119
An Kot kewe allük ra mürina
119.1-176
Ra feiöch chokewe resap tipis lon manauer,
chokewe mi aleasochisi än ewe Samol mi Lapalap kewe allük.
Ra feiöch chokewe mi tümwünü an kewe allük.
chokewe mi kütta i ren unusen leluker,
chokewe resap föri mine a ngau,
nge ra chök föri letipen Kot.
Ai Kot, en ka asile ngenikem om öüröür,
pwe aipwe tümwünüöchüür le apwönüetä.
Amwo üpwe likitü le apwönüetä om kewe allük.
Mürin üsap säw,
lupwen üa ekiekifichi om kewe allük meinisin.
 
Üpwe mwareituk fän wenecharen lelukei,
lupwen üa kaiö pwüngün om kewe pwüüng.
Üpwe aleasochisi om kewe allük.
Kosap fokun likitieila.
 
Epwe ifa usun än eman alüal tümwünü manauan pwe epwe limöch?
Ei a chök tongeni fis ren an aleasochisi om kapas.
10 Üa küttok ren unusen lelukei.
Kosap mwüt ngeniei pwe üpwe aleasolap ngeni om kewe allük.
11 Üa iseis om kapas lon lelukei
pwe üsap tipis ngonuk.
12 Ai Samol mi Lapalap, üpwe mwareituk.
Kopwe aiti ngeniei om kewe allük.
13 Üpwe apasasefäli om kewe pwüüng meinisin
ka ngenikem.
14 Üa pwapwaäsini le apwönüetä om kewe allük
lap seni ai pwapwaäsini ekewe wöü meinisin.
15 Üpwe ekinlonei om kewe öüröür
o ekiekifichi mine ka aiti ngeniei.
16 Üpwe pwapwaäsini om kewe allük,
nge üsap manlükala om kewe kapas.
 
17 Kopwe kirikiröch ngeniei ngang noum chon angang,
pwe üpwe manau o aleasochisi om kapas.
18 Kopwe suki mesei pwe üpwe küna
ekewe mettoch mi amwarar seni lon om kewe allük.
19 Ngang eman chon siamü won fanüfan,
kosap aopala om kewe allük seniei.
20 Lelukei a tatakis
ren ai positi om kewe pwüüng fansoun meinisin.
21 Ka apwüngü ekewe mi lamalamtekia,
ra anümamau, chokewe mi aleasolap ngeni om kewe allük.
22 Kopwe angei seniei säw me itengau,
pun ngang üa tümwünü om kewe allük.
23 Inamwo are samol kana ra mwichfengen o rawangauaei,
nge ngang noum ei chon angang üpwe chök ekinlonei om kewe allük.
24 Üa pwapwaäsini om kewe allük,
ir chon öüröüraei.
 
25 Üa konola won pwül moromor,
kopwe apöchökülaei usun ka pwon lon om kapas.
26 Üa pwärätä meinisin mine üa föri, nge en ka pälüeniei.
Kopwe aiti ngeniei om kewe allük.
27 Kopwe awewe ngeniei usun ai üpwe fetal fän om kewe öüröür,
nge ngang üpwe ekinlonei om kewe föför mi amwarar.
 
28 Üa fokun kechü ren ai letipeta.
Kopwe apöchökülaei usun ka pwon lon om kapas.
29 Kopwe amwöchüei pwe üsap fetal won ekewe al rese pwüng.
Lon om ümöümöch kopwe aiti ngeniei om we allük.
30 Üa filätä ai üpwe fetal won ewe al mi let,
üa anomu mwei om kewe pwüüng.
31 Ai Samol mi Lapalap, üa kamwöchünük won om kewe allük,
kosap mwüt ngeniei pwe üpwe säw.
32 Üpwe fokun aleasochisi om kewe allük,
pun ka alapala ai sile.
 
33 Ai Samol mi Lapalap, kopwe aiti ngeniei wewen om kewe allük,
nge ngang üpwe aleasochisiir fansoun meinisin.
34 Kopwe fang ngeniei silelap, pwe ngang üpwe aleasochisi om kewe allük
o apwönüretä ren unusen lelukei.
35 Kopwe emweniei pwe üpwe tongeni aleasochisi om kewe allük,
pun ngang üa pwapwaäsiniir.
36 Kopwe akulu lelukei ngeni om kewe allük,
nge sap ngeni mochenian win.
37 Kopwe akulu mesei seni mettoch mi lomotongau,
nge kopwe amanauaei ren om kapas.
38 Kopwe apwönüetä om pwon ngeniei ngang noum chon angang,
ewe pwon ka eäni ngeni chokewe mi niuokusituk.
39 Kopwe angei seniei ewe itengau üa niuokusiti,
pun om kewe pwüüng ra mürina.
40 Üa fokun positi om kewe kapasen öüröür.
Kopwe amanauaei, pun en ka pwüng.
 
41 Ai Samol mi Lapalap, kopwe pwäri ngeniei om tong ellet,
kopwe amanauaei usun ka fen pwon.
42 Mürin üpwe tongeni pälüeni chokewe mi ämängauaei,
pun üa lükü om kapas.
43 Kopwe atufichiei pwe üpwe apasawu kapas mi let fansoun meinisin,
pun ai apilükülük a nom won om kewe pwüüng.
44 Üpwe aleasochisi om kewe allük
iteiten fansoun tori feilfeilachök.
45 Iwe, üpwe fetalchöchö fän ngasala,
pun üa kütta om öüröür.
46 Üpwe pwal pwärätä om kewe allük me fän mesen ekewe king,
nge üsap säw.
47 Üa fokun pwapwa le aleasochisi om kewe allük,
pun üa aücheaniir.
48 Üa etiwa o aücheani om kewe allük,
üpwe pwal ekinlonei om kewe pwüüng.
 
49 Kopwe chechemeni om kapas ngeniei ngang noum we chon angang,
ewe kapas mi ngeniei apilükülüköch.
50 Iei ai chip lon ai riaföü,
pwe om pwon a ngeniei manau.
51 Ekewe chon lamalamtekia ra fokun turunufaseei,
nge ngang üsap kul seni om allük.
52 Ai Samol mi Lapalap, lupwen üa ekieki usun om kewe pwüüng,
ra nonom seni me lomlom, üa chip.
53 Lingeringer watte a toriei,
lupwen üa küna ekewe aramasangau mi purätiu om kewe allük.
54 Üa kökkölü om kewe allük ekis meinisin
ia üa siamü ie.
55 Ai Samol mi Lapalap, üa chechemenuk lepwin
o ekieki usun om kewe allük.
56 Iei usun mine üa chök föföri:
Üa aleasochisi om kewe öüröür.
 
57 Ai Samol mi Lapalap, en chök ineti.
Üpwe pwon pwe üpwe aleasochisi om kewe kapas.
58 Üa tüngor seni unusen lelukei om kopwe kirikiröch ngeniei.
Kopwe ümöümöch ngeniei usun ka pwon.
59 Üa ekieki usun ai kewe föför,
mürin üa kul ngeni om kewe allük.
60 Üa amüttiriei pwe üpwe aleasochisi om kewe allük,
nge üsap mang.
61 Inamwo ika ekewe aramasangau ra anomu eu sär me mwei,
nge üsap manlükala om kewe allük.
62 Üa pwätä lukenipwin
pwe üpwe mwareituk pokiten om kewe allük mi pwüng.
63 Ngang eman chienen chokewe meinisin mi niuokusituk,
chokewe mi aleasochisi om kewe öüröür.
64 Ai Samol mi Lapalap, fanüfan a ur ren om tong ellet.
Kopwe aiti ngeniei om kewe allük.
 
65 Ai Samol mi Lapalap, ka eäni kirikiröch ngeniei
ngang noum chon angang usun ka pwon.
66 Kopwe aiti ngeniei mirit me silelap,
pun üa lükü om kewe allük.
67 Mwen om atolongaei lon riaföü üa mwälechfeil,
nge iei üa aleasochisi om kapas.
68 En ka kirikiröch o föri mine a mürina.
Kopwe aiti ngeniei om kewe allük.
69 Ekewe mi lamalamtekia ra aitengauaei ren ar chofana,
nge üa aleasochisi om kewe öüröür ren unusen lelukei.
70 Leluker esap wor memmef lon,
nge ngang üa pwapwaäsini om allük.
71 A mürina ngeniei pwe üa riaföü,
pun ren ei üa tongeni kaiö om kewe allük.
72 Ewe allük ka ngenikem a mürina ngeniei
lap seni ngeröün föün kolt me silifer.
 
73 En ka föriei o tümwünüei.
Kopwe fang ngeniei mirit pwe üpwe tongeni kaiö om kewe allük.
74 Chokewe mi niuokusituk repwe pwapwa, lupwen repwe künaei,
pun üa apilükülükü om kewe kapas.
75 Ai Samol mi Lapalap, üa silei pwe om kewe apwüng ra pwüng,
fän om allükülük ka ariaföüüei.
76 Om tong ellet epwe achipaei,
usun ka pwon ngeniei ngang noum we chon angang.
77 Om ümöümöch epwe toriei pwe üpwe tongeni manau,
pun üa pwapwaäsini om allük.
78 Amwo ekewe chon lamalamtekia repwe säw,
pun ra atipisiei, nge ese wor popun.
Nge me rei, üpwe ekinlonei om kewe öüröür.
79 Amwo chokewe mi niuokusituk repwe feito rei,
ir chokewe mi silei om kewe allük.
80 Amwo üpwe fokun aleasochisi om kewe allük,
pwe üsap säw.
 
81 Üa fokun apwangapwangala ren ai positi om kopwe amanauaei,
nge üa apilükülükü om kapas.
82 Mesei ra toputopula ren ai akköürü mine ka pwon.
Üa ais, “Inet kopwe achipaei?”
83 Inamwo ika üa lomotongau usun chök eu rumen wain seni silin man mi nürüfengen ren ötüöt,
nge üsap manlükala om kewe allük.
84 Ifa ükükün fansoun ngang noum ei chon angang üpwe engila?
Inet kopwe apwüngü chokewe mi ariaföüüei?
85 Ekewe chon lamalamtekia ra tuw pwang pwe üpwe turulong lon,
ir chokewe resap aleasochisi om allük.
86 Om kewe allük meinisin ra let.
Nge aramas ra chök ariaföüüei ren ar kapas chofana. Kose mochen kopwe alisiei.
87 Arapakan ar repwe ärieila me won fanüfan.
Nge ngang üsap likitala om kewe öüröür.
88 Lon om tong ellet kopwe amwöchü manauei,
pwe üpwe tongeni aleasochisi om kewe allük.
 
89 Ai Samol mi Lapalap, om kapas a nüküchar me lon läng,
a nom tori feilfeilachök.
90 Om allükülük a nonom tori ekewe täppin aramas meinisin.
En ka anomu fanüfan lon lenian, nge a nonomopos.
91 Om kewe allük ra nonom tori ikenai,
pun mettoch meinisin ra angang ngonuk.
92 Are üsap pwapwaiti om allük,
üpwe mäla lon ai riaföü.
93 Üsap fokun manlükala om kewe öüröür,
pun ka amanauaei pokiter.
94 Ngang noum, kopwe amanauaei,
pun ngang üa kütta om öüröür.
95 Ekewe aramasangau ra okoperiei pwe repwe nieila,
nge ngang üpwe ekinlonei om kewe allük.
96 Üa küna pwe mi wor öükükün mettoch meinisin,
nge om allük esap wor öükükün.
 
97 Üa fokun aücheani om allük,
üa ekinlonei fansoun meinisin.
98 Om allük a atipachemaei pwe üa tipachem lap seni chon oputaei,
pun a nonom rei fansoun meinisin.
99 A wor ai sile lap seni än nei kewe sense sile,
pun üa ekinlonei om kewe allük.
100 Üa mirit lap seni ekewe reikewe,
pun üa aleasochisi om kewe öüröür.
101 Üsap föri sokun föför mi ngau,
pun üa aleasochisi om kewe kapas.
102 Üsap tok seni om kewe pwüüng,
pun püsin en ai chon kait.
103 Om kewe kapasen pwon ra fokun arar me rei,
ra arar seni chönün chunen me lon awei.
104 Üa angei ai mirit seni om kewe öüröür,
iei mine üa oput ekewe föför mi ngau meinisin.
 
105 Om kapas eu lamp a aiti ngeniei ia üpwe ipwela ie,
a pwal asarama alei.
106 Üa pwon fän akapel o anükünükü
pwe üpwe aleasochisi om kewe öüröür mi pwüng.
107 Üa fokun riaföü. Ai Samol mi Lapalap,
kopwe amanauaei, usun ka pwon lon om kapas.
108 Ai Samol mi Lapalap, kopwe aüselinga ai iotekin kilisou
o aiti ngeniei om kewe pwüüng.
109 Üa fangala manauei pwe üpwe tolong lon feiengauen mäla fansoun meinisin,
nge üsap manlükala om kewe allük.
110 Ekewe aramasangau ra anomu eu sär fän itei,
nge ngang üsap aleasolap ngeni om kewe öüröür.
111 Om kewe allük wöüi tori feilfeilachök.
Ewer, ra apwapwai lelukei.
112 Üa filätä pwe üpwe apwönüetä om kewe allük fansoun meinisin
tori sopolan manauei.
 
113 Üa oput ekewe aramas mi tiperuu,
nge üa aücheani om allük.
114 En ai lenien op me ai chon tümwün.
Üa anomu ai apilükülük won om kewe kapas.
115 Oupwe sü seniei, ämi chon föri mine a ngau,
pwe üpwe aleasochisi än ai Kot kewe allük.
116 Kopwe alisiei pwe üpwe tongeni manau, usun ka fen pwon,
nge kosap mwütätä pwe üpwe lichipüng lon ai apilükülük.
117 Kopwe amwöchüeitä pwe üpwe manau,
üpwe meniniti om kewe allük fansoun meinisin.
118 Ka oput chokewe meinisin mi aleasolap ngeni om kewe allük.
Ewer, ar tipachemsolä esap wor lomotan.
119 Ekewe aramasangau meinisin won fanüfan ra usun chök mettoch mi limengau me fän mesom,
iei mine üa aücheani om kewe öüröür.
120 Inisi a chechech ren ai niueituk.
Üa niuokus ren om kewe kapwüng.
121 Üa fen föri mine a wenechar o pwüng,
kosap likitiei ngeni chon ariaföüüei.
122 Kopwe pwon pwe kopwe alisiei ngang noum chon angang,
nge kosap mwüt ngeni ekewe chon lamalamtekia pwe repwe ariaföüüei.
123 Mesei ra toputopula ren ai aköürü om kopwe amanauaei,
pwal ren ai aköürü om kopwe apwönüetä om kewe pwon mi pwüng.
124 Lon om föför ngeniei ngang noum chon angang kopwe pwäri om tong ellet
o aiti ngeniei om kewe allük.
125 Ngang noum chon angang, kopwe ngeniei mirit
pwe üpwe tongeni silei om kewe allük.
126 Ai Samol mi Lapalap, a tori fansoun pwe kopwe föri om angang,
pun aramas ra puri om allük.
127 Ellet, üa aücheani om kewe allük lap seni kolt
me kolt mi mürina.
128 Iei mine üa apwönüetä om kewe öüröür meinisin,
nge üa oput ekewe föför mi mwäl.
 
129 Om kewe allük ra fokun amwarar,
iei mine üa aleasochisiir ren unusen lelukei.
130 Lupwen a suk ngenikem masouen om kewe kapas, a wor saram,
a ngeni ekewe chon wewemang tipachem.
131 Lon ai positi om kewe allük
üa amassaw o ngasepwich.
132 Kopwe kuluto o ümöümöch ngeniei,
usun ka föri ngeni chokewe mi echenuk.
133 Kopwe anükücharaei pwe üsap tur, usun ka pwon,
nge kosap mwüt ngeni tipis epwe nemenieila.
134 Kopwe angasaei seni ekewe aramas mi ariaföüüei,
pwe üpwe tongeni aleasochisi om kewe öüröür.
135 Kopwe netiu woi ngang noum chon angang fän om kirikiröch
o aiti ngeniei om kewe allük.
136 Chönün mesei ra pupu usun chanpupu,
pun aramas resap aleasochisi om kewe allük.
 
137 Ai Samol mi Lapalap, en ka pwüng,
nge om kewe kapwüng ra pwüng.
138 Om kewe allük ka ngenikem ra pwüng,
ra pwal unusen allükülük.
139 Ai tiliken a apwangapwangaeila,
pun chon oputaei ra tümwününgauei om kewe kapas.
140 Om kewe pwon ra asosotöch,
ngang noum chon angang üa aücheaniir.
141 Üa itengau o küna koput,
nge üsap manlükala om kewe öüröür.
142 Om we pwüng a nom tori feilfeilachök,
nge om allük a let.
143 Weires me eniweniw ra toriei,
nge om kewe allük ra apwapwaei.
144 Om kewe allük ra pwüng tori feilfeilachök.
Kopwe ngeniei mirit pwe üpwe manau.
 
145 Üa siö ngonuk ren unusen lelukei.
Ai Samol mi Lapalap, kopwe pälüeniei.
Ngang üpwe aleasochisi om kewe allük.
146 Üa siö ngonuk.
Kopwe amanauaei pwe üpwe apwönüetä om kewe allük.
147 Üa pwätä wünümweerän o siö pwe kopwe alisiei.
Üa apilükülükü om kewe kapas.
148 Üa nenela lon unusen pwin
pwe üpwe ekinlonei om we pwon.
149 Kopwe aüselinga mweliei lon om tong ellet.
Ai Samol mi Lapalap, kopwe amanauaei fän om pwüng.
150 Chokewe mi ariaföüüei ra kaneto fän ar ekingau,
nge resap fokun apwönüetä om kewe allük.
151 Nge en ka arap ngeniei, ai Samol mi Lapalap,
om kewe allük meinisin ra let.
152 Seni me lomlom üa silei seni om kewe allük,
pwe ka anüküchareer tori feilfeilachök.
 
153 Kopwe nengeni ai riaföü o angasaei,
pun üsap manlükala om allük.
154 Kopwe peniei o angasaei,
kopwe amanauaei, usun ka pwon.
155 En kosap amanaua ekewe aramasangau,
pun resap aleasochisi om kewe allük.
156 Ai Samol mi Lapalap, om ümöümöch a lapalap,
kopwe amanauaei fän om pwüng.
157 Ra men chomong chon ariaföüüei me chon ü ngeniei,
nge ngang üsap tok seni om kewe allük.
158 Fän koput üa nenengeni ekewe aramas resap allükülük,
pun ir resap aleasochisi om kewe allük.
159 Kopwe ekieki usun ai aücheani om kewe öüröür.
Kopwe tümwünü manauei fän om tong ellet.
160 Masouen om kewe kapas meinisin a let.
Om kewe allük mi pwüng meinisin ra nonom tori feilfeilachök.
 
161 Ekewe samol ra ariaföüüei nge esor popun,
nge ngang üa meniniti om kewe kapas.
162 Üa pwapwa ren om kewe pwon
usun eman mi angei chomong liapan.
163 Üa oput o anioputa chofana,
nge üa aücheani om allük.
164 Üa mwareituk fän fisu lon eu rän
fän iten om kewe allük mi pwüng.
165 Chokewe mi aücheani om allük ra fokun kinamwe.
Esap wor och ra tongeni chepetek ren.
166 Ai Samol mi Lapalap, üa apilükülükü om kopwe amanauaei,
üa pwal apwönüetä om kewe allük.
167 Üa aleasochisi om kewe allük,
üa wesewesen aücheaniir.
168 Üa aleasochisi om kewe öüröür me om kewe allük,
pun en ka küna meinisin mine üa föri.
 
169 Ai Samol mi Lapalap, amwo ai siö epwe toruk.
Kopwe ngeniei mirit usun ka apasa.
170 Ai iotekin tüngor epwe toruk.
Kopwe angasaei usun ka pwon.
171 Üpwe fokun mwareituk
pwe ka aiti ngeniei om kewe allük.
172 Üpwe kölü om kapas,
pun om kewe allük meinisin ra pwüng.
173 Amwo kopwe molotä pwe kopwe alisiei,
pun üa filätä om kewe öüröür pwe üpwe apwönüretä.
174 Ai Samol mi Lapalap, üa positi om kopwe amanauaei,
üa fokun pwapwaiti om allük.
175 Kopwe mwüt ngeniei pwe üpwe manau, pwe üpwe tongeni mwareituk,
nge om kewe pwüüng repwe alisiei.
176 Üa mwälechfeil usun eman sip mi mwälechela,
kopwe küttaei ngang noum chon angang,
pun üsap manlükala om kewe allük.