Paipel KÖLFEL 15
15
Ekewe chon nonom won ewe chukun Kot
15.1-5
Echö än Tafit köl.
Ai Samol mi Lapalap, iö epwe tongeni tolong lon imwom mi pin?
Iö epwe tongeni nonom won chukum mi pin?
 
Ätewe mi aleasochisi Kot
o föri mine a pwüng fansoun meinisin,
a eäni kapas wenechar seni lon lelukan.
Esap aitengaua eman,
esap föri mine a ngau ngeni chienan,
esap pwal ngününgünüfetalei chon arun.
A oput eman mi manauangau,
nge a asamolu chokewe mi meniniti ewe Samol mi Lapalap,
a apwönüetä an pwon a eäni fän akapel, inamwo are a weires ren.
A mwütawu nöün moni, nge esap angei winnan,
esap pwal angei lifangen amichimich pwe epwe aturu eman esap wor an tipis.
Ätewe mi föri ekei mettoch epwe nomopos won chukum mi pin.