Paipel KÖLFEL 102
102
Eu siön riaföü
102.1-28
Eu iotek seni eman mi nom lon riaföü, lupwen a apwangapwang o apasätä an kewe riaföü me fän mesen ewe Samol mi Lapalap.
Kopwe aüselinga ai iotek, ai Samol mi Lapalap,
ai siö epwe toruk.
Kosap aopala mesom seniei,
lupwen üa nom lon riaföü.
Kopwe aü selingom ngeniei
o müttir pälüeniei, lupwen üa köruk.
 
Pun ränin manauei ra feil seniei usun och ötüöt,
inisi a kar usun efoch wes mi kü.
Lelukei a tatakis usun fetil mi pöküpök o pwasapwas.
Üsap chüen mwon mongö.
Pokiten ai leüömong le ngüngü
üa kichüchüla pwe chüi ra pwäwu.
Üa usun eman fukuron fanüapö,
pwal usun eman fukuro mi nom lon ekewe leni mi tatakis.
Üa kon nge nennela,
üa usun eman machang mi akaleman won ungen eu imw.
Iteiten fansoun chon oputaei ra takirin ämängauaei,
chokewe mi kapasingau usi ra eäni itei le ottek.
Üa mongö falang usun üa mongö pilawa,
ünümei koluk a nofit ngeni chönün mesei
10 pokiten watten om lingeringer.
Pun en ka angeei o pöütieila.
11 Ränin manauei ra usun chök nürün och mettoch lekuniol,
üa aiolol usun fetil.
 
12 Nge en, ai Samol mi Lapalap, ka nemenem tori feilfeilachök.
Kopwe chem me ren ekewe täppin aramas meinisin.
13 En kopwe ütä o eäni tong ngeni Sion.
A tori fansoun om kopwe ümöümöch ngeni,
ewe fansoun ka pwoneela a war.
14 Pun noum kewe chon angang ra aücheani föün Sion
o tongei pwülün mi moromor.
 
15 Chon ekewe mwü repwe meniniti ewe Samol mi Lapalap,
nge ekewe kingen fanüfan meinisin repwe niuokusiti an ling.
16 Pun ewe Samol mi Lapalap epwe aüsefälietä Sion,
i epwe pwä lon lingan.
17 Epwe aüselinga än ekewe chon riaföü iotek,
nge esap turunufasei ar tüngor.
 
18 Ei pworaus epwe mak fän iten ewe täppin aramas epwe uputiu,
pwe ekewe aramas resamwo uputiu repwe mwareiti ewe Samol mi Lapalap:
19 Ewe Samol mi Lapalap a nennetiu seni lenian mi pin o tekia,
seni läng a nennetiu fanüfan,
20 pwe epwe rongorong ngüngün ekewe chon fötek
o apichi ririn chokewe mi fen pwüngüla pwe repwe ninnila.
21 Iwe, aramas repwe pwärätä iten ewe Samol mi Lapalap me lon Sion,
nge me lon Jerusalem repwe mwareiti i,
22 lupwen chon ekewe mwü repwe chufengen
pwe repwe fel ngeni ewe Samol mi Lapalap.
 
23 Iwe, Kot a akisikisätiu ai pöchökül lupwen ai chüen alüal,
a amochomochala ränin manauei.
24 Üa apasa, “Ai Kot, kosap angeeila me lukalapen ränin manauei,
en ewe mi manau tori feilfeilachök.”
 
25 Me lomlom en ka föri longolongun fanüfan,
nge ekewe läng förien poum kana.
26 Ir repwe tala, nge en kopwe nonom fochofoch.
Ir repwe mesila usun echö üf.
Ka siwiliir usun eman a siwili üfan,
iwe, repwe morola.
27 Nge en ka ususum we chök,
manauom esap müchüla. Ipr 1.10-12
28 Nöün noum kewe chon angang repwe nonom fän kinamwe,
nge mwirimwirir repwe nonomöch me mwom.

102:27: Ipr 1.10-12