Paipel KÖLFEL 92
92
Sipwe mwareiti än Kot kirikiröch
92.1-15
Echö köl fän iten ewe ränin sapat.
A mürina äm aipwe kilisou ngonuk, äm Samol mi Lapalap,
aipwe kölün mwareiti itom,
en Ewe mi Unusen Tekia.
Iteiten lesosor aipwe arongafeili om tong ellet,
nge iteiten lepwin om allükülük,
fiti tikin pisekin ettik mi wor engol saitenin,
pwal fiti ngingin kitar.
Pun en, ai Samol mi Lapalap, ka apwapwaei ren om föför.
Üa köl fän pwapwa ren mine en ka föri.
 
Ai Samol mi Lapalap, om kewe föför ra fokun tekia,
om kewe ekiek ra fokun alolol.
Aramas mi tipate resap tongeni silei,
nge ir mi tiparoch resap tongeni wewe ren:
Inamwo are ekewe aramasangau ra mämäritä usun fetil,
nge ekewe chon föföringau meinisin ra aümanau,
repwe chök fetal ngeni feiengau esemüch.
Nge en ai Samol mi Lapalap, ka tekia tori feilfeilachök.
Ai Samol mi Lapalap, ellet ekewe chon oputom repwe rosola,
nge ekewe chon föföringau meinisin repwe toropasfeil.
 
10 En ka ngeniei pöchökül usun pöchökülen eman kow mi mwacho,
ka epiti ngeniei lö mi fö.
11 Mesei ra küna usun än chon oputaei kuf,
selingei ra rongorong usun feiengauen ekewe aramasangau mi ü ngeniei.
12 Ekewe chon pwüng repwe aümanau usun ewe irä palm,
repwe mämäritä usun efoch irä setar won Lepanon.
13 Ra usun chök irä mi fotetiu lon imwen ewe Samol mi Lapalap,
repwe aümanauatä me lon än ach we Kot we imwenfel.
14 Ra chüen ua lon ar chinlap,
ra uren pöchökül o wowoöch fansoun meinisin,
15 pwe repwe arongafeili pwe ewe Samol mi Lapalap a wenechar.
I ai achau, esap wor och pwüngingau a nom ren.