58
Eu iotek pwe Kot epwe apwüngü ekewe aramasangau
58.1-11
Ngeni ewe mi emweni chon köl: Ei köl usun ngingin ewe köl itan “Kosap ataela”. Echö än Tafit köl.
1 Ämi sounemenem, ifa usun, oua wesewesen apwüngala mine a pwüng?
Ifa usun, oua apwüngü ekewe aramas fän wenechar?
2 Apwi, oua chök ekiekietä mine a ngau lon lelukemi,
nge pöümi ra föri föförün mwäneson won fanüfan.
3 Ekewe aramasangau ra tokola lon unusen manauer,
ra chök kapas chofana seni ewe fansoun ra uputiu.
4 Ra urela ren poison usun chök ekewe serepenit mi poison.
Ra pineela selinger usun eman serepenit a pineela selingan,
5 pwe esap tongeni rongorong ngingin ätewe mi afesira serepenit,
ika än eman sourong förüör.
6 Ai Kot, kopwe kupi ngir, kopwe tülü ngin ekewe laion mi langatam.
7 Amwo repwe morola usun koluk mi pula,
repwe pachachala usun fetil aramas ra purätiu.
8 Amwo repwe wewe ngeni eföü pweechar, a telila o wiliti mongomong,
repwe wewe ngeni eman mönükol esap küna saram, pun a uputiu, nge esap manau.
9 Mwen ämi kewe nape ra mefi pwichikaren ewe ekkei seni iräfölüföl,
ese lifilifil ika ir irä mi manau ika mi pwas.
Kot epwe ässala ekewe aramasangau ren eu ewiniär.
10 Ekewe chon pwüng repwe pwapwa, lupwen repwe küna pwe Kot a apwüngü ekewe chon tipis,
repwe talü pecher lon chan ekewe aramasangau.
11 Iwe, aramas repwe apasa, “Ellet, ekewe chon pwüng ra angei liwinir.
Ellet, mi wor eman Kot mi eäni kapwüng won fanüfan.”