Paipel KÖLFEL 30
30
Kölün kilisou fän iten ngasala seni mäla
30.1-12
Echö än Tafit köl. Echö köl fän iten apinipinin ewe imwenfel.
Ai Samol mi Lapalap, üpwe ingeituk, pun ka amanauaei,
nge kosap mwüt ngeni ekewe chon pälüeniei pwe repwe ämängauaei.
Ai Samol mi Lapalap, ai Kot,
üa siö ngonuk pwe kopwe alisiei.
Iwe, ka apöchökülaei.
Ai Samol mi Lapalap, ka angeeitä seni peias.
Üa fetal ngeni ewe lenien sotup,
nge en ka amanauaei.
 
Oupwe kölün mwareiti ewe Samol mi Lapalap,
ämi nöün kewe chon pin.
Oupwe chechemeni Ewe mi Pin o kilisou ngeni.
Pun a mochomoch fansoun an song,
nge an kirikiröch a wor lon unusen fansoun manauen eman aramas.
Lepwin a fis kechü,
nge lesosor a fis pwapwa.
 
Lupwen üa nom lon nükünüköch, üa apasa,
“Üsap fokun mwökütüküt.”
Ren om kirikiröch, ai Samol mi Lapalap,
ka anükücharaei usun eu chuk mi pöchökül.
Nge lupwen ka amona mesom seniei,
üa fokun niuokus.
 
Ai Samol mi Lapalap, üa siö ngonuk.
Üa tüngor ngonuk pwe kopwe alisiei.
“Met sokun win kopwe angei, are üpwe mäla
o tolong lon peias?
Ifa usun, chon mäla repwe tongeni mwareituk?
Ifa usun, repwe tongeni apworausa usun om allükülük?
10 Ai Samol mi Lapalap, kopwe aüselingaei o ümöümöch ngeniei.
Ai Samol mi Lapalap, kopwe alisiei.”
 
11 Iwe, ka awili ai ngüngüres ngeni pwörük,
ka pwiliti seniei üfei üföüfen letipeta
o aüföüfa ngeniei pwapwa.
12 Üpwe fokun mwareituk,
nge üsap fanafanala.
Ai Samol mi Lapalap, ai Kot,
üpwe kilisou ngonuk tori feilfeilachök.