Paipel KÖLFEL 60
60
Eu iotekin tüngor alilis pokiten chon oput
60.1-12
(2.Sam 8.13; 1.Kron 18.12)
Ngeni ewe mi emweni chon köl: Ei köl usun ngingin ewe köl itan “Kiopun pwärätä”. Echö än Tafit köl fän iten kait ngeni aramas, lupwen a maun ngeni chon Aram seni Naharaim me Sopa, pwal lupwen Joap a liwinsefäl o niela engol me ruungeröü chon Etom me lon ewe Lemolun Salt.
Ai Kot, ka pöütikeemila o akufukem,
ka pwal song ngenikem.
Kose mochen kopwe apöchökülasefälikem.
Ka achecha ewe fanü, ka pwal asangafeseni.
Kopwe aöchüsefäli mine a ta, pun ewe fanü a mökküfesen.
Ka ariaföüü noum aramas ren riaföü mi chou,
ka aünü ngenikem wain pwe äm aia taroporopfetal ren.
 
Ka aürätä efoch filäik fän iten chokewe mi meninituk,
pwe repwe chufengen fan o sü seni ekewe föün esefich.
Kopwe awinakem ren om manaman o pälüeni äm iotek,
pwe noum kewe ka echeniir repwe ngasala.
 
Kot a kapas seni lon imwan mi pin,
“Lon ai meseik üpwe ineti Sikem
o aineti ewe lemolun Sukot ngeni nei aramas.
Kiliat fanüei, Manasa pwal fanüei,
Efraim imwei akkaw, Juta woki wokun king.
Moap sepiei sepien tötöl,
üpwe moneela ipwei sus won Etom,
asisilan pwe fanüei,
nge won ewe fanü Filistia üpwe arükak fän ai win.”
 
Iö epwe emwenieilong lon ewe telinimw mi pöchökül tittin?
Iö epwe emweniei ngeni Etom?
10 Ai Kot, ifa usun, ka wesewesen pöütikeemila?
Ifa usun, kosap chüen eti äm mwichen sounfiu le feila maun?
11 Kopwe alisikem pwe aipwe tongeni maun ngeni ekewe chon oputakem,
pun än aramas alilis a lomotongau.
12 Are Kot a etikich, kich sipwe win,
i epwe akufu chon oputakich.