3
Kot a allükülük
3.1-8
1 Ifa usun, ekewe chon Juta ra feiöch lap seni ekewe chon lükün Israel? Ika a wor lomoten ar sirkomsais? 2 Ewer, a chomong ar feiöch lon chomong sokun pekin! Aeuin, Kot a lükü ngeniir an Kapas. 3 Nge ifa usun, are ekoch me leir resap allükülük? Iwe, wewen pwe Kot esap pwal allükülük? 4 Apwi, esap fokun ina usun! Kot epwe fokun let, inamwo ika aramas meinisin ra chon chofona. Usun ewe Toropwe mi Pin a apasa,
“Epwe fokun pwäla pwe en mi pwüng lupwen ka kapas.
Kopwe fokun win lon kapwüng lupwen ra apwünguk.” ✡ Kölf 51.4 5 Nge ifa usun, are ach föför esepwüng a pwärätä än Kot föför mi pwüng? Met sipwe tongeni apasa? Sipwe tongeni apasa pwe Kot a mwäl lupwen a liwini ngenikich liwinin ach föföringau? (Üa chök apasatä ekei kapas lon ekiekin aramas.) 6 Apwi, esap fokun ina usun! Are Kot esap pwüng, ifa usun an epwe tongeni apwüngü chon fanüfan? 7 Nge ifa usun, are ai likatuputup epwe afatöchü än Kot let o awattela an ling, pwota chök üpwe chüen kapwüng usun eman chon tipis? 8 Pwota chök ekoch aramas ra apasa, “Ousipwe föri mine a ngau, pwe epwe fisitä mine a mürina”? Ewer, ekoch aramas ra fen kapasingau usi ren ar atipisiei, pwe üa apasa ei sokun fos. Ir repwe küna kapwüng usun a fich ngeniir.
Esap wor eman aramas a pwüng
3.9-20
9 Iwe, ifa usun kich chon Juta, sia mürina seni ekewe chon lükün Israel? Apwi! Esap fokun ina! Üa fen pwärätä pwe chon Juta me chon lükün Israel ra wewefengen, ir meinisin ra nonom fän nemenien tipis. 10 Usun ekewe Toropwe mi Pin ra apasa:
“Esap fokun wor eman chon pwüng.
11 Esap wor eman mi mirit,
esap wor eman mi kütta Kot.
12 Ir meinisin ra kul seni Kot,
ir meinisin ra tokola.
Esap fokun wor eman a föri mine a pwüng,
esap fokun wor eman. ✡ Kölf 14.1-3; 53.1-3
13 Ar kewe kapas ra uren atuputup mi afeiengau.
Kapas chofona a towu seni chönawer,
pwal kapasen eniweniw mi usun chök poisonun serepenit ra towu seni tinawer. ✡ Kölf 5.9; 140.3
14 Ar kapas a ur ren ottek. ✡ Kölf 10.7
15 Ra müttir ngeni ar afeiengaua o niela aramas.
16 Ra afisätä tatakis me feiengau ekis meinisin ia ra feila ie.
17 Resap silei met repwe föri,
pwe repwe eäni kinamwe ngeni aramas, ✡ Ais 59.7-8
18 resap pwal silei ar repwe niuokusiti Kot.” ✡ Kölf 36.1
19 Iei sia silei pwe meinisin mine a mak lon ekewe Allük a fän iten chokewe mi nom fän ekewe Allük pwe epwe aükätiu än aramas meinisin künetipingen o atolonga unusen fanüfan fän än Kot kapwüng. 20 Pun esap wor eman aramas epwe küna pwüng ren an apwönüetä pwüngün ekewe Allük. Nge mine ekewe Allük ra föri, ra aiti ngeni aramas pwe ra tipis. ✡ Kölf 143.2; Kal 2.16
Usun mine Kot a föri pwe sipwe küna pwüng ren i
3.21-31
21 Nge iei a pwäla mine Kot a föri pwe aramas repwe küna pwüng me ren. Ei esap fis ren ekewe allük, inamwo ika än Moses kewe Allük me än ekewe soufos kapas ra pwäräta usun. 22 Kot a föri pwe aramas ra küna pwüng ren ar lükü Jesus Kraist. Kot a föri ei ngeni chokewe meinisin mi lükü Kraist, pun esap wor sokofesenin lefiler meinisin: ✡ Kal 2.16 23 Pun aramas meinisin ra tipis, ra pwal osun lingen Kot. 24 Nge ren än Kot we lifangen ümöümöch esap kamö, aramas meinisin ra küna pwüng ren Kraist, ewe mi angaseerela. 25 Kot a fangala Kraist, pwe ren an mäla a fis amusamusen än aramas tipis ren chaan pokiten ar lükü i. Kot a föri ei an epwe pwärätä pwe i a pwüng, pun lon an mosonotam esap apwüngü än ekewe aramas tipis ra föri me mwan. 26 Nge ikenai Kot a föri och fän iten än aramas tipis, pwe epwe pwärala an pwüng. Ren ei Kot a pwäräta pwe püsin i a pwüng, a pwal föri pwe ir mi lükü Jesus repwe küna pwüng.
27 Iwe, met sia tongeni aingaing won? Esor! Met popun pwe a iei usun? Pokiten sia aleasochisi ekewe Allük? Apwi, nge sia lükü. 28 Pun sia silei pwe eman a küna pwüng me ren Kot ren an chök lükü, sap ren an apwönüetä pwüngün ekewe Allük. 29 Are ifa usun, Kot än chök ekewe chon Juta Kot? Esap pwal i än ekewe chon lükün Israel Kot? Ewer, pwal i ar Kot. 30 Kot eman chök, i epwe föri pwe ekewe chon Juta repwe küna pwüng pokiten ar lükülük, i epwe pwal föri pwe ekewe chon lükün Israel repwe küna pwüng ren ar lükülük. ✡ Tut 6.4; Kal 3.20 31 Ifa usun, wewen pwe ren ei lükülük sipwele pöütala ekewe Allük? Apwi, esap fokun ina, nge sia fen anüküchara ekewe Allük.