Paipel RUT 3
3
Rut a küna eman pwülüan
3.1-18
Iwe, ekoch fansoun mürin Naomi a üreni Rut, “Nei föpwül, ifa usun, esap öch ai üpwe kütta eman pwülüom pwe epwe wor leniom ia kopwe kinamwe ie? Kopwe chechemeni pwe Poas eman märärich, ätewe ka fen nonom ren nöün kewe chon angang fefin. Kopwe rongorong. Lepwinei epwe wichi parli lon ewe lenien wichiwich. Iei mine kopwe tütü o epituk, kopwe pwal üföüf ufom mi mürina. Mürin kopwe feitiu ren ewe lenien wichiwich, nge kosap pwärukela ngeni ewe mwän tori an epwe pwi le mongö o ün. Iwe, lupwen epwe konola, kopwe nenengeni ewe leni ia a kon ie. Nge lupwen a annut, kopwe feila ren, kopwe särifätä pwölüpwölün pachapachan o konola ünükün. Iwe, epwe ürenuk mine kopwe föri.” Nge Rut a pälüeni, “Meinisin mine ka üreniei üpwe föri.” Iwe, Rut a feitiu ren ewe lenien wichiwich o föri usun chök mine inen pwülüan we a üreni. Nge lupwen Poas a pwi le mongö o ün, letipan a pwapwa. A feila lesopun ewe chukun föün parli o konola pwe epwe annut. Mürin, Rut a anifeto, a särifätä pwölüpwölün pachapachan o konola ünükün. Nge lukenipwin ewe mwän a mefi o kulu, a weitifengeni pwe a küna eman fefin mi kon ünükün pechen. Iwe, a aisini, “En iö?” Nge neminewe a pälüeni, “Ngang Rut noum we chon angang fefin. Pokiten en märärin pwülüei we, ka wisen tümwünüei. Kose mochen sipwe pwüpwülü.” 10 Iwe, Poas a üreni, “Kopwe feiöch me ren ewe Samol mi Lapalap, nei föpwül. Ei föförün kirikiröch ka föri a fen lapala seni ewe ka föri me mwan ngeni inen pwülüom we. Pun kosap tapwela mürin ekewe alüal, ika ra wöüngau ika pisekisek. 11 Nge iei kosap niuokus, Rut. Üpwe apwönüetä meinisin mine ka tüngor. Chienei meinisin lon ei telinimw ra silei pwe en eman fefin mi mürina. 12 Mi pwüng pwe ngang eman märärin pwülüom we mi wisen tümwünuk, nge mi wor eman märärin mi kan ngonuk lap seniei. Rut 2.20 13 Iwe, kopwe chök nonom lon ei pwinin. Nge lesosorun lesor sipwe pi are ätewe epwe föri wisan ngonuk usun wisen märärin pwülüom. Are epwe föri ina usun, a öch. Nge are esap mochen föri wisan ngonuk, üa akapel iten ewe Kot mi Manau pwe üpwe föri wisei ngonuk. Iwe, kopwe chök kokon tori lesosorun lesor.”
14 Iei mine Rut a konola ünükün pachapachen Poas tori lesosor. Iwe, a pwätä mwen eman esamwo tongeni silleni eman. Pun Poas esap mochen pwe eman epwe silei, pwe Rut a feito ren ei lenien wichiwich umwun parli. 15 Iwe, Poas a üreni Rut, “Kopwe uwato ena mangaku ka pwölü ngonuk o ameresala ikei.” Iwe, neminewe a föri iei usun, nge Poas a aükü ngeni ina epwe ükükün lime paun parli o ekietä won Rut. Mürin a liwinla ngeni ewe telinimw. 16 Nge lupwen Rut a tori lenien inen pwülüan we, Naomi a aisini, “Met pworausom, nei föpwül?” Iwe, Rut a apworausa meinisin mine Poas a föri ngeni. 17 A pwal apasa, “Poas a üreniei pwe üsap liwinto reöm fän asöülapö, iei mine a ngeniei ei ükükün parli.” 18 Iwe, Naomi a üreni, “Rut, kopwe chök witiwit tori om kopwe silei met epwe fis ngonuk. Pun Poas esap kinamwe tori epwe awesala ei mettoch ikenai.”

3:12: Rut 2.20