Paipel PWÄRÄTÄ 22
22
Mürin ewe chon läng a pwal aküna ngeniei ewe chanpupun kolukun manau, a kurufat usun ewe fau itan kristal, a pupu seni fän än Kot me än ewe Lam lenien motun king Is 47.1; Sek 14.8 o a putiu lukalapen alen ewe telinimw. Iwe, lepekin ewe chanpupu me rüepek a wor irän manau ra ua fän engol me ruu lon eu ier, fän eu lon eu me eu maram, chör kewe ra tufichin apöchöküla chon ekewe mwü. Ken 2.9; Is 47.12 Esap wor och mi nom fän än Kot anümamau epwe nonom lon ewe telinimw.
Än Kot me ewe Lam lenien motun king epwe nom lon ewe telinimw o nöün kewe chon angang repwe angang o fel ngeni. Sek 14.11 Repwe küna won mesen Kot, nge itan epwe mak won chamwer. Esap chüen wor pwin, esap pwal chüen lomot rer lamp ika akkar, pun ewe Samol Kot epwe ar saram, nge repwe nemenem usun king tori feilfeilachök. Ais 60.19; Tan 7.18
Än Jesus liwinsefälito
22.6-17
Mürin ewe chon läng a üreniei, “Ekei kapas ra let o allükülük. Ewe Samol Kot, ewe Kot mi fang ngeni ekewe soufos Ngünün, a tinala nöün chon läng pwe epwe pwäri ngeni nöün kewe chon angang mine epwe fisikai.”
Iei alon Jesus, “Nengeni, üpwe warekai. Ra feiöch chokewe mi aleasochisi ekewe kapasen osuni mi mak lon ei puk!”
Ngang Johannes üa rongorong o küna ekei mettoch meinisin. Iwe, wesin ai rongorong o küna ekei mettoch, üa chapetiu arun pechen ewe chon läng mi aküna ngeniei ekei mettoch, pwe üpwe fel ngeni. Nge i a üreniei, “Kosap föri iei usun! Ngang eman chiechiom chon angang me chiechien pwiüm kewe soufos, pwal chiechien chokewe meinisin mi aleasochisi ekewe kapas mi mak lon ei puk. Kopwe fel ngeni Kot!” 10 Iwe, a üreniei, “Kosap pwauni ekewe kapasen osuni mi mak lon ei puk, pun a arapoto ewe fansoun lupwen ekei mettoch meinisin repwe fisitä. 11 Iö a föri mine esap pwüng epwe chök sopwela le föri mine esap pwüng, nge iö a föri mine a limengau epwe chök sopwela le föri mine a limengau. Iö a föri mine a pwüng epwe chök sopwela le föri mine a pwüng, nge iö a pin epwe chök sopwela lon an pin.” Tan 12.10
12 Iei alon Jesus, “Nengeni, üpwe warekai! Iwe, üpwe uwei ai kewe liwin, pwe üpwe ngeni eman me eman liwinin an föför. Ais 40.10; 62.11; Kölf 28.4; Jer 17.10 13 Ngang ewe Alfa me Omeka, ewe Aemanün me Amüchülan, ewe Popun me ewe Sopolan.” Pwär 1.8,17; 2.8; Ais 44.6; 48.12
14 Ra feiöch chokewe mi limeti üfer pwe repwe limöch, pwe epwe wor ar pwüüng ar repwe mongö seni uän ewe irän manau, repwe pwal tolong lon ekewe asamalap o tolong lon ewe telinimw. Ken 2.9; 3.22 15 Nge me lükün ewe telinimw a wor chon föri sokun föför mi ngau usun kolak, chon föri angangen rong, chon lisowu, chon niela aramas, chon angang ngeni anümwäl me chon chofona lon ar kapas pwal lon ar föför.
16 “Ngang Jesus, üa tinato nei chon läng, pwe epwe asile ngenikemi ekei mettoch lon ekewe mwichefel. Ngang eman mwirimwirin ewe ainangen Tafit, Ngang ewe füün rän mi saramaram.” Ais 11.1,10 17 Iwe, Ngünmifel me ewe Fin apwüpwülü söfö ra apasa, “Etto!” Ir meinisin mi rongorong ekei kapas repwe apasa, “Etto!” Iwe, iö mi kaka epwe etto, nge iö a mochen epwe ünümi ewe kolukun manau, nge esap möni, epwe etto. Ais 55.1
Kapasen lesopolan
22.18-21
18 Ngang Johannes, üa fönöü meinisin mi rongorong ekei kapasen osuni mi mak lon ei puk: Are eman epwe apacha och ngeni ekei kapas, Kot epwe apacha ngeni ekewe feiengau mi mak lon ei puk. 19 Nge are eman epwe angei och seni ekewe kapasen osuni mi mak lon ei puk, Kot epwe angei seni wisan me won ewe irän manau pwal wisan me won ewe Telinimw mi Pin usun a mak lon ei puk. Tut 4.2; 12.32
20 Ewe eman mi pwärätä ekei mettoch a apasa, “Ewer, ngang üpwe warekai.” Amen! Kopwe etto äm Samol Jesus! 21 Ümöümöchün ach Samol Jesus epwe nonom ren nöün Kot kewe aramas meinisin. Amen.

22:1: Is 47.1; Sek 14.8

22:2: Ken 2.9; Is 47.12

22:3: Sek 14.11

22:5: Ais 60.19; Tan 7.18

22:11: Tan 12.10

22:12: Ais 40.10; 62.11; Kölf 28.4; Jer 17.10

22:13: Pwär 1.8,17; 2.8; Ais 44.6; 48.12

22:14: Ken 2.9; 3.22

22:16: Ais 11.1,10

22:17: Ais 55.1

22:19: Tut 4.2; 12.32