Paipel KÖLFEL 140
140
Än Tafit iotekin tüngor pwe Kot epwe tümwünü seni chon ariaföüü
140.1-13
Ngeni ewe mi emweni chon köl: Echö än Tafit köl.
Ai Samol mi Lapalap, kopwe angasaei seni aramas mi ngau,
kopwe tümwünüei seni aramas mi mwäneson,
chokewe mi ekiekietä föför mi ngau lon leluker
o popuetä maun iteiten fansoun.
Ra akkeni chönawer pwe a ken usun chönawen eman serepenit,
nge ar kapas a usun chök poisonun serepenit. Rom 3.13
Ai Samol mi Lapalap, kopwe epeti seniei ekewe aramasangau.
Kopwe tümwünüei seni aramas mi mwäneson,
chokewe mi rawangauaei pwe üpwe chepetek.
Aramas mi lamalamtekia ra aopala eu sär fän itei,
ra ameresala ar kewe chew
o soni ar kewe likatup aropen ewe al pwe repwe liapeniei.
 
Üa kapas ngeni ewe Samol mi Lapalap, “En ai Kot.”
Ai Samol mi Lapalap, kopwe aüselinga ai kewe tüngor pwe kopwe ümöümöch ngeniei.
Ai Samol mi Lapalap ai Kot, en chon angasaeila mi pöchökül,
ka epeti seniei feiengau lon maun.
Ai Samol mi Lapalap, kosap mwütätä mochenin ekewe aramasangau,
kopwe atai ar kewe rawangau.
 
Chokewe mi pwelifeiliei ra chimwetä mökürer.
Amwo ar kapasen eniweniw ngeniei epwe püsin küür.
10 Amwo molien ekkei mi sarara epwe turutiu wor.
Repwe katurulong lon ekewe pwang, nge resap chüen tosefäliwu.
11 Amwo ekewe chon etipisimwäli chon arur resap nonomotiu lon ewe fanü.
Amwo feiengau epwe chekaiiti ewe aramas mi mwäneson.
 
12 Üa silei pwe en ai Samol mi Lapalap ka peni ekewe mi wöüngau
o eäni pwüng ngeni ekewe chon mwelele.
13 Ellet, ekewe chon pwüng repwe mwareiti itom,
ekewe mi wenechar repwe nonom fän mesom.

140:3: Rom 3.13