Paipel KÖLFEL 49
49
Ach apilükülükü pisekin fanüfan och ekiek umwes
49.1-20
Ngeni ewe mi emweni chon köl: Echö köl än nöün Kora kewe mwän.
Ämi chon ekewe mwü meinisin, oupwe rongorong ekei kapas,
oupwe aü selingemi, ämi meinisin mi nom won fanüfan,
ämi aramas tekia me aramas tekison,
ämi aramas pisekisek me aramas wöüngau.
Üpwe apasätä kapas tipachem,
nge ekiekin lelukei epwe awora weweöch.
Üpwe aü selingei ngeni eu kapasen amirit,
üpwe awewei ai asisil,
lupwen üa ettiki nei ükülele.
 
Pwota üpwe niuokus lupwen fansoun riaföü,
lupwen chon ariaföüüei ra pwelifeiliei?
Ir ekewe aramas mi apilükülükü wöür
o sikäsini pisekir mi somwola.
Ellet esap wor eman a tongeni isetiu penmanauen pwin
ika ngeni Kot liwinin manauan.
Pun liwinin manauen eman aramas a men mömong.
Esap fokun naf an epwe möni manauan,
pwe epwe tongeni manau tori feilfeilachök,
nge esap tolong lon peias.
 
10 Ewer, aramas ra küna pwe pwal ekewe chon tipachem ra mäla
usun chök ekewe mi umwes me tiparoch.
Ra likiti wöür ngeni pwal ekoch.
11 Ar lenien peias iei imwer tori feilfeilachök,
iei lenier repwe nom lon fansoun meinisin.
Inamwo ika mi wor püsin fanüer me lom.
12 Aramas resap tongeni nonomotiu won fanüfan lon ar wöümong,
nge repwe mäla usun chök man.
 
13 Iei usun mine epwe fis ngeni chokewe mi püsin lükü ir,
iei sopolan chokewe mi pwapwaäsini wöür.
14 Ra fil pwe repwe ninnila usun chök ekewe sip.
Mäla epwe nöür chon mas.
Ekewe chon pwüng repwe pwapwa ren ar akufuur lesosor,
nge ir repwe pwomachala
lon ewe lenien sotup toau seni imwer mi ling.
15 Nge Kot epwe angasaeila seni ewe lenien sotup,
pun i epwe etiwaei.
 
16 Kosap weitifengeniik are eman a pisekisekila,
are wöün a chök lapalapala,
17 pun lupwen epwe mäla, esap uweela och,
nge wöün esap tapwela mürin.
18 Inamwo are a ekieki pwe a feiöch lupwen an manau,
pwal inamwo are aramas ra mwareiti i pokiten an pisekisekila,
19 epwe chök eti an kewe lewo le mäla,
chokewe resap fokun chüen küna saram.
20 Aramas resap tongeni nonomotiu won fanüfan lon ar wöümong,
nge repwe mäla usun chök man.