91
Nonom fän nürün Ewe mi Unusen Tufich
91.1-16
Eman mi nom ren Ewe mi Unusen Tekia pwe epwe op ren
o nonom fän än Ewe mi Unusen Manaman tümwün,
epwe kapas ngeni ewe Samol mi Lapalap,
“En ai lenien op me imwei imwen maun,
en ai Kot üa apilükülükuk.”
Pun i epwe tümwünuk seni ekewe feiengau meinisin mi monola senuk
o amanauok seni ewe mätter mi afeiengau,
epwe pwölü ngonuk pöün kewe pwe kopwe op fan.
An allükülük epwe tümwünuk o epeti senuk feiengau.
Kosap niueiti eniweniwen lepwin
ika ekewe föün esefich mi äkkäs lerän lupwen maun,
ika ewe mätter mi akanif lerochopwak,
ika ewe samau mi akafeiengau leoloas.
 
Engeröü repwe turula lepekum,
nge engol ngeröü lepelifichum,
nge en kosap feiengau.
Kopwe chök nengeni ren mesom
o küna usun än ekewe aramasangau angei liwiningau.
 
Pokiten ka eäni ewe Samol mi Lapalap lenien op,
ka pwal fili Ewe mi Unusen Tekia pwe om chon tümwün,
10 iei mine esap wor och feiengau epwe toruk,
esap pwal wor och riaföü epwe arap ngeni imwom.
 
11 Pun i epwe akünöü nöün chon läng kana pwe repwe tümwünuk,
repwe emwenuk won ekewe al meinisin ia kopwe feila ie. Mat 4.6; Luk 4.10
12 Repwe pwisuk lepöür kana
pwe pecheöm esap chepeti fau. Mat 4.6; Luk 4.11
13 Kopwe ipwetiu won laion me serepenit,
kopwe purätiu fän pecheöm ekewe nienifön laion me ekewe serepenit mi poison. Luk 10.19
14 Ewe Samol mi Lapalap a apasa, “Pokiten a echeniei, ngang üpwe amanaua,
üpwe tümwünü i, pun a silei itei.
15 Are epwe köriei, üpwe pälüeni.
Üpwe nom ren lon an riaföü,
üpwe angasa o aitöchü.
16 Üpwe alangatama ränin manauan pwe epwe menemen ren,
üpwe fokun amanaua.”

91:11: Mat 4.6; Luk 4.10

91:12: Mat 4.6; Luk 4.11

91:13: Luk 10.19