Paipel KÖLFEL 139
139
Kot a silei o tufich ngeni mettoch meinisin
139.1-24
Ngeni ewe mi emweni chon köl: Echö än Tafit köl.
Ai Samol mi Lapalap, en ka atittinaei, ka pwal sileei.
Ka silei fansoun ai mottiu me ai ütä,
ka silei ai ekiek kana me toau.
Ka nenengeniei, lupwen üa angang, pwal lupwen üa asösö,
ka silei ai kewe föför meinisin.
Nengeni, mwen ai üsamwo kapas,
en, ai Samol mi Lapalap, ka fen unusen silei mine üpwe apasa.
Ka pweliei me lükisöküri pwal fän mesei,
ka pwal iseis poum woi.
Ei sokun silelap a fokun amwarar ngeniei,
a pwal tekia ngeniei pwe üsap tongeni to won.
 
Ia üpwe feila ie seni Ngünum?
Nge ia üpwe süla ie seni fän mesom?
Are üpwe feitä läng, en ka nom ikenan.
Nge are üpwe kon lon lenien sotup, en ka pwal nom ikenan.
Are üpwe ässila ngeni ötiu ewe ia akkar a tötä me ie,
ika nonom lesopolan matau me lotou,
10 en kopwe emweniei me ikenan,
nge pöüifichum epwe amwöchüei.
11 Are üpwe apasa pwe rochopwak epwe pwölüeila,
nge ewe saram ünüki epwe wiliti pwin,
12 inamwo nge ewe rochopwak esap roch me reöm,
nge pwin a saram usun lerän,
pun rochopwak a usun chök saram me reöm.
 
13 En ewe mi förätä masouen loi,
en ka achufengeniei me lon letipen inei.
14 Üa mwareituk, pokiten a amairü o amwarar om föri ei.
Om kewe föför ra amwarar.
Üa fokun sileöchü ei.
15 Chün inisi resap mon senuk,
lupwen üa för lemonomon o kachufengen
lon ekewe leni mi alolol lon fanüfan.
16 En ka fen künaei, lupwen esamwo wor uluuli.
Iteiten ränin manauei meinisin, ka awora fän itei, ra fen mak lon noum puk
mwen ar resamwo fis.
17 Ai Samol mi Lapalap, om kewe ekiek ra fokun aüchea ngeniei.
Ra kon fokun chomong.
18 Ika ngang üpwe aleaniir, repwe chomong seni föün pi.
Lupwen üa pwök, üa chüen nom reöm.
 
19 Ai Kot, amwo kopwe niela ekewe aramasangau.
Amwo ekewe mwän mi nimanauei aramas repwe sü seniei.
20 Ir ekewe mi kapasingau usum,
ekewe chon oputom ra föünimwäli itom.
21 Ai Samol mi Lapalap, üa fokun oput chokewe mi oputok.
Üa fokun nou chokewe mi ü ngonuk.
22 Üa fokun oput ir
o aleanirelong lein chon oputaei.
 
23 Ai Kot, kopwe atittinaei o silei letipei.
Kopwe sotuniei o silei ai ekiek.
24 Kopwe pi ika mi wor och mi ingau lon manauei,
nge kopwe emweniei won ewe al esemüch.