Paipel KÖLFEL 52
52
Lomotongauen ach sikäsini föföringau
52.1-9
(1.Sam 22.9-10)
Ngeni ewe mi emweni chon köl: Echö än Tafit kölün kait, lupwen Toek ewe re Etom a feila ren Saul o üreni pwe Tafit a feila lon imwen Ahimelek.
En mwän mi pwora, pwota ka sikäsini om föföringau?
Än Kot tong a nom tori feilfeilachök.
Ka ekiekietä usun om kopwe afeiengaua aramas.
Chönawom a usun chök echö räisö mi ken,
en eman chon föri angangen atuputup.
Ka efich mine a ngau lap seni mine a mürina,
ka pwal efich kapas chofana lap seni kapas mi let.
Ka efich om kopwe afeiengaua aramas ren om kapas, en chon atuputup.
Nge Kot epwe afeiengauok tori feilfeilachök,
epwe turufuk o urusukowu seni imwom.
Epwe üttukowu seni fanüen chon manau.
Ekewe chon pwüng repwe küna mine epwe fis ngonuk o niuokus,
mürin repwe takiriik o üra,
“Nengeni, iei i ewe mwän esap mochen eäni Kot apilükülük,
nge a apilükülükü wöün mi somwola
o pöchökülela lon an föföringau.”
 
Nge ngang üa usun efoch irä olif mi märöch me lon imwen Kot.
Üa lükü än Kot tong ellet tori feilfeilachök.
Ai Kot, üpwe kilisou ngonuk tori feilfeilachök ren mine ka föri.
Üpwe asilefeili ngeni noum kewe aramas pwe en ka kirikiröch.
Ei üpwe föri me fän meser.