Paipel RUT 2
2
Rut a rusi umwun parli won fanüen Poas
2.1-23
Iwe, a wor eman märärin pwülüen Naomi we, eman mwän mi pisekisek seni ewe ainangen Elimelek itan Poas. Iwe, lon eu rän Rut ewe fin Moap a üreni Naomi, “Kopwe mwüt ngeniei pwe üpwe feila lon ekewe tanipi o rusi umwun parli ekewe chon pöküpök ra likitala. Üa lükü pwe üpwe küna eman mi mwüt ngeniei pwe üpwe rus me mürin.” Iwe, Naomi a üreni, “Kopwe feila, nei föpwül.” Lif 19.9-10; Tut 24.19 Iei mine Rut a feila lon ekewe tanipi o rusi umwun parli mi tur seni ekewe chon angangen räs. Iwe, a fis pwe a tori tanipin Poas, ätewe seni ewe ainangen Elimelek. Mürin, Poas a feito seni Petleem, a kapong ngeni ekewe chon angangen räs o apasa, “Ewe Samol mi Lapalap epwe etikemi.” Nge ir ra pälüeni, “Ewe Samol mi Lapalap epwe afeiöchuk.” Iwe, Poas a aisini ewe mi nemeni ekewe chon angangen räs, “Nöün iö ena föpwül?” Nge ätewe a pälüeni, “Neminan ewe fin Moap a eti Naomi le liwinto seni ewe fanü Moap. A tüngor ngeniei pwe üpwe mwüt ngeni an epwe rusifengeni ekewe umwun parli mi tur seni ekewe chon angangen räs. Iwe, a feito lesosor o likiitü le rurus tori iei, nge esamwo asösö fän eu.”
Mürin Poas a üreni Rut, “Kopwe rongorong, nei föpwül. Kosap feila o rus lon pwal eu tanipi, kosap sü seni ikei, nge kopwe chök nonom ren nei kewe chon angang fefin. Kopwe chök nenengeni ewe tanipi ia nei chon angangen räs ra angang ie, iwe, kopwe chök tapwela mürir. Üa fen allük ngeni nei kewe chon angang mwän pwe resap turunufaseek. Nge lupwen ka kaka, kopwe chök feila ren ekewe rumen koluk o ünümi mine nei kewe chon angang mwän ra üfato.” 10 Iwe, Rut a chapetiu won pwül o aisini, “Pwota ka eäni kirikiröch ngeniei o afäliei, nge ngang eman fin ekis?” 11 Nge Poas a pälüeni, “Üa fen rong meinisin mine ka föri ngeni inen pwülüom seni fansoun mälan pwülüom we. Üa pwal silei usun om likitala semom me inom me poputän fanüom o feito ren eu mwichen aramas kosap sileer me mwan. 12 Ewe Samol mi Lapalap epwe liwini ngonuk meinisin mine ka föri, nge liwinum epwe unus me ren ewe Samol mi Lapalap ewe Koten Israel, ewe ka feito ren pwe kopwe op fän pöün.” 13 Mürin Rut a üreni, “Ka fokun ümöümöch ngeniei, ai samol, pun ka echipaei o kapas pwetete ngeni noum chon angang fefin, inamwo ika sap ngang eman lein noum kei chon angang fefin.”
14 Iwe, lupwen fansoun mongö Poas a üreni Rut, “Etto ikei, kopwe mongö ekis pilawa o ottuku lon ei wain.” Iwe, a momotfengen me ekewe chon angangen räs, nge Poas a ngeni och föün wiich mi kapwich. Iwe, a mongö tori a mötüla, nge a chüen wor lusun. 15 Iwe, mürin än Rut feila pwe epwe rus, Poas a üreni nöün kewe chon angang mwän, “Oupwe mwüt ngeni neminan pwe epwe rus me lein ekewe pilük, nge ousap pinei. 16 Oupwe pwal üttawu ekoch umwun parli seni ekewe pilük o likiti ngeni neminan pwe epwe rusi, nge ousap apwüngü.”
17 Iwe, Rut a rus lon ewe tanipi tori lekuniol. Mürin a wichi mine a rusi, nge ükükün rusian parli ina epwe ükükün rüe me limu paun. 18 Iwe, a ekieta rusian we o feilong lon ewe telinimw. A aküna ngeni inen pwülüan we mine a rusi, a pwal ngeni lusun ewe mongö a iseis mürin an möt. 19 Nge Naomi a üreni, “Ia ka rus ie ikenai? Tanipin iö ka angang lon? Amwo Kot epwe afeiöchü ewe mwän a afäliik.” Iwe, Rut a apworausa ngeni Naomi pwe a angang lon tanipin eman mwän itan Poas. 20 Iwe, Naomi a kapas ngeni Rut, “Amwo ewe Samol mi Lapalap epwe afeiöchü Poas. Kot esap likitala an eäni kirikiröch ngenikich chon manau me ekewe mi mäla.” Naomi a pwal üra, “Ätewe eman märärich mi kan ngenikich, eman mi wisen tümwünükich.” Lif 25.25 21 Mürin Rut a apasa, “Ätewe a pwal üreniei pwe üpwe chök rurus me mürin nöün kewe chon angang tori ra awesala angangen ewe räs.” 22 Iwe, Naomi a kapas ngeni Rut, “Mi mürina, nei föpwül, pwe kopwe chök eti ekewe chon angang fefin lon tanipin Poas pwe kosap küna turunufas me lon pwal eu tanipi.” 23 Iei mine Rut a pach ngeni nöün Poas kewe chon angang fefin le rurus tori wesilan resin parli me resin wiich. Nge a chök nonom ren inen pwülüan we.

2:2: Lif 19.9-10; Tut 24.19

2:20: Lif 25.25