Paipel KÖLFEL 13
13
Iotekin tüngor alilis lon riaföü
13.1-6
Ngeni ewe mi emweni chon köl: Echö än Tafit köl.
Ai Samol mi Lapalap, ifa ükükün fansoun om kopwe manlükieila?
Ifa usun, kopwe manlükieila tori feilfeilachök?
Ifa ükükün fansoun om kopwe aopala mesom seniei?
Ifa ükükün fansoun ai üpwe engila fän ai weires?
Ifa ükükün fansoun lelukei epwe riaföü lerän me lepwin?
Ifa ükükün fansoun än chon oputaei repwe nemenieila?
 
Ai Samol mi Lapalap, kopwe nenengeniei o pälüeniei.
Kopwe apöchökülaei, kosap mwütätä ai üpwe mäla.
Kosap mwüt ngeni ekewe chon oputaei pwe repwe apasa, “Aia akufu ätewe.”
Kosap mwüt ngeni ekewe chon pälüeniei repwe takiriei ren ai tumwula.
 
Nge üa anomu ai apilükülük won om tong ellet,
üpwe pwapwa ren om amanauaei.
Ngang üpwe köl ngonuk, ai Samol mi Lapalap,
pun ka fokun eäni kirikiröch ngeniei.