'i talana. lo'oo adauru, nga fataabu na gila taunga'i 'ubulana 'ifi abu lo'oo gila 'ame to'omia fana 'agila ngaria te'efuta fangalaa fa'asia. Nga verse lo'oo, ngaia 'e fa'aladamia na ta'a na gila leka suria Tagi, ngaia 'e 'ato fana 'agila ngaria te'efuta 'ola 'e le'a fa'asia maenga ala Kraes. 11 Moru su'aai alata ta'a 'i Jiu gila kwatea tabonga fana fa'akwarilaga fa'asia nga rianga, nga alafa ni suuabunga 'e ngaria mai nga 'abu na 'ola momoori fai 'a'ae ngai ai 'i 'ubulana nga 'Ifi Abu na lefu ne'e abu 'e iiki. Aia ma nga nonina 'ola na gila tabo 'ania, gila ka do'ofia 'i maa fa'asia 'ubulana fanua. 12 Ma ngaia lo'oo la Jisas 'e mae no'o la'u mola 'i gula 'i maa na fanua 'i Jerusalem, fana 'ani fa'akwaria nga ta'a fa'asia nga rianga aga 'ania nga 'abuna. 13 Ngai lo'oo dauru tagoru leka la'u mola te'ana 'i gula 'i maa na fanua 'i Jerusalem 'Ola lo'oo 'e fa'aladamia fana 'agoru leka fa'asia lekanga suria Tagi ala Moses te'ala Kraes. fana 'agila fa'amaila 'adauru 'ilaka'u gila agea ala Jisas. 14 Na fanua lo'oo 'i wado, goru 'ame to'o na te'efuta fanua ne'e nana'i firi. Tafe'ua ma goru kwaimamani fana nga fanua 'i langi na te'e nigi mai. 15 Ngaia na'a, tagoru baatafea God furifuri. Nga baatafengaa no'ona, ngaia na tabonga adauru fana God na latana la Jisas na goru iiria 'ania nga Alafa adauru. 16 Moru sia mabolosia mola fana agelana le'anga ma nga kwaibooninga amooru kwairiu. Suria nga abulongaa lo'oo ngaia 'e 'ilaka'u nga tabonga la'u mola na God 'e aile'a fe'enia.
17 Moru lo'o suria nga ta'a na'ona'o amooru. Gila aga suria nga mango mooru, ma gila tagila kwairii 'ania nga taunga'inga aga lo'oo te'ana God. Ma lauta moru lo'o suria nga alafuunga aaga, tagila aile'a ba'ita fe'enia nga taunga'inga aga. Ma lauta moru 'ame lo'oo mola suriga, tagila kwaimanadai fe'enia nga taunga'inga aga, ma ngaia te'e 'ato 'agila kwaibooni amooru.
18 Ma tamoru fo'a furifuri fameeru. Meeru meru su'aai te'efuta 'ola 'e ria 'amoe no'o 'ubulana abulongaa ameeru, suria 'imeeru meru irito'ona fana agelana ni 'ola le'a furifuri. 19 Ma nau furia ku soe 'amooru, 'amoru fo'a fagu, fana God 'ani orite'eni nau mai 'aferu te'amooru.
Nga fo'anga
20-21 God 'e tata'ea nga Alafa adauru la Jisas fa'asia nga maenga. Ma tofuna nga tabonga ala Jisas 'ania maenga aana, ngaia 'e 'ilaka'u nga wane ne'e aga suria nga sifisifi aana. Ma God ka launge'enia nga fataarunga'inga fooru 'ania tabonga ala Jisas. Ma nga fataarunga'inga no'ona ngaia 'e nana'i firi. Aia, nau ku fo'a te'ana God na aloalonga 'ani kwatea nga 'ola le'a lo'oo te'efou na moru bo'obo'o fai fana 'amoru agea kwaisiriinga aana. Mai nau ku fo'a la'u mola fana la Jisas Kraes 'ani kwaibooni amooru 'amoru agea nga 'ola lo'oo na God 'e aile'a fe'enia. Ma tagoru baatafea la Jisas Kraes ne'e nana'i firi! Kiu.
Alafuunga 'i'isi
22 Ta'a ni futanga agu, nau ku siria 'amoru gwalongo fana alafuunga ni kwaibooninga agu lo'oo famooru. Tofuna nga girigiringa lo'oo agu, ngaia 'ame lalau mola.
23 Nau ku siria 'aku kwairii te'amooru suria nga wane ni futanga adauru la Timoti. Ngaia 'e nigi 'aferu mai lo'oo, tamele leka te'efou kau te'amooru.
24 Moru kwatea alafuunga le'a ameeru fana ta'a na'ona'o amooru te'efou, ma fana ta'a na God te'efou na gila nana'i fe'eni 'amooru. Ni wane ni futanga adauru lo'oo fa'asia 'i Itali, gila kwatea la'u mola baole'anga aaga famooru.
25 Nau ku fo'a fana God 'ani kwatea kwailaeta'afiinga famooru te'efou.

13:2 Jenesis 18:1-8; 19:1-3

13:6 Sam 118:6

*13:10 Uumu lo'oo bala 'e fa'aladamia nga 'ai folo laka'u la Jisas 'e mae ai, 'amoe ma 'e fa'aladamia 'i ngaia la Jisas Kraes 'i talana.

13:10 Nga verse lo'oo, ngaia 'e fa'aladamia na ta'a na gila leka suria Tagi, ngaia 'e 'ato fana 'agila ngaria te'efuta 'ola 'e le'a fa'asia maenga ala Kraes.

13:13 'Ola lo'oo 'e fa'aladamia fana 'agoru leka fa'asia lekanga suria Tagi ala Moses te'ala Kraes.