1 Ai Samol mi Lapalap, ka fen efich fanüom me lom,

ka aliwinisefäli ekewe chon Israel seni ar oola o awöüür.

2 Ka amusala pwüngingauen noum aramas,

ka amusala ar tipis meinisin.

3 Ka aükätiu om lingeringer ngeniir

o wes seni om song mi fokun lapalap.

4 Ai Kot, äm Chon Amanau, kopwe aliwinisefälikem

o aükätiu om song ngenikem.

5 Ifa usun, kopwe song ngenikem tori feilfeilachök?

Ifa usun, kopwe chök sopwela le song ngeni ekewe täppin aramas meinisin?

6 Kose mochen kopwe amanauasefälikem,

pwe äm noum kewe aramas aipwe mwareituk.

7 Ai Samol mi Lapalap, kopwe pwäri ngenikem om we tong ellet

o fang ngenikem om manau.

8 Üpwe rongorong ngeni mine Kot a apasa.

A pwon pwe epwe awora kinamwe ngeni nöün kewe aramas, ngeni nöün kewe mi pin,

are resap chüen liwinsefäl ngeni ar kewe föför mi mwäl.

9 Ellet, a kaneto pwe epwe amanaua chokewe mi niuokusiti i,

pwe an ling epwe nonom lon fanüach.

10 Tong ellet me allükülük repwe chufengen,

pwüng me kinamwe repwe mitirifengeniir.

11 Än aramas allükülük epwe feitä seni fanüfan,

nge än Kot pwüng epwe netiu seni läng.

12 Ewer, ewe Samol mi Lapalap epwe fangeto mettoch mi mürina,

nge fanüach epwe awora räsimong.

13 Pwüng epwe akomwola mwen ewe Samol mi Lapalap,

pwe epwe föri efoch al fän itan.