Paipel KÖLFEL 113
113
Kölün mwareiti Kot pokiten an atekiatä ewe chon tipetekison
113.1-9
Ousipwe mwareiti ewe Samol mi Lapalap.
Ämi chon angang ngeni ewe Samol mi Lapalap oupwe mwareiti itan.
 
Oupwe mwareiti iten ewe Samol mi Lapalap
seni ei fansoun tori feilfeilachök.
Seni tötän akkar tori a tuputiu
aramas repwe mwareiti iten ewe Samol mi Lapalap.
Ewe Samol mi Lapalap a tekia seni chon ekewe mwü,
an ling a nom asen ekewe läng.
 
Ese wor eman a wewe ngeni ewe Samol mi Lapalap ach we Kot.
A mot won an lenien mot mi tekia,
nge a nennetiu
won ekewe läng, pwal won fanüfan.
A apwätai ekewe chon wöüngau seni lepwül
o atekiatäi ekewe chon mwelele seni ioien falang,
a amoteer ren ekewe samol,
ren ekewe samolun nöün aramas.
A aleniöchü ewe fefin mi rit lon imwan
o föri pwe epwe eman inelap mi pwapwa ren nöün kewe.
Ousipwe mwareiti ewe Samol mi Lapalap.