Paipel KÖLFEL 145
145
Kölün mwareiti än Kot kirikiröch me manaman
145.1-21
Echö än Tafit kölün mwareiti Kot.
Üpwe ingemwareiti ai Kot me ai king,
üpwe mwareiti itom tori feilfeilachök.
Iteiten rän üpwe mwareituk
o alinga itom tori feilfeilachök. Ewe Samol mi Lapalap a tekia, aramas meinisin repwe fokun mwareiti i.
Esap wor eman a tongeni aükü an tekia.
 
Eu täppin aramas epwe ainga om kewe angang ngeni pwal eu,
repwe arongafeili om kewe föför mi manaman.
Repwe kapas usun lingen om tekia,
nge ngang üpwe ekinlonei usun amwararen om kewe föför.
Aramas repwe asilefeili manamanen om kewe föför mi eniwokus,
nge ngang üpwe arongafeili om tekia.
Repwe apworausa usun om kirikiröch mi lapalap
o osomong le kölü om pwüng.
Ewe Samol mi Lapalap a kirikiröch o lukpwetete,
a songomang o wöün tong ellet.
Ewe Samol mi Lapalap a kirikiröch ngeni aramas meinisin,
an tong a nom won förian meinisin.
 
10 Ai Samol mi Lapalap, meinisin mine ka föri repwe kilisou ngonuk,
noum chon pin meinisin repwe mwareituk.
11 Repwe kapas usun lingen mwum
o apworausa usun om manaman,
12 pwe aramas meinisin repwe silei om föför mi manaman
me amwararen lingen mwum.
13 Mwum eu mwü mi nom tori feilfeilachök,
nge om nemenem a nonom won ekewe täppin aramas meinisin.
Ewe Samol mi Lapalap a allükülük lon an pwon meinisin,
a eäni ümöümöch ngeni förian meinisin.
14 Ewe Samol mi Lapalap a aütäi ir meinisin mi turula,
a awenätä sokürün ir mi pworotiu.
 
15 Mönümanau meinisin ra nennetä ngonuk fän ar apilükülük,
pun en ka ngeniir ener mongö, lupwen a tori otun.
16 Ka suki poum
o ngeni ekewe mönümanau meinisin mine repwe menemenöch ren.
 
17 Ewe Samol mi Lapalap a pwüng lon meinisin mine a föri
o kirikiröch lon an kewe föför meinisin.
18 Ewe Samol mi Lapalap a arap ngeni ir meinisin mi köri,
a arap ngeniir meinisin mi köri fän wenechar.
19 A föri mochenin ir meinisin mi niuokusiti i,
a rong ar siö o amanaueer.
20 Ewe Samol mi Lapalap a tümwünü meinisin mi echeni i,
nge a arosala ekewe aramasangau meinisin.
 
21 Üpwe mwareiti ewe Samol mi Lapalap,
mönümanau meinisin repwe mwareiti itan mi pin tori feilfeilachök.