Paipel KÖLFEL 54
54
Eu iotekin tüngor pwe Kot epwe tümwünü nöün aramas seni ekewe chon oputer
54.1-7
(1.Sam 23.19; 26.1)
Ngeni ewe mi emweni chon köl: Won pisekin ettik mi wor saitenin. Echö än Tafit kölün kait, lupwen ekewe chon Sif ra feila ren Saul o üreni pwe Tafit a op lefiler.
Ai Kot, kopwe amanauaei ren manamanen itom,
kopwe aletätä ai pwüng ren om pöchökül.
Ai Kot, kopwe aüselinga ai iotek,
kopwe aü selingom ngeni ai kewe kapas.
 
Pun chon lamalamtekia ra ü ngeniei,
ekewe chon mwäneson ra mochen nieila.
Ir chokewe resap ekieki Kot.
 
Nge Kot ai chon alilis,
ewe Samol i chon amwöchü manauei.
Kot epwe ukun ngeni chon oputaei ar föför mi ngau.
Epwe aroserela fän an allükülük.
 
Ngang üpwe eäni eu asor ngonuk seni mochenin letipei.
Üpwe kilisou ngonuk, ai Samol mi Lapalap,
pun en ka kirikiröch.
En ka angasaei seni ai riaföü meinisin,
nge üa pwapwa, lupwen üa küna pwe chon oputaei ra kuf.