148
Förien Kot meinisin ra angei föneer pwe repwe mwareiti i
148.1-14
Ousipwe mwareiti ewe Samol mi Lapalap.
Oupwe mwareiti ewe Samol mi Lapalap seni won läng,
oupwe mwareiti i me won ekewe leni tekia.
Oupwe mwareiti i, ämi nöün chon läng meinisin.
Oupwe mwareiti i, ämi nöün mwichen sounfiun läng meinisin.
 
Oupwe mwareiti i, ämi akkar me maram,
oupwe mwareiti i, ämi fü meinisin mi tin.
Oupwe mwareiti i, ämi kewe läng mi fokun tekia,
pwal ämi kewe koluk asen ekewe läng.
 
Ir meinisin repwe mwareiti iten ewe Samol mi Lapalap.
Pun i a allük, nge ir ra fisitä.
Kot a anüküchareer lon lenier pwe repwe nom tori feilfeilachök
ren eu allük esap tongeni tala.
 
Oupwe mwareiti ewe Samol mi Lapalap seni won fanüfan,
ämi kewe mönün lematau mi fokun watte me ämi kewe leni mi alolol,
ämi inefi me ütten fau, sno me kuchu,
pwal mölümöl mi apwönüetä an allük.
 
Oupwe mwareiti i, ämi kewe chukutekia me chukutekison meinisin,
ämi kewe irä mi ua me ämi irä setar meinisin,
10 ämi manmwacho me manfesir,
ämi mantötö me mansüsü meinisin.
 
11 Oupwe mwareiti i, ämi kewe kingen fanüfan me chon ekewe mwü meinisin,
ämi samol me chon nemenem meinisin won fanüfan,
12 ämi alüal me föpwül,
pwal chinlap me semirit.
 
13 Ir meinisin repwe mwareiti iten ewe Samol mi Lapalap,
pun itan a tekia seni it meinisin,
an ling a nom asen fanüfan me läng.
14 A apöchöküla mwün nöün aramas.
Iei mine nöün kewe chon pin meinisin ra mwareiti,
ir ekewe aramasen Israel a echeniir.
Ousipwe mwareiti ewe Samol mi Lapalap.