NUMBERS
Di Beebaa Numbers
Di haga modongoohia:
Di Beebaa go Numbers e helekai di hai o di noho digau Israel i nia ngadau e mada haa, tugi i di madagoaa ne hagatanga mai digaula gi daha mo di Gonduu Sinai, ga dae adu gi di mada gi dua o tenua dela ne hagababa go God ang gi digaula. Di ingoo di beebaa deenei ne hanimoi i nia mee hagalabagau ala ne hai i nadau baahi, i di dau digaula i di Gonduu Sinai, i mua di nadau hagatanga mai gi daha mo di gowaa deelaa, mo di dau dela ne hai i lodo Moab, i baahi gi dua di monowai Jordan, nia ngadau e madalua duumaa nomuli. I mehanga o nia dau e lua aanei, digau Israel ga hula gi Kadesh Barnea i di baahi gi ngaaga Canaan. Digaula digi ulu gi lodo tenua o di hagababa i di madagoaa deelaa, nogo noho hua i nia gowaa aalaa i nia ngadau e logo. Muli di madagoaa deelaa, digaula ga hagatanga mai gi daha mo Kadesh, ga hula gi lodo di gowaa dela i di baahi gi dua di monowai Jordan. Malaa, hunu gau i digaula gu noho hua i di gowaa deelaa, gei digau ala ne dubu gu hagatogomaalia e hula laa lodo Jordan adu gi Canaan.
Di Beebaa go Numbers e helekai i digau Israel nia holongo e logo gu deai di nadau hagadagadagagee ai, nadau lodo gu paagege i nia haingadaa. Digaula gu hai baahi gi God mo Moses, go taane a God dela ne dongo belee dagi digaula. Di beebaa deenei e helekai i di manawa dahi o God i dono madamada humalia i ana daangada, ma e aha maa digaula gu paagege be gu de hagalongo. Di beebaa deenei e helekai labelaa i di hai o Moses i dono dogi ang gi God mo ana daangada mo di manawa hagakono i hunu madagoaa.
Di hagahonu di beebaa deenei:
Digau Israel e hagatanga mai gi daha mo di Gonduu Sinai (1.1—9.23)
a. Tahi dau o nia daangada (1.1—4.49)
b. Nnagadilinga haganoho mono haganohonoho (5.1—8.26)
c. Di lua Hagamiami Pasoobaa (9.1-23)
Mai di Gonduu Sinai ga dae gi Moab (10.1—21.35)
Nia mee ne hai i lodo Moab (22.1—32.42)
Nia mee llauehe di nadau lloomoi i Egypt ga dae gi Moab (33.1-49)
Nia boloagi i mua di nadau hula laa lodo di monowai Jordan (33.50—36.13)
1
Tahi dau o digau Israel
1 Tahi laangi i di lua malama o di lua ngadau i muli di hagatanga digau Israel i Egypt, Dimaadua ga helekai gi Moses i lodo di Hale laa dela e noho iei Mee i lodo di anggowaa Sinai. Mee ga helekai, 2 “Goe mo Aaron gaa dau nia daangada o nia madahaanau llauehe mo lligi o digau Israel. Hihia nia ingoo o nia daane huogodoo 3 ala e dagi madalua nadau ngadau be e mada mmaadua, ala e mee di hai digau dauwa. 4 Helekai gi nia dagi dagi dahi mai nia madahaanau gi hagamaamaa goolua.” 5-16 Aanei nia daane e dagi nadau madawaawa ala gu hilihili e hai di moomee deenei:
| Nia madawaawa | Nia dagi madahaanau |
| Reuben | Elizur tama daane a Shedeur |
| Simeon | Shelumiel tama daane a Zurishaddai |
| Judah | Nahshon tama daane a Amminadab |
| Issachar | Nethanel tama daane a Zuar |
| Zebulun | Eliab tama daane a Helon |
| Ephraim | Elishama tama daane a Ammihud |
| Manasseh | Gamaliel tama daane a Pedahzur |
| Benjamin | Abidan tama daane a Gideoni |
| Dan | Ahiezer tama daane a Ammishaddai |
| Asher | Pagiel tama daane a Ochran |
| Gad | Eliasaph tama daane a Deuel |
| Naphtali | Ahira tama daane a Enan |
17 Mai nia hagamaamaa o nia daane madangaholu maa lua aanei, Moses mo Aaron 18 gu haga dagabuli digau Israel huogodoo i di laangi matagidagi o di lua malama, gaa hihi nia ingoo o nia daangada huogodoo o nia madahaanau llauehe mo lligi. Nia ingoo o nia daane huogodoo, dagi madalua nadau ngadau be mada mmaadua, la guu hihi, 19 gii hai be telekai Dimaadua. Moses guu hihi nia daangada i lodo di anggowaa o Sinai. 20-46 Nia daane e madalua be e mada mmaadua ala e mee di hai digau dauwa la guu hihi nadau ingoo e hagatau gi nadau madahaanau llauehe mo nadau madahaanau lligi, daamada gi di madawaawa Reuben, tama daane madua Jacob. Aanei ono hulu dangada:
| Nia madawaawa | Nia hulu |
| Reuben | 46,500 |
| Simeon | 59,300 |
| Gad | 45,650 |
| Judah | 74,600 |
| Issachar | 54,400 |
| Zebulun | 57,400 |
| Ephraim | 40,500 |
| Manasseh | 32,200 |
| Benjamin | 35,400 |
| Dan | 62,700 |
| Asher | 41,500 |
| Naphtali | 53,400 |
| Huogodoo: | 603,550* Numbers 26.1-51 |
47 Digau Levi digi hihia dalia nia madawaawa ala i golo, 48 idimaa Dimaadua gu helekai gi Moses, 49 “Goe ma gaa hihi nia daane ala e mee di hai digau dauwa, hudee heia di madawaawa Levi gii dau dalia digaula. 50 Heia digau Levi gii dagi di Hale laa dela e noho iei Au mo ono goloo hai hegau huogodoo. Digaula e dagidagi di maa, ga hai hegau i lodo di maa, ga haga duu aga nadau hale laa e haganiga di maa. 51 Goodou ma ga haga mmaanege godou hale laa, go digau Levi e dugu dogu Hale laa gi lala, ga haga duu aga labelaa i di gowaa hoou dela e haga duu aga godou hale laa. Tangada ma ga hanimoi gi hoohoo gi di Hale laa le e daaligi gii made. 52 Digau Israel ala i golo e haga duu aga nadau hale laa e daudali nia hai o nadau hagabuulinga dangada, tangada e dahi e dau gi dono buini i lala nadau hagallebe. 53 Ge digau Levi e haga duu nadau hale laa e haganiga di Hale laa deelaa, e madamada humalia ai, gi dee hana tangada gi hoohoo gi di Hale laa ga hagawelewele iei Au gi digau Israel huogodoo.” 54 Malaa, digau Israel guu hai nia mee huogodoo Dimaadua ne helekai ai gi Moses.