1 Jon
Nga Girigiringa Eteeta Fa'asia la Jon
Nga Wane ni Kwairiinga la Jon 'e giria buka lo'oo. Ngaia te'e wane na akwale'e wane ma ruaai ala Jisas, ma ngaia ka giria la'u Kwairiinga Le'a lo'oo ala Jon. 'Ubulana girigiringa lo'oo, ngaia 'e iiria fana ta'a na'a gila fito'o 'agila ula ngasi na falafala na God, ma 'agila to'ofonosia kwaifa'ananaunga kuta no'ona. Na alata no'ona, tani ta'a ni kotonga gila iiria la Jisas 'ame to'o na labe'e wane kwala'imori alata ngaia 'e nigi mai. Ngaia na'a, la Jon 'e iiria fana ta'a na'a gila fito'o 'agila to'ofonosia kwaifa'ananaunga kuta no'ona. La Jon 'e siria Kristin no'ona fana lo'onga suria kwaifa'ananaunga ala Jisas Kraes laka'u Ta'a ni Kwairiinga gila alafuu no'o mai suria. Nga Ta'a ni Kwairiinga laka'u, gila agasia no'o la Jisas alata ngaia 'e nana'i 'ua na fanua lo'oo 'i wado. Ma gila ka toto'o fana kwaifa'ananaunga suria.
Ni 'ola taringa'i 'ubulana buka lo'oo:
Mooringa 'ubulana nga lalanga (1:1—2:17)
Nga Marimae ala Jisas Kraes (2:18-29)
Ni wela ala God (3:1-24)
Nga wane ni fa'ananaunga na kotonga (4:1-6)
God 'e faate'enia fadauru tagoru kwaimaa 'uta'i fadauru kwairiu (4:7-21)
Nga tagoto'onga adauru ala Jisas 'e talariufia no'o fanua lo'oo 'i wado (5:1-21)
1
La Jisas Kraes na'a nga Alafuunga na mooringa
1 Nau ku giri kau famooru suria nga Alafuunga lo'oo ne'e kwatea mooringa kwala'imori. Ma ngaia 'e nana'i no'o mai 'ua na etalana fanua lo'oo 'i wado. Ma alata lo'oo, ameeru meru longoa, ma meru ka agasia no'o 'ania maa meeru. Ma meru ka gema to'ona no'o 'ania nga nimameeru. 2 Nga Mooringa kwala'imori lo'oo ne'e faata'i no'o, ma meru ka agasia no'o. Ngaia lo'oo 'imeeru meru fata 'i suria, ma meru ka kwairii suria no'o famooru, nga Mooringa firi lo'oo ngaia 'e nana'i funi no'o fe'enia God nga Mama'a. Ma God ka faate'enia no'o Mooringa kwala'imori lo'oo fameeru. 3 Meeru meru kwairii famooru suria 'olataa 'imeeru meru longoa ma meeru ka agasia suria nga Alafuunga ana Mooringa kwala'imori lo'oo, fana 'amoru lado fe'eni 'ameeru 'ubulana nga mooringa lo'oo. Mai 'ameeru meru lado fe'enia nga Mama'a ma la Jisas Kraes nga wela aana. 4 Ma meru ka giria ni 'ola lo'oo kau famooru fana nga aile'anga adauru* Tani girigiringa biri gila iiria ‘aile'anga amooru.’ 'ani ba'ita.
God na'a nga lalanga
5 Ma nga kwaifa'ananaunga lo'oo meru longoa fa'asia nga Wela na God ma meru ka iiria famooru ne'e 'ilo'oo: God ngaia nga lalanga, ma te'efuta logologo'angaa ngai 'amoe aana. 6 Ma lauta goru iiria goru lado kwaimaani no'o fe'enia God, ma goru ka nana'i mola 'ua 'ubulana logologo'angaa, dauru goru koto 'ania 'ola goru iiria, ma falafala adauru 'ame leka no'o 'i suria to'onga. 7 Tafe'ua lauta goru nana'i suria nga lalanga na God, 'ilaka'u God ngaia nana'i na lalanga, ma tagoru nana'i le'a fe'eni 'adauru te'efou, ma nga maenga ala Jisas, nga Wela aana, 'e fa'akwari adauru fa'asia nga rianga lo'oo te'efou.
8 Ma lauta goru iiria goru 'ame agea no'o ta rianga, dauru goru kotofia dauru taladauru ma to'onga ngai 'amoe adauru. 9 Tafe'ua lauta goru foulange'enia nga rianga adauru te'ana God, ngaia te'e 'olafanataa adauru, ma ka fa'akwari adauru fa'asia nga rianga lo'oo te'efou, tofuna ngaia 'e fa'ato'oa nga fataarunga'inga aana fana agelana ni 'ola lo'oori, ma ngaia 'e agea mola ni 'ola 'e odo. 10 Ma lauta goru iiria goru sia agea mola nga rianga, 'ino'ona ma goru iiria God nga wane ni kotonga mola, ma nga fatalana God 'e 'ame nana'i mola 'ubulana mango dauru.